Tơdrông Pơđơk 14 - Sơ̆p Hlabơar Nơ̆r 'Bok Kei-Dei

¹ Bơngai drŏ-kăn gơh hơgei đei pơm pơjing hnam sư. Mă-lei bơngai drŏ-kăn kơwao hrăn kuăr ti noh yuih lê̆ hnam sư.

² Bơngai bu năm lăm tơdrong tơpăt băt hli yom kơ Kră Yang; Mă-lei bơngai bu pơm kiơ̆ trong tơdrong kơnê̆ areh kơ Sư.

³ Bơngai kơtul pơma thoi đei 'long sơnguĕt teh kơdŭ rŏng kơdih. Hơkŭng lu bơngai hơgei wei akâu kơdih.

⁴ Tơ yơ ưh kơ đei kơpô rơmo tơ ei bơng 'nhĕt kư̆m hoh, Mă-lei đei kĕch 'ba lơ đơ̆ng rơmo tơno choh.

⁵ Bơngai pơm kơdranh tơpăt ưh kơ băt pơma hơlĕnh; Mă-lei bơngai pơm kơdranh hơlĕnh 'bôh lĕch pơma pơdăr.

⁶ Lu bơngai blei hiap chă tơdrong gơh hơgei ưh kơ đei. Mă-lei lu bơngai hơgei chă 'bônh đĕch tơdrong hlôh wao.

⁷ Weh bĕ đơ̆ng bơngai bơlŭk Ih wă ưh kơ đei hŏk iŏk đon hơgei.

⁸ Tơdrong hơgei lu bơngai đei đon kơchăng lăng băt nhen trong kơdih; Tơdrong bơlŭk lu bơngai kơtul pơma hơlĕnh kơ jơhngơ̆m sư kơdih.

⁹ Bơngai kơhlôh 'bôh hiĕk pơjăm tơdrong huai yoch, Mă-lei đei bơngai tơpăt Kră Yang 'Bok Kei-Dei mơnat ăn.

¹⁰ Jơhngơ̆m bơ̆n đĕch băt jĭ kơ tơdrong yoch kơdih akâu, 'Nâu ưh kơ đei bu gơh klah asong tơdrong chơt hiôk kơ bơ̆n.

¹¹ Hnam lu bơngai pơm kơnê̆ đe gô pơrăm, Mă-lei đei anih bơsŭn lu bơngai tơpăt rai hiôk-hian.

¹² Đei minh pôm trong gơlong kon bơngai khan trŏ. Mă-lei tuch-luch đei tă ba tơ trong tơdrong lôch.

¹³ Mă khan kơplah oei hiĕk chơt, kư̆m đei lăm jơhngơ̆m ơh sơ'ngon. Păng tuch-luch tơdrong chơt hiôk noh jing tơdrong ơh sơ'ngon tih.

¹⁴ Jơhngơ̆m hơlĕnh gô tơ'bĕnh blĕk thoi sư pơm; Mă-lei bơngai 'lơ̆ng đơ̆ng jơ̆ng ti kơdih đei apah kiơ̆ trong sư.

¹⁵ Bơngai kơhlôh 'bôh kiơ̆ đĭ dôm nơ̆r pơma, Mă-lei lu bơngai hơgei oei lăng rim kơnao sư yak.

¹⁶ Bơngai hơgei đei đon hli păng weh ataih đơ̆ng tơdrong yoch. Mă-lei bơngai kơwao rai pơang kang ưh kơchăng.

¹⁷ Bơngai bu 'bônh kơ blĕk pơm tơdrong kơtul kơwao. Lu bơngai hơlĕnh pơdăr đe gô areh.

¹⁸ Lu bơngai kơtul gô jing bơlŭk Bơngai hơgei gô đei môk pơtao tơdrong hlôh wao.

¹⁹ Lu bơngai kơnê̆ gô bon 'bơ̆t anăp bơngai 'lơ̆ng, Păng lu bơngai kơnê̆ kuăr ti dơ̆ng 'bơ̆t 'măng jang bơngai tơpăt.

²⁰ Bơngai dơnuh răm hăm rông 'bôt kư̆m areh; Mă-lei đei lu bơngai mơdrŏng đei buăl 'mêm rai lơ.

²¹ Bơngai bu areh kơ rông 'bôt sư noh bơngai yoch; Mă-lei pŭn hiôk dêh kơ bơngai bu băt mơnat kơ bơngai dơnuh hin.

²² Hăm trŏ kơ lu bơngai wă chă đon pơm kơnê̆ noh gô wơ̆l jrok? Mă-lei đei bơngai pơđâu wă pơm 'lơ̆ng, đe gô mơnat păng jô̆ tơpăt.

²³ Dôm tơdrong jang lap gơh đei yua, Mă-lei đei nơ̆r pơma đĕch dơnuh hin.

²⁴ Môk pơtao kơ lu bơngai hơgei noh tơdrong mơdrŏng. Mă-lei tơdrong kơhlôh lu bơngai kơwao oei kơtul.

²⁵ Bơngai pơm kơdranh tơpăt băt dŏng pơklaih bơhngol đe; Mă-lei bơngai pơma hơlĕnh 'bĕnh kơ pơdăr.

²⁶ Bơngai bu hli yom kơ Kră Yang, đei tơdrong gơnang kơjăp. Păng anih kơ'nơp kơjăp kơ lu kon sâu sư.

²⁷ Yom kơ Kră Yang jing tơm tơdrong arih. Wă pơm kơ sư weh đơ̆ng hơđong tơdrong lôch.

²⁸ Kon pơlei đei lơ noh jing ư-ang kơ pơtao. Bơngai kơtuei kon pơlei tŏ sĕt noh răm kơ bơngai pơgơ̆r.

²⁹ Bu mă hiơ̆ kơ hil noh đei tơdrong hơgei tih. Mă-lei bu đei 'bônh kơ hil noh tơ'bôh tơdrong kơhlôh kơwao sư.

³⁰ Jơhngơ̆m hiôk-hian tơkan ba tơdrong arih kơ akâu jăn. Mă-lei areh hơrĕnh pơm kơting tĕnh kơ bŭk.

³¹ Bơngai bu pơjăm pơjuă bơngai dơnuh hoh noh pơjăm kơ Tơ'ngla pơjing sư; Bu mă 'mêm mơnat kơ bơngai dơnuh hoh noh ư-ang kơ Kră Yang.

³² Bơngai kơnê̆ gô răm lăm tơdrong yoch sư pơm. Mă khan oei lăm anih lôch bơngai tơpăt đei anih gơnang.

³³ Tơdrong hơgei oei lăm jơhngơ̆m bơngai hlôh wao; Mă-lei tơdrong hơgei ưh kơ oei lăm jơhngơ̆m bơngai kơtul.

³⁴ Tơdrong 'lơ̆ng tơpăt băt tơiung dêh char. Mă-lei đei tơdrong kiơ yoch pơm kơ adrĕch adrung mơlâu.

³⁵ Pơtao bơnê kơ đĭch đam tơpăt băt đon hlôh wao. Mă-lei đei hil mĭl kơ đĭch đam mă pơm kơ đe mơlâu.