Tơdrông Pơđơk 25 - Sơ̆p Hlabơar Nơ̆r 'Bok Kei-Dei

Đei tơdrong pơđơ̆k nai đơ̆ng Sôlômôn

¹ 'Nâu tơdrong pơđơ̆k đơ̆ng Sôlômôn, mă lu buăl Hesekia pơtao đe Juđa chih răk dơ̆ng.

² Lăm tơdrong kiơ oei hlơp, noh boih tơdrong ư-ang kơ Kră Yang 'Bok Kei-Dei. Tơdrong lu pơtao chơchă wă kơ băt noh tơdrong ư-ang kơ lu sư.

³ Plĕnh kơjung dang yơ. Teh jrŭ dang yơ, Na jơhngơ̆m lu pơtao đe ưh kơ băt thoi noh mơ̆n.

⁴ Iŏk lê̆ bĕ ĭch hu. Na lu bơngai tuh hling jing đei tơmam gĭt.

⁵ Iŏk lê̆ lu bơngai pơm kơnê̆ đơ̆ng anăp pơtao. Na tang-dŏ pơtao pơjing kơjăp 'lơ̆ng tơpăt.

⁶ 'Nĕ kơ pơư ih kơdih 'bơ̆t anăp pơtao, Dah hơ-oei 'bơ̆t anih lu đe ư-ang;

⁷ 'Lơ̆ng hloh đe khan: Apinh ih, tŏk tơ âu. Noh hloh kơ sư tơjur ih 'bơ̆t anăp lu yŏng pơgơ̆r.

⁸ Tơdrong kiơ măt ih 'bôh boih, 'Nĕ kơ hăt tơbăt kơ 'bok sek tơlang. Kơnh, kon pơlei oei jê̆ ih lu sư 'bôh plơ̆ng gô pơm kơ ih mơlâu 'Nâu tuch-luch ih wă pơm liơ.

⁹ Tơdah ih pơjah chă lăp hăm lu bơngai rông 'bôt ih. Ih 'nĕ roi pơdah tơdrong hlơp bơngai nai.

¹⁰ Hli kơ đe mơ̆ng tơdrong noh hơloh chrih kơ ih. Đe ang tơdrong jang kơnê̆ ưh kơ sŭt đĭ.

¹¹ Nơ̆r pơma trŏ lăp noh, Thoi plei hơra 'maih dan kơpal pơnhan hu.

¹² Bơngai hơgei chrih kơ đon bơngai oei mơ̆ng. Thoi gŏp maih, tơmam đe pơguăng păng maih ling.

¹³ Bơngai đe wơh tơnăp hăm yŏng sư Thoi 'mui prĕl rơngơp bơyan yuă 'ba. Yua kơ pơm kơ bơhngol yŏng tơ'ngla sư hiôk.

¹⁴ Bơngai bu pơkă wă ăn tơmam, Mă-lei ưh kơ đei ăn. Thoi hơmơ̆l 'mi đei kial jor kơ 'mi dơ̆ng.

¹⁵ Đơ̆ng adrin chơ̆n na gơh pơtơm bơngai pơm yŏng pơgơ̆r chu. Hơpiĕt pơma huăt rơdu lu kơting 'bônh kơ tơgơ̆.

¹⁶ Tơdah ih 'bôh đak sut sa sư lăp ai; Sa lơ 'bơ'blut kơnh ih hăk lê̆.

¹⁷ 'Nĕ gan năm ngôi tơ hnam bôl buăl ih, Kơnh hli kơ sư bơ̆l hăl băl lap hil plơ̆ kơ ih.

¹⁸ Bơngai chă hơlĕnh sơlam kơ rông 'bôt sư. Bơngai noh thoi 'long băl, thoi đao gưm, dah thoi 'brơ̆m suĕng.

¹⁹ Lui ngeh kơ bơngai hơlĕnh pơdăr năr đei tơdrong pơmat. Thoi kơkă hăm hơnĕnh tơgơ̆, thoi yak hăm jơ̆ng tơplơ̆ tơpling.

²⁰ Bu hơri kơ đe năr đe ơh sơ'ngon. Thoi plôh ao hơ'bơ̆l năr tơngiĕt. Thoi tuh đak iŭ tơ đak Sôđa.

²¹ Tơdah bơngai ayăt kơ ih pơngot ăn kơ sư sŏng sa. Tơdah rơhing kơ đak, ăn kơ sư nhă;

²² Thoi ih dan ngar ngŭr kơpal kơ̆l sư, Thoi ei lei na Kră Yang gô apah bơnê kơ ih.

²³ Kial đơ̆ng yă-nơ̆m ba đak 'mi. Hơpiĕt ayơ roi sa pơma krŭl pơm kơ đe blĕk.

²⁴ Kơtrơ̆m oei 'bơ̆t chaih jih bơbŭng hnam 'lơ̆ng hloh kơ oei lăm hnam hơdai hăm akăn mơkoh.

²⁵ Tơdrong 'nao tơbăt 'lơ̆ng truh đơ̆ng char ataih. Thoi đak rơngơp pơchhơp bơngai rơhing.

²⁶ Bơngai tơpăt huŏng lăm bơngai pơm kơnê̆ pơhlŭ. Thoi đak sơlŭng gơsŏk đĭ, thoi đak mơlĕch mơgrĭ boih.

²⁷ Sa đak sut lơ hnang ưh kơ 'lơ̆ng. Bơngai pơrơ̆ng chă wă kơ đe ư-ang kư̆m lei-lăi.

²⁸ Bơngai bu ưh kơ băt pơgơ̆r jơhngơ̆m sư kơdih. Bơngai noh thoi minh pôm pơlei tih dur đĭ păk.