Tơdrông Pơđơk 15 - Sơ̆p Hlabơar Nơ̆r 'Bok Kei-Dei

¹ Nơ̆r tơl rơngơp chhơp ngach tơdrong hil. Nơ̆r pơma arăng pơdrŭt tơdrong blĕk.

² Hơpiĕt lu bơngai hơgei đei pơma hlôh wao; Mă-lei đei 'bơ̆r lu bơngai kơhlôh rai 'bôh kơtul.

³ Măt Kră Yang 'bôh jơ̆p-jang anih, Oei lăng lu bơngai kơnê̆ păng lu bơngai 'lơ̆ng.

⁴ Hơpiĕt pơma rơngơp noh thoi tơm 'long arih; Mă-lei đei hơpiĕt lu bơngai kơnê̆ tuĕnh jĭ pơrăm lăm jơhngơ̆m.

⁵ Bơngai kơtul kuă kơ mơ̆ng nơ̆r 'bă tơtă bơtho. Mă-lei bơngai hơgei oei mơ̆ng nơ̆r chrih bơtho.

⁶ Lăm hnam bơngai hơgei đei mŭk tơmam gĭt tih. Tơmam lu bơngai kư̆ kă tă kơ đei truh tơdrong răm.

⁷ Nơ̆r 'bơ̆r bơngai hơgei rei tơdrong hlôh wao; Mă-lei jơhngơ̆m lu kơwao ưh kơ thoi noh.

⁸ Tơmam soi lu bơngai kơnê̆ pơm 'mê̆ krưp kơ Kră Yang; Mă-lei đei nơ̆r krao khan đơ̆ng lu bơngai tơpăt Kră Yang lăp đon.

⁹ Kră Yang areh dêh trong lu bơngai kơnê̆; Mă-lei sư 'mêm mơnat kơ bơngai bu kiơ̆ trong tơpăt.

¹⁰ Phak kơtang tơpă bơngai bu kuă kơ kiơ̆ trong tơpăt; Bơngai areh kơ tơdrong teh bơtho gô lôch.

¹¹ Hơlŭng jrŭ dêh atâu lăm âu Kră Yang 'bôh đĭ; Pơma kiơ lăm jơhngơ̆m kon bơngai!

¹² Bơngai kư̆ kă kuă kơ đe chrih. Sư ưh kơ wă kuă kơ năm tơ bơngai hơgei.

¹³ Jơhngơ̆m 'nă hal thar 'bôh muh măt chơt hiôk. Mă-lei đei jơhngơ̆m sơ'ngon pơm trăp kơ jơhngơ̆m đon.

¹⁴ Jơhngơ̆m bơngai gơh hơgei oei chă tơdrong hlôh wao. Mă-lei 'bơ̆r lu bơngai kư̆ kă chă luăn sa tơdrong bơlŭk.

¹⁵ Đĭ-đăng năr lu bơngai pơmat-tat 'bôh thoi pơmat ngăl, Mă-lei đei jơhngơ̆m chơt hiôk lăng thoi et sa ling-lang.

¹⁶ Kơtrơ̆m đei mŭk tơmam tŏ sĕt, Mă-lei đei jơhngơ̆m băt hli yom kơ Kră Yang. Hloh kơ đei mŭk tơmam lơ mă-lei đei jơhngơ̆m rŭng răng.

¹⁷ Kơtrơ̆m sa săi 'nhot mă-lei oei tơ'mêm băl, Hloh kơ sa 'nhĕm rơmo bek mă-lei đei tơdrong areh băl.

¹⁸ Bơngai 'bônh kơ blĕk jing tơhil băl. Mă-lei bơngai bu hiơ̆ kơ blĕk, pơm kơ jơhngơ̆m hil 'bônh kơ ngach.

¹⁹ Trong lu bơngai hơlah lăng thoi dur jơla găn. Trong lu bơngai tơpăt măt lăng tơhnă 'lơ̆ng.

²⁰ Kon gơh hơgei đei pơm kơ 'bă sư hiôk. Kon kơ chu hil areh kơ mĕ sư.

²¹ Bơngai ưh kơ hlôh 'bôh tơdrong kơtul hiôk. Mă-lei bơngai hlôh 'bôh trong sư yak tơpăt.

²² Tơdă ưh kơ chă đon pơđâu, tơdrong ih wă pơm gô hiong; Mă-lei tơdah đei đon lơ pơđâu chơchă tơdă wă pơm gô jing.

²³ Nơ̆r tơl trŏ pơm kơ đe hiôk chơt; Nơ̆r pơma lăp kiăp trŏ 'lơ̆ng dêh.

²⁴ Trong tơdrong arih lu bơngai hơgei đei rai tŏk; Wă kơ sư gơh klaih đơ̆ng dêh atâu ala sŭng.

²⁵ Kră Yang gô teh tơhuŏng hnam lu bơngai pơang; Mă-lei sư gô bơwei hơdral teh lu drŏ-kăn adro.

²⁶ Kră Yang hil areh kơ tơdrong lu bơngai kơnê̆ wă pơm; Mă-lei đei nơ̆r 'lơ̆ng rơgoh pơm kơ Sư lăp đon.

²⁷ Bơngai ham pơm kơ hnam dơnŏ sư chhŭr nuih, Mă-lei bơngai đei areh kơ sa pơgâm gơh arih.

²⁸ Jơhngơ̆m bơngai tơpăt băt tơchĕng tơl liơ trŏ; Mă-lei đei nơ̆r lu bơngai kơnê̆ tơlĕch nơ̆r kơnê̆ kư̆ kă.

²⁹ Kră Yang ataih đơ̆ng lu bơngai pơm kơnê̆, Jê̆ păng mơ̆ng nơ̆r lu bơngai tơpăt krao apinh.

³⁰ Măt 'bôh hơdah pơm kơ đe jơhngơ̆m chơt hiôk. Tơdrong 'nao kơtơ̆ng hiôk dŏng pơklaih kơting.

³¹ Bơngai bu chu iŏk đe teh bơtho; Bơngai noh gô oei arih hơdai lu bơngai hlôh wao.

³² Bơngai bu sơngah kơ tơdrong teh bơtho, areh kơ bơhngol kơdih. Mă-lei bơngai bu chu mơ̆ng nơ̆r đe chrih bơtho, gơh đei hlôh wao.

³³ Tơdrong băt hli yom kơ Kră Yang chrih bơtho bơngai noh gô jing hơgei; Đei iŏk đon ala ba adrol tơdrong đe pơyom.