Tơdrông Pơđơk 16 - Sơ̆p Hlabơar Nơ̆r 'Bok Kei-Dei

¹ Tơdă wă pơm noh đơ̆ng jơhngơ̆m kon bơngai, Mă-lei đei hơpiĕt tơl tơwih noh lĕch đơ̆ng Kră Yang.

² Lu trong kon bơngai khan rơgoh 'lơ̆ng noh lĕch đơ̆ng măt kơdih akâu; Mă-lei Kră Yang lăng lăm jơhngơ̆m.

³ Jao bĕ dôm tơdrong jang ih kơ Kră Yang; Na đĭ tơdrong ih wă chă gô đei.

⁴ Kră Yang pơjing boih dôm tơmam kiơ̆ kơ Sư wă yua. Mă lu bơngai kơnê̆ Kră Yang 'măn lê̆ boih kơ năr wă pơmat.

⁵ Bu đei jơhngơ̆m pơang Kră Yang areh; Sĭt tơpă wă phak lu sư ưh kơ jor.

⁶ Đơ̆ng 'mêm băt sĭt tơdrong yoch gơh klaih; Đơ̆ng hli yom kơ Kră Yang na gơh weh đơ̆ng tơdrong kơnê̆.

⁷ Dah chăl arih bơngai bu pơhiôk Kră Yang, Na Kră Yang kư̆m ăn lu ayăt oei hiôk hăm sư.

⁸ Đei lơi tŏ sĕt đơ̆ng pơm tơpăt noh 'Lơ̆ng hloh đei tơmam lơi lơ đơ̆ng hơlĕnh.

⁹ Đon tơchĕng bơngai chă rơih trong kơdih wă; Mă-lei Kră Yang ba trong sư.

¹⁰ Nơ̆r pơtao pơma khưm khơ̆p Na sư sek tơlang huay kơ glăi.

¹¹ Plei 'long kŏng trăp trŏ hơnơ̆ng noh đơ̆ng Kră Yang. Plei kŏng trŏ hơnơ̆ng lăm 'bi noh đơ̆ng ti Sư pơm.

¹² Pơm kơnê̆ 'mê̆ 'brư̆ noh lu pơtao areh dêh; Tang-dŏ pơtao kơjăp noh đơ̆ng tơdrong tơpăt.

¹³ Nơ̆r 'bơ̆r pơma tơpăt noh pơm ăn pơtao chơt hiôk, Lu pơtao lăp đon kơ bơngai bu pơma tơpăt.

¹⁴ Tơdrong pơtao hil thoi bơngai năm roi tơbăt kơ tơdrong lôch. Mă-lei đei bơngai hơgei pơm kơ tơdrong hil ngach 'bônh.

¹⁵ Muh măt pơtao praih hơdah noh ba tơdrong arih, Tơdrong sư mơnat thoi hơmơ̆l 'mi lăm bơyan phang.

¹⁶ Iŏk tơdrong hơgei noh đei gĭt hloh kơ maih; 'Maih chă tơdrong hlôh wao noh kăl hloh kơ hu!

¹⁷ Trong lu bơngai tơpăt băt weh đơ̆ng yoch. Bu kơchăng lăng trong wei rong bơhngol sư kơdih.

¹⁸ Pơang năm adrol, hor ba tơdrong răm; Pơang pơrŏ năm adrol, pơ̆k huŏng đơ̆ng rŏng.

¹⁹ Kơtrơ̆m iŏk đon ala na oei hăm bơngai dơnuh hin, 'Lơ̆ng hloh kơ klah song tơmam tơtông tơgar hăm bơngai pơang.

²⁰ Bơngai bu chu iŏk đe bơtho gơh đei yua; Bơngai bu gơnang kơ Kră Yang gơh đei pŭn hiôk.

²¹ Bu đei đon gơh hơgei đe jô̆ bơngai hlôh wao; Nơ̆r pơma rơngơp pơtrơp thim tơdrong hlôh băt.

²² Bơngai bu gơh hơgei đei tơm tơdrong arih; Mă-lei bu kơhlôh kơwao, noh boih tơdrong phak lu sư.

²³ Jơhngơ̆m bơngai gơh hơgei đei bơtho kơ 'bơ̆r sư, Păng pơthim 'bơ̆r nơ̆r pơma đe lui.

²⁴ Nơ̆r pơma rơngơp 'ngam thoi đak sut, 'Ngam kơ bơhngol gơh klaih praih jăng kơ kơting.

²⁵ Đei minh trong kon bơngai khan 'lơ̆ng tơpăt, Mă-lei trong noh tuch-luch sư jing trong tơdrong lôch.

²⁶ Tơdrong băt pơngot pơdrŭt sư bơ̆jang. Đơ̆ng hơlŏng hrơ-hrŏk tơ'blŏk kơ chă jang sa.

²⁷ Bơngai kư̆ kă chă pơm tơdrong kơnê̆ kơ đe; 'Bơ̆r nơ̆r pơma thoi pla ŭnh soh chhông sa.

²⁸ Bơngai hơlĕnh ba tơdrong pơjah. Wă pơma plah tơklah tơduă bôl buăl.

²⁹ Lu bơngai kơnê̆ ưh kơ lê̆ pơhlŭ rông 'bôt sư, Chông sư rok trong ưh kơ 'lơ̆ng.

³⁰ Lu bơngai gơ'mreh măt băt wă chă hơlĕnh, Bơngai bu kăp mơ̆m pơŏm hơkŭng noh pơm kơnê̆ boih.

³¹ Sŏk ko jing môk ư-ang, 'Bôh đơ̆ng tơdrong jang sư tơpăt na gơh đei.

³² Bơngai bu hiơ̆ kơ blĕk Pran hloh kơ bơngai nuih kơtang. Bơngai bu kĕ wei jơhngơ̆m sư, 'Lơ̆ng hloh kơ bơngai mă nuih blah iŏk pơlei tih.

³³ Đe hlang lăng iŏk đơ̆ng kơpal tơdrơi ao. Mă-lei dôm tơdrong trŏ dah glăi tă lĕch đơ̆ng Kră Yang ngăl.