Tơdrông Pơđơk 24 - Sơ̆p Hlabơar Nơ̆r 'Bok Kei-Dei

¹ 'Nĕ 'ngeng kơ lu bơngai pơm kơnê̆, Ih kư̆m 'nĕ kơ wă 'maih oei hơdai hăm sư.

² Yua kơ jơhngơ̆m lu sư chă wă pơrăm đe, Hơpiĕt lu sư pơma chă dơhla pơrŭng đe.

³ Đơ̆ng tơdrong gơh hơgei đei pơm tơiung hnam. Đơ̆ng đon hlôh wao na hnam đei pơm pơjing kơjăp.

⁴ Đơ̆ng gơh hơgei na đei lơ anih 'bĕnh tơmam gĭt păng 'lơ̆ng.

⁵ Bơngai gơh hơgei đei pran kơtang. Bơngai hlôh wao gô thim tơdrong pran.

⁶ Ih athei đei chă đon hlôh wao na năm tơblah. Gô jei jơnei tih dah ih đei lơ bơngai bơtho tơ'bôh.

⁷ Tơdrong hơgei oei kơjung dêh kơ lu bơngai kơtul, Sư kơđei ha 'bơ̆r pơma ôh 'bơ̆t 'măng jang.

⁸ Lu bơngai wă chă tơdrong pơm kơnê̆. Đe jô̆ sư bơngai chă hơlĕnh pơdăr.

⁹ Tơdrong tơchĕng wă pơm lĕch đơ̆ng kơhlôh kơwao noh yoch. Bơngai juăt kơ hiap đe areh dêh.

¹⁰ Tơdah ih rơdu klai lăm năr đei tơdrong gleh, Noh tơdrong pran kơtang ih iĕ dêh.

¹¹ Dŏng pơklaih bĕ lu bơngai wă năm lăm trong lôch. Păng dŏng pơklaih bĕ lu bơngai mă đe ba wă pơlôch.

¹² Tơdah ih khan, “'Nâu, nhôn ưh kơ băt ôh tơdrong noh” Hăm trŏ đei tơ'ngla 'bôh boih tơdrong noh? Hăm trŏ đei tơ'ngla wei-lăng bơhngol ih sư 'bôh tơdrong noh? Sư gô pơm tơwih kơ rim 'nu kiơ̆ thoi đêl sư pơm

¹³ Ơ dăm, sa bĕ đak sut, yua kơ sư 'ngam 'lơ̆ng. Kơ̆l sal sut jing 'ngam kơ hơlŏng ih.

¹⁴ Ih athei băt tơdrong hơgei kư̆m đei 'ngam lăm bơhngol ih thoi noh; Dah ih chă tơdrong hơgei đei boih, ih gô đei tơdrong hiôk chơt đơ̆ng âu tơ anăp. Păng tơdrong ih chang hơmĕng ưh kơ tôch ôh.

¹⁵ Ơ bơngai pơm kơnê̆, Lê̆ kơ răp chop hnam bơngai tơpăt; 'Nĕ kơ pơrăm ôh anih sư oei.

¹⁶ Yua kơ bơngai tơpăt mă sư pơ̆k tơpơh wơ̆t ră, Mă-lei gô iung dơ̆ng; Mă-lei bơngai pơm kơnê̆ gô pơrăm hăm pơmat-tat.

¹⁷ 'Nĕ kơ chhôk tơdah bơngai ayăt kơ ih pơ̆k huŏng; Jơhngơ̆m 'nĕ kơ hal, năr jei ih,

¹⁸ Kơnh Kră Yang 'bôh tơdrong noh Sư ưh kơ lăp đon. Na ưh pă hil kơ sư.

¹⁹ 'Nĕ kơ ơh lăng lu bơngai kơnê̆; Lê̆ kơ klai areh lu bơngai pơm kơnê̆ 'mê̆ 'brư̆;

²⁰ Yua kơ bơngai pơm kơnê̆ ưh kơ lê̆ đunh ôh, Ŭnh kơđeng hu sư gô păt.

²¹ Ơ dăm hli yom bĕ kơ Kră Yang păng chu yom kơ pơtao; 'Nĕ pơgơ̆p hơdai hăm lu bơngai pơm kơnê̆.

²² Yua kơ blư đei tơdrong kơnê̆ truh hloi tơ lu sư. Bu băt lê̆ tơdrong truh kơ bơngai âu dah bơngai to?

Oei đei pơma gah hlôh wao nai

²³ Nơ̆r 'nâu gơh đei lĕch đơ̆ng bơngai hơgei pơma; Sek tơlang 'nĕ kơ mơ̆t minh pah ưh kơ 'lơ̆ng.

²⁴ Bu khan kơ bơngai pơm kơnê̆ ih huay kơ yoch ôh, Kon pơlei gô blei hiap, bơngai lăm teh đak hil areh kơ sư.

²⁵ Mă-lei bơngai bu chrih kơ bơngai pơm yoch đei chơt hiôk. Tơdrong pŭn hiôk truh tơ lu sư.

²⁶ Bơngai bu drơ̆ng lăp kiăp trŏ noh thoi chŭm 'bơ̆t 'bơ̆r.

²⁷ Pơm đang tơdrong jang ih tơ 'nguaih pơgar bĕ, choh bĕ mir na ih; Đơ̆ng rŏng kơ noh pơm bĕ hnam ih.

²⁸ 'Nĕ chă pơm tơdrong kơđei oei sa kơnê̆ hăm rông 'bôt ih; 'Nĕ yua 'bơ̆r nơ̆r pơma pơhlŭ hơlĕnh?

²⁹ 'Nĕ chă pơma: Inh gô pơm kơ sư thoi sư pơm kơ inh; Inh gô pơm 'mong kiơ̆ tơdrong đêl sư pơm.

³⁰ Inh rok boih trong mir bơngai hơlah, Păng lăng boih pơgar hơmu bơngai kơwao.

³¹ 'Long 'nhĕt jơla jơ̆p kơ mir na sư, 'nhĕt jơla chăt 'bĕnh kơ teh. Păng dur man păng tơmo to đĭ păk boih.

³² Inh lăng păng hơlen tơ noh. 'Bôh hŏk iŏk pơhrăm.

³³ Tep 'biơ̆ pơdơh 'biơ̆, Kuăr ti 'biơ̆.

³⁴ Lei tơdrong dơnuh gô truh kơ ih thoi bơngai ayăt. Păng tơdrong kơ'bah gô truh thoi bơngai chĕp tơmam tơblah oei tơblah.