Tơdrông Pơđơk 22 - Sơ̆p Hlabơar Nơ̆r 'Bok Kei-Dei

¹ Anăn đe pơư jơ̆p-jang noh 'lơ̆ng hloh kơ mơdrŏng. Đe pơyom noh 'lơ̆ng hloh kơ đei hu maih.

² Bơngai mơdrŏng bơngai dơnuh kư̆m lei-lăi. Bre sư đơ̆ng Kră Yang pơjing ngăl.

³ Bơngai hơgei 'bôh đei tơdrong truh kơdâu weh. Bơngai kơwao kư̆ yak truh puh hloi lăm noh.

⁴ Tơdrong apah kơ bơngai iŏk đon ala, păng hli yom kơ Kră Yang. Noh tơdrong mơdrŏng, tơdrong arih păng đe pơyom.

⁵ Jơla păng hơ'năk hơđong kơ trong lu bơngai pơm kơnê̆. Bu wei bơhngol sư weh ataih đơ̆ng trong noh.

⁶ Bơtho tơ'bôh bĕ kơ lu bơngai oei hơ'lơ̆p trong sư wă yak kiơ̆. Wă truh tơ kră lu sư huay kơ weh dơ̆ng trong noh.

⁷ Bơngai mơdrŏng jing yŏng lu bơngai dơnuh, Bơngai bu tŏk iŏk jing đĭch kơ bơngai ăn iŏk.

⁸ Bơngai bu rei đŏng gô tŏng kơ sư tơdrong pơmat; 'Long băl sư hil gô tơgơ̆.

⁹ Bơngai bu đei măt lăng mơnat sư gô đei pŭn hiôk. Yua kơ sư đei tơgŭm tơmam sa kơ lu bơngai dơnuh hin.

¹⁰ Pơpuh bĕ bơngai juăt pơgreh na tơdrong pơjah weh kiơ̆ sư; Tơdrong pơjah pơjăng păng mơlâu akâu 'nâu gô đĭ.

¹¹ Bơngai bu chă wă 'mêm kơ jơhngơ̆m 'lơ̆ng rơgoh noh pơma nơ̆r băt mơnat. Gô pơm buăl juăt hăm pơtao.

¹² Măt Kră Yang wei-lăng lu bơngai hơgei; Mă-lei sư tơhiong lê̆ tơdrong lu bơngai hơlĕnh pơma.

¹³ Lu bơngai hơlah khan đei dăm-brang tơ 'nguaih to. Inh gô lôch tơ rok trong.

¹⁴ Nơ̆r 'bơ̆r bơngai akăn đe pơm đi thoi sơlŭng jrŭ tơpă. Bơngai mă Kră Yang hil dêh gô huŏng tơ lăm noh.

¹⁵ Tơdrong kơtul kơhlôh 'bôh oei chô̆ jơhngơ̆m lu hơ'lơ̆p. Mă-lei đei yua 'long teh bơtho tơdrong kơtul lĕch tơ ataih kơ sư.

¹⁶ Bu pơđep bơngai dơnuh wă pơm kơ sư mơdrŏng, Bơngai bu ăn pơgâm kơ lu bơngai mơdrŏng noh rai pơm kơ bre sư dơnuh hloh.

Lu bơngai hơgei pơđơ̆k

¹⁷ Pơgling đon mơ̆ng bĕ lu bơngai hơgei pơma, Na gô pơih jơhngơ̆m ih đih sơng tơdrong hơgei inh.

¹⁸ Ih gô chơt hiôk tơdah ih răk sư lăm jơhngơ̆m, Păng wei sư oei lăm 'bơ̆r hơkŭng ih ling-lang.

¹⁹ Inh bơtho tơ'bôh boih kơ ih năr 'nâu; Wă kơ ih đei đon lui gơnang kơ Kră Yang.

²⁰ Hăm trŏ Inh đei chih kơ ih boih pêng-jĭt tơdrong 'lơ̆ng. Pơma bơtho athei đe lăm tơdrong hlôh wao?

²¹ Bơtho kơ ih nơ̆r trŏ, păng sĭt Wă kơ ih gơh tơl tơwih nơ̆r bơngai wơh ih?

²² 'Nĕ pơgŏ iŏk tơmam lu bơngai dơnuh hoh; Noh yua kơ sư dơnuh hin răm boih. Kŭm 'nĕ pơjuă pơđep lu bơngai pơmat-tat 'bơ̆t 'măng jang pơlei.

²³ Yua kơ Kră Yang gô dŏng lu sư, Gô iŏk lê̆ tơdrong arih đơ̆ng lu bơngai tơgar iŏk tơmam lu sư.

²⁴ 'Nĕ pơm buăl juăt hăm bơngai khĕnh Păng kư̆m 'nĕ kơ năm hơdai lu bơngai 'bônh kơ blĕk.

²⁵ Kơnh hli kơ ih rok kiơ̆ trong sư Păng bơhngol ih gô 'leh hơđong sư.

²⁶ 'Nĕ pơgơ̆p hơdai lu bơngai pơkă rôp ti, Dah wă pơkă chă mơng hre kơ đe,

²⁷ Tơdah ih 'mong kơ hre ưh kơ đei, lei đei yua kiơ kơ ih gô hiong giơng ih tep.

²⁸ 'Nĕ kơ rĭ 'long pơ̆ng hơdral so, đơ̆ng mĕ 'bă yă 'bok pơ̆ng sơ̆.

²⁹ Ih hăm 'bôh ưh lu bơngai hơgei đei jang tơnăp? Sư gô dơ̆ng 'bơ̆t anăp lu pơtao sư ưh kơ dơ̆ng hơdai 'bơ̆t anăp lu bơngai hmă.