Tơdrông Pơđơk 21 - Sơ̆p Hlabơar Nơ̆r 'Bok Kei-Dei

¹ Jơhngơ̆m pơtao lăm ti Kră Yang thoi đak glung ro; Sư ăn ro tơ yơ mơ̆ng kơ Sư wă.

² Trong kon bơngai wă tă tơpăt kiơ̆ kơ măt sư kơdih. Mă-lei đei Kră Yang lăng lăm jơhngơ̆m.

³ Pơm tơdrong tơpăt, băt pơm tơdrong trŏ Noh Kră Yang lăp đon hloh kơ tơmam soi pơyơ̆r.

⁴ Măt lăng pơrŏ, păng jơhngơ̆m pơang, Ŭnh kơđeng lu bơngai kơnê̆, tă kơ yoch ngăl.

⁵ Tơdă lu bơngai hiă pơnam đei tơmam rơkah rơkai. Mă-lei đei lu bơngai pơm hăt hot gô jing pơngot dơnuh.

⁶ Đei tơmam yua đơ̆ng pơma hơlĕnh tĕnh kơ hiong thoi hơyuh đak Kơ lu bơngai chơchă tơdrong lôch.

⁷ Tơdrong kơnê̆ lu bơngai pơm kơnê̆ dui ba lu sư răm. Yua kơ lu sư sơngah pơm tơdrong tơpăt.

⁸ Trong lu bơngai pơm kơnê̆ đŏng đĕo; Mă-lei tơdrong jang bơngai 'lơ̆ng rơgoh noh oei tơpăt ling-lang.

⁹ Kơtrơ̆m oei 'bơ̆t chaih jih bơbŭng hnam 'lơ̆ng hloh kơ oei hơdai akăn mơkoh.

¹⁰ Jơhngơ̆m lu bơngai pơm kơnê̆ hơpơi wă chă tơdrong kơnê̆. Lu kon pơlei oei jê̆ sư ưh kơ đei layơ hiôk 'bơ̆t anăp sư.

¹¹ Kơplah đe phak lu bơngai blei hiap. Bơngai kơtul gô hơgei, Kơplah bơtho lu bơngai hơgei, sư đei iŏk đon hlôh wao.

¹² Yŏng 'lơ̆ng tơpăt băt lăng hơlen hnam bơngai pơm kơnê̆; Yŏng noh hơloh tơlơ̆ lê̆ lu bơngai kơnê̆ lăm tơdrong pơmat.

¹³ Bơngai bu chĭt đon kuă kơ mơ̆ng nơ̆r lu bơngai dơnuh hin krao ôr, Bơngai noh đe kư̆m kuă kơ mơ̆ng drơ̆ng nơ̆r sư krao ôr mơ̆n.

¹⁴ Tơmam ăn hlơp pơm rơngơp tơdrong hil. Tơmam sa pơgâm mơ̆t lăm jơhngơ̆m blĕk rai ngach.

¹⁵ Pơm tơdrong tơpăt noh băt pơhiôk, lu bơngai pơm 'lơ̆ng, Mă-lei đei tơdrong hli kơ lu bơngai pơm kơnê̆.

¹⁶ Bơngai wơ̆l hiong tơdrong gơh hơgei Gô oei hơdai hăm khŭl bơngai lôch.

¹⁷ Bơngai bu ham kơ hiôk chơt gô dơnuh. Bơngai bu puh lăm sik hơmu păng đak rơmă plei ôliwơ ưh kơ layơ mơdrŏng.

¹⁸ Bơngai pơm kơnê̆ tơmam 'măn lê̆ wă huai iŏk bơngai 'lơ̆ng tơpăt. Bơngai hơlĕnh gô huai tơplih anih lu bơngai tơpăt.

¹⁹ Kơtrơ̆m oei hơdrô̆ lăm char glă. 'Lơ̆ng hloh oei hơdai bơngai drŏ-kăn hrăn tơhil jŏk.

²⁰ Lu bơngai hơgei đei 'măn tơmam gĭt păng rơmă plei ôliwơ; Bơngai kơtul kơwao sa đĭ tơmam sư đei.

²¹ Bơngai bu chă tơdrong tơpăt păng băt 'mêm Gô đei tơdrong arih tơpăt păng đe ư-ang.

²² Bơngai hơgei tŏk blah pơlei tih lu bơngai nuih kơtang. Pơrăm lê̆ đĭ anih kơjăp mă lu sư gơnang.

²³ Bu gơh wei 'bơ̆r hơpiĕt, Gơh wei bơhngol klaih đơ̆ng pơmat-tat.

²⁴ Blei hiap, noh anăn lu bơngai pơang pơrŏ; Sư pơm kư̆ kă chă pôk pơang dêh.

²⁵ Tơdrong hơpơi wă lu bơngai alah Gô pơlôch sư kơdih yua kơ ti sư kuă kơ jang.

²⁶ Rim năr bơngai ham hrăn hơpơi kơ tơmam. Mă-lei đei lu bơngai tơpăt băt asong huay kơ 'mêm ôh.

²⁷ Tơmam soi pơyơ̆r đơ̆ng lu bơngai pơm kơnê̆ Kră Yang areh dêh, pơma kiơ tơdah lu sư pơyơ̆r hăm jơhngơ̆m kơnê̆ tăm.

²⁸ Bu pơma hơlĕnh gô lôch răm, Mă-lei đei bơngai bu chu mơ̆ng kiơ̆ sư gơh pơma ling-lang.

²⁹ Bơngai kơnê̆ pơm lê̆ muh măt arăng kơchu. Lu bơngai tơpăt băt pơm kơ trong sư kơjăp.

³⁰ Ưh kơ đei tơdrong gơh hơgei ayơ, tơdrong đon hlôh wao ayơ, Dah tơdrong chă đon kơnê̆ ayơ, Mă gơh blah Kră Yang.

³¹ Đe chă aseh wă 'măn kơ năr năm tơblah; Mă-lei kĕ jei noh đơ̆ng Kră Yang.