Tơdrông Pơđơk 2 - Sơ̆p Hlabơar Nơ̆r 'Bok Kei-Dei

Tơdrong lơi yua đơ̆ng tơdrong hlôh wao

¹ Ơ dăm tơdah ih chu iŏk nơ̆r Inh pơma, Wei răk nơ̆r Inh tơtă lăm jơhngơ̆m ih,

² Tơdah đon ih mơ̆ng tơdrong gơh hơgei, Păng jơhngơ̆m ih kiơ̆ tơdrong hlôh wao.

³ Tơpă, tơdah ih chơchă tơdrong hlôh wao, Tơdah 'bơ̆r ih krao chă tơdrong hlôh.

⁴ Tơdah ih chơchă sư thoi chă jên kăk, Păng chă sư thoi tơmam gĭt khăi,

⁵ Kơplah noh ih gô băt hlôh kơ tơdrong hli yom kơ Kră Yang; Păng 'bôh tơdrong hlôh wao Kră Yang 'Bok Kei-Dei,

⁶ Yua kơ Kră Yang ăn tơdrong gơh hơgei; Đơ̆ng 'bơ̆r Sư lĕch tơdrong băt hlôh, hlôh wao.

⁷ Sư 'măn tơdrong gơh hơgei kơ bơngai tơpăt; Sư boih jing khêl pĕng kơ lu bơngai yak năm tơdrong trŏ.

⁸ Sư wei-lăng trong lu bơngai tơpăt, Sư bơwei trong lu bơngai hli yom kơ Sư.

⁹ Kơplah noh ih gô băt hlôh tơdrong tơpăt tơdrong trŏ, Tơdrong tơpăt hơnơ̆ng, rim trong 'lơ̆ng rŏ.

¹⁰ Yua kơ tơdrong gơh hơgei gô mơ̆t tơ lăm jơhngơ̆m ih, Tơdrong hlôh wao gô pơm kơ bơhngol ih hiôk chơt.

¹¹ Tơdrong băt hlôh gô wei-lăng ih, Tơdrong hlôh wao gô bơwei ih.

¹² Wă dŏng ih klaih đơ̆ng trong pơm kơnê̆, Klaih đơ̆ng lu bơngai pơma hơlĕnh pơdăr,

¹³ Klaih đơ̆ng lu bơngai achăng lê̆ trong tơpăt, kiơ̆ trong măng mu.

¹⁴ Lu bơngai hiôk chơt pơm tơdrong kơnê̆, Chhôk hal kơ trong tơdrong lu bơngai pơm kơnê̆ hơlĕnh pơdăr;

¹⁵ Lu bơngai kiơ̆ trong đŏng đĕo, Đei trong hơlĕnh hơleo kơnê̆ krưp.

¹⁶ Dŏng pơklaih ih đơ̆ng lu drŏ-kăn đi; Noh lu bơngai drŏ-kăn juăt kơ pơhlŭ đei nơ̆r rơngơp;

¹⁷ Bơngai achăng klo sư oei đơ̆ng hơmuh hơmŏng, Hiơt boih kơ nơ̆r pơgơ̆p hăm Kră Yang 'Bok Kei-Dei sư.

¹⁸ Yua kơ trong hnam sư jur tơ dêh atâu. Trong sư ba truh tơ anih bơhngol lu bơngai lôch oei.

¹⁹ Bơngai bu năm tơ sư ưh pă brŏk dơ̆ng, păng kư̆m ưh pă truh tơ tơdrong arih

²⁰ Lei na ih athei yak kiơ̆ trong lu bơngai 'lơ̆ng, Păng wei kiơ̆ trong lu bơngai tơpăt.

²¹ Yua kơ lu bơngai tơpăt gô oei tơ lăm teh đak đêl pơkă, păng lu bơngai arih sa 'lơ̆ng gô oei tơ noh ling-lang.

²² Mă-lei lu bơngai kơnê̆ đe pơlôch lê̆ đơ̆ng teh đak, Păng lu bơngai hơlĕnh pơdăr gô buch lê̆ đơ̆ng teh noh.