Tơdrông Pơđơk 3 - Sơ̆p Hlabơar Nơ̆r 'Bok Kei-Dei

Tơdrong gơh hơgei đei yua hloh

¹ Ơ dăm, 'nĕ kơ hiơt ôh tơdrong Inh bơtho khan; Răk bĕ tơdrong Inh tơtă lăm jơhngơ̆m ih.

² Yua kơ tơdrong inh bơtho gô thim kơ ih arih sot, Păng đei hiôk jơnap.

³ 'Nĕ kơ lê̆ ôh tơdrong 'mêm mơnat păng tơnăp, 'Băk sư tơ hơko ih, chih răk sư tơ lăm jơhngơ̆m ih.

⁴ Ih gô đei tơdrong mơnat păng đei tơdrong ư-ang 'lơ̆ng. 'Bơ̆t anăp Kră Yang 'Bok Kei-Dei păng kon bơngai.

⁵ Gơnang bĕ kơ Kră Yang hăm đĭ jơhngơ̆m, 'Nĕ kơ gơnang kơ đon hlôh wao ih;

⁶ 'Blŏk băt bĕ kơ Kră Yang lăm rim trong ih pơm, Na sư gô pơm kơ trong ih tơpăt.

⁷ 'Nĕ lăng gơh hơgei kiơ̆ kơ măt kơdih, Mă-lei hli yom bĕ kơ Kră Yang, weh bĕ đơ̆ng trong kơnê̆.

⁸ Noh tơdrong ming rơka ih gô klaih, kơting ih gô rơngơp hiôk,

⁹ Iŏk bĕ mŭk tơmam păng 'ba hơ'bo yuă blŭng-a lăm bơyan. Kơkuh bơnê kơ Kră Yang.

¹⁰ Lei na pơk ih gô 'bĕnh blai kơ 'ba hơ'bo, ge ih gô 'bĕnh kơ sik hơmu hle.

¹¹ Ơ dăm, ih 'nĕ kơ klai ơh kơ tơdrong Kră Yang teh bơtho, Kŭm 'nĕ kơ ơh tơdah Sư chrih.

¹² Yua kơ Kră Yang teh bơtho bơngai bu mă Sư 'mêm, Thoi 'bă teh bơtho kon sư 'mêm.

¹³ Pŭn hiôk dêh kơ bơngai bu chă đei tơdrong gơh hơgei. Păng đei tơdrong hlôh wao.

¹⁴ Gĭt sư hloh kơ hu. Yua sư kăp hloh kơ maih.

¹⁵ Tơdrong gơh hơgei gĭt hloh kơ tơmo gôh, Đĭ-đăng tơmam kon bơngai hơpơi wă, ưh kơ gơh pơtŏ pơting.

¹⁶ Lăm ti 'ma sư chĕp tơdrong arih sot; Lăm ti 'ngiĕo sư đei mơdrŏng tih păng ư-ang.

¹⁷ Lu trong sư jơ̆ chơt hiôk, Păng đĭ-đăng trong sư đei hiôk-hian.

¹⁸ Tơdrong gơh hơgei sư jing minh tơnơm 'long arih kơ bơngai bu đei rôp sư; Bơngai bu đei rôp sư kơjăp jô̆ bơngai pŭn hiôk tơpă.

¹⁹ Hăm tơdrong gơh hơgei Kră Yang pơjing teh đak; Hăm tơdrong băt hlôh Sư săp lu tăl plĕnh.

²⁰ Hăm tơdrong hlôh wao Sư lu sơlŭng jrŭ bluh đak, Păng hơmơ̆l đei đak ngom.

²¹ Ơ dăm wei răk bĕ tơdrong gơh hơgei, păng tơdrong băt đon tơchĕng, 'Nĕ ăn măt ih weh ataih đơ̆ng tơdrong noh.

²² Sư noh boih jing tơdrong arih kơ bơhngol ih, Păng tơmam pơhrôp 'lơ̆ng 'băk tơ hơko ih.

²³ Ih gô yak hơđơ̆ng kơjăp lăm trong ih, Păng jơ̆ng ih huay kơ tơpling.

²⁴ Kơplah ih 'bĭch ưh kơ đei hli kiơ. Kơplah ih 'bĭch tep, ih gô tep hiôk-hian.

²⁵ 'Nĕ kơ hli krưp kiơ ôh kơplah tơdrong kơnê̆ blư truh kơ ih, Kŭm 'nĕ kơ hli krưp mơ̆n kơplah ih 'bôh tơdrong kơnê̆ truh pơrăm lu bơngai pơm kơnê̆.

²⁶ Yua kơ Kră Yang boih anih ih gơnang, Sư gô wei-lăng jơ̆ng ih huay kơ puh 'năk.

²⁷ 'Nĕ kơ sơngah pơm 'lơ̆ng kơ bơngai trŏ kơ pơm, Kơplah ti ih gơh pơm tơdrong noh. Tơdah ih đei boih

²⁸ 'Nĕ kơ khan ôh kơ rông 'bôt ih, Brŏk bĕ dơning năm tơ âu dơ̆ng, inh gô ăn kơ ih.

²⁹ 'Nĕ pơđâu chă đon wă pơm kơnê̆ kơ rông 'bôt ih, Dah sư oei hiôk hơiă hăm ih.

³⁰ 'Nĕ kơ pơjah hăm đe tơdrong kơ đei Tơdah đe ưh kơ pơm kơnê̆ kơ ih.

³¹ 'Nĕ kơ gar hăm bơngai pơm kơnê̆, Păng 'nĕ kơ kiơ̆ trong sư ôh.

³² Yua kơ Kră Yang areh kơ bơngai hơlĕnh; Mă-lei pơm buăl juăt hăm bơngai tơpăt.

³³ Tơdrong Kră Yang hiap oei lăm hnam lu bơngai pơm kơnê̆. Mă-lei Sư bơnê ăn pŭn hiôk kơ hnam lu bơngai pơm 'lơ̆ng.

³⁴ Hăm lu bơngai blei hiap Sư blei hiap lu bơngai juăt kơ blei hiap đe, Mă-lei sư ăn pŭn hiôk kơ bơngai bu băt pơyom.

³⁵ Bơngai gơh hơgei gô đei tơdrong ư-ang; Mă-lei bơngai kơwao gô mơlâu.