Tơdrông Pơđơk 20 - Sơ̆p Hlabơar Nơ̆r 'Bok Kei-Dei

¹ Sik hơmu pơm kơ đe suai jing bơngai blei hiap. Sik hơmu et suai pơm kơ bơngai ôr tơkĕch. Bu et hloh kơ ai suai jing pă đei đon tơchĕng hơgei.

² Tơdrong pơtao hil thoi dăm-brang grĕnh, Bơngai bu kơ chu pơgreh pơtao gô hiong tơdrong arih kơdih akâu.

³ Bơngai bu kĕ wei huay kơ tơhil băl, bơngai noh đe ư-ang; Lu bơngai kơhlôh đĕch ngăl pơjah tơhil băl.

⁴ Lăm bơyan puih phang, lu bơngai hơlah ưh kơ jang mir 'ba; Na truh bơyan kĕch 'ba lu sư chă sa mă-lei ưh kơ đei 'bôh.

⁵ Tơdrong chă đon lăm kon bơngai thoi đak jrŭ. Mă-lei bơngai hơgei đei đon hlôh wao gô sŏ iŏk tơ noh.

⁶ Lơ bơngai pơang kơdih akâu khan tơnăp. Mă-lei chă lăng hăm đei minh 'nu tơnăp?

⁷ Bơngai tơpăt băt oei arih sa 'lơ̆ng tơpăt, Pŭn hiôk dêh kơ lu kon sâu sư!

⁸ Pơtao ngôi kơpal tang-dŏ sư sek tơlang, Yua măt sư lăng đĕch 'bôh lĕch đĭ lu tơdrong kơnê̆.

⁹ Bu pơ̆n khan: Inh wei-lăng jơhngơ̆m inh rơgoh, Inh rơgoh pă đei yoch boih?

¹⁰ Kŏng ưh kơ trŏ, pơtŏ ưh kơ tôm 'bar tơdrong noh Kră Yang areh dêh.

¹¹ Mă hơ'lơ̆p bơ̆n gơh 'bôh sư liơ, noh đơ̆ng sư pơm. Sư rơgoh 'lơ̆ng, dah tơpăt.

¹² Măt wă lăng păng đon wă kơtơ̆ng, 'Bar noh đơ̆ng Kră Yang pơjing.

¹³ 'Nĕ hrăn tep, kơnh ih jing dơnuh hoh. Lar măt hơdơ̆r bĕ na ih phĭ jơnap.

¹⁴ Bơngai răt băt pơjăm khan: “Kơnê̆, kơnê̆ dêh,” Mă-lei mưh răt iŏk, brŏk bơnê khan 'lơ̆ng.

¹⁵ Đei maih đei jơmŏng lơ; Mă-lei đei 'bơ̆r đon hơgei noh mă tơmam gĭt hloh.

¹⁶ Rôp ao wă pơkơ̆ng tơdah sư drơ̆ng wă dŏng bơngai tơmoi; Sư athei đei tơmam pơdơ̆ng, dah sư drơ̆ng wă huai iŏk bơngai drŏ-kăn tơmoi.

¹⁷ Tơmam sa 'ngam 'lơ̆ng đơ̆ng hơlĕnh, Mă-lei đơ̆ng rŏng kơ sa hơga 'bĕnh kơ 'bơ̆r.

¹⁸ Đơ̆ng bơtho tơ'bôh na chă đon gơh kơjăp. Năm tơblah athei đei đon pơgơ̆r hơgei.

¹⁹ Lu bơngai yak ưh kơ tơklă wă pơdah tơdrong hlơp; Thoi ei lei 'nĕ pă pơm buăl hăm bơngai 'bơ̆r 'bơ̆t 'nguaih.

²⁰ Lu bơngai hiap mĕ 'bă, Ŭnh kơđeng sư gô păt hơngăm lăm măng mu.

²¹ Mŭk tơmam mă bơ̆n jah đei blŭng-a, ưh kơ đei yua hiôk đunh ôh.

²² 'Nĕ pơma khan, tơan wă pơm kơ đe kơnê̆. Lê̆ gô mơ̆ng đơ̆ng Kră Yang, na Sư gô dŏng pơklaih ih.

²³ Plei kŏng ưh kơ trŏ, Kră Yang areh dêh; 'long kŏng kư̆ kă Kră Yang ưh kơ lăp đon.

²⁴ Kră Yang boih ba rim kơnao yak kon bơngai; Lei liơ kon bơngai mă gơh băt trong kơdih?

²⁵ Pơm hơđong kơ bơngai bu mă pơkă wă pơyơ̆r tơmam kiơ hăt hot. Đơ̆ng rŏng kơ pơkă na mă tơchĕng lăng.

²⁶ Pơtao gơh hơgei lei đei 'bôh đĭ lu bơngai kơnê̆, lê̆ jơ̆ng gre kơtĭt kơpal lu sư.

²⁷ Bơhngol lăm kon bơngai noh ŭnh kơđeng Kră Yang. Wă chă lăng păng nhơk tơ anih hlơp lăm jơhngơ̆m.

²⁸ Tơdrong 'mêm păng tơnăp tơpă mă gơh wei pơtao, Đơ̆ng 'mêm mơnat pơkơ̆ng kơjăp tang-dŏ pơtao sư.

²⁹ Tơdrong ư-ang lu tơdăm noh pran kơtang lu sư, Ư-ang kơ lu kră noh sŏk ko.

³⁰ Đơ̆ng teh rơka rơkĕch noh pơm rơgoh tơdrong kơnê̆, Tơnguĕt đe teh noh han mơ̆t truh anih hlơp lăm jơhngơ̆m.