Tơdrông Pơđơk 19 - Sơ̆p Hlabơar Nơ̆r 'Bok Kei-Dei

¹ Bơngai dơnuh hin arih sa 'lơ̆ng tơpăt. 'Lơ̆ng hloh kơ bơngai bơlŭk pơma hơlĕnh.

² Bơngai chơgăm ră mă-lei ưh kơ đei đon hlôh kư̆m ưh kơ 'lơ̆ng. Bơngai băt hăt kơ năm kư̆m pơ̆k.

³ Bơngai kơwao kư̆m gô tơhiong trong sư. Mă-lei đei jơhngơ̆m sư hil kơ Kră Yang.

⁴ Bơngai mơdrŏng đei kơtum kơtŏng lơ. Bơngai pơmat-tat mă đei buăl đe kư̆m achăng sư.

⁵ Bơngai kơdranh hơlĕnh ưh kơ gơh klĕnh ôh đơ̆ng tơdrong phak; Bơngai pơma hơlĕnh kư̆m ưh kơ gơh klĕnh klaih.

⁶ Lơ bơngai chă tơdrong mơnat đơ̆ng bơngai hơmrah. Păng đĭ-đăng pơm buăl juăt hăm bơngai ăn đĕch.

⁷ Đĭ-đăng 'nhŏng oh bơngai dơnuh kư̆m areh kơ sư; Pơma kiơ lu buăl juăt đĕch kư̆m achăng lê̆ sư. Sư druh chă wă pơlung, tơ yơ pă 'bôh dơ̆ng lu sư.

⁸ Bu đei đon gơh hơgei wei akâu kơdih, Bu bơwei đon hlôh wao gô chă đei tơdrong pŭn hiôk.

⁹ Bu pơm kơdranh hơlĕnh ưh kơ klĕnh hlôi ôh đơ̆ng phak. Bu pơma hơlĕnh gô hiong răm.

¹⁰ Oei arih sa hiôk jơnap ưh kơ lăp trŏ ôh kơ lu bơngai kơtul kơwao. Pơma kiơ khan lu đĭch đam jing yŏng kơ lu kon pơtao.

¹¹ Bơngai gơh hơgei đei đon huay 'bônh kơ blĕk. Păng huay kơ jô̆ yo mă đe pơm yoch kơ sư.

¹² Pơtao hil nhen thoi dăm-brang grĕnh Mă-lei đei tơdrong sư mơnat thoi ngom kơpal 'nhĕt.

¹³ Kon drŏ-nglo kơtul jing pơrăm kơ 'bă sư; Akăn hrăn tơhil tơtil nhen thoi đak 'mi hngăt lĕch ling-lang.

¹⁴ Mŭk tơmam hnam oei noh đei đơ̆ng kră pơsư̆ ăn. Akăn gơh hơgei đei đơ̆ng Kră Yang asong.

¹⁵ Tơdrong alah mah pơm kơ đe tep pok. Bơngai ayơ ngôi đĕch gô pơngot.

¹⁶ Bu răk tơdrong juăt, băt wei tơdrong arih kơdih; Mă-lei bu ưh kơ bơwei oei arih sa 'lơ̆ng gô lôch.

¹⁷ Bơngai bu băt mơnat kơ bơngai dơnuh hoh, noh thoi ăn kơ Kră Yang mơng; Kră Yang pơkă wă tơwih ăn thoi tơdrong 'lơ̆ng sư pơm.

¹⁸ Bơtho hơmet bĕ kon iĕm kơplah oei đei hơmĕng; Mă-lei 'nĕ kơ đei đon wă pơlôch sư.

¹⁹ Bơngai bu hil dêh gô pŭ đe phak. Tơdah ih dŏng sư, Ih athei dŏng pơklaih sư dơ̆ng.

²⁰ Mơ̆ng bĕ nơ̆r bơtho athei, wei iŏk bĕ nơ̆r đe tơ'bôh; Wă kơ ih gơh hơgei đei đon hlôh wao đơ̆ng âu tơ anăp.

²¹ Jơhngơ̆m kon bơngai đei lơ tơdă wă pơm, Mă-lei đei tơdrong Kră Yang wă gô jing.

²² Đe wă kơ 'bôh lăm bơngai noh 'noh pơm 'lơ̆ng. Mă dơnuh hin ră mă-lei 'lơ̆ng hloh kơ bơngai hơlĕnh.

²³ Tơdrong hli yom kơ Kră Yang ba tơdrong arih. Bu đei tơdrong noh hiôk-hian hloh; ưh pă đei rŭng răng.

²⁴ Bơngai hơlah tah ti lăm chhĕr; Mă-lei oei kuă kơ tah lăm 'bơ̆r mơ̆n.

²⁵ Teh bĕ bơngai pơm kơnê̆, lê̆ kơ bơngai kơwao hŏk iŏk băt hlôh. Bơtho hơmet bĕ bơngai băt hlôh, sư 'bôh thim tơdrong gơh hơgei.

²⁶ Bơngai 'maih pơrăm 'bă, chă puh tơweh mĕ, Noh jơ̆ kon drŏ-nglo pơm mơlâu akâu kơdih.

²⁷ Ơ dăm, dah ih pơdơh pă mơ̆ng đe bơtho khan noh, Lei pơm kơ ih tơklah ataih đơ̆ng nơ̆r hlôh wao.

²⁸ Bơngai kơdranh hơlĕnh pơjăm tơdrong tơpăt; 'Bơ̆r bơngai pơm kơnê̆ luăn sa nơ̆r glăi yoch.

²⁹ Tơdrong phak 'măn boih kơ bơngai blei hiap Chă lê̆ 'long wă teh rŏng lu bơngai bơlŭk.