Tơdrông Pơđơk 13 - Sơ̆p Hlabơar Nơ̆r 'Bok Kei-Dei

¹ Kon gơh hơgei đei đon mơ̆ng kiơ̆ nơ̆r 'bă bơtho khan. Mă-lei bơngai kơ chu lu sư ưh kơ wă mơ̆ng đe chrih bơtho.

² Bơngai 'lơ̆ng sa plei 'lơ̆ng đơ̆ng 'bơ̆r sư pơma; Mă-lei lu bơngai hơlĕnh pơdăr gô sa plei kơnê̆ đơ̆ng tơdrong kơnê̆.

³ Bơngai bu gơh wei nơ̆r kơdih, bơngai noh gơh wei tơdrong arih sư; Bơngai bu ha 'bơ̆r kư̆ kă tă kơ răm ngăl.

⁴ Bơhngol bơngai alah hơpơi wă tă kơ hoh-hoy; Bơhngol bơngai pơnam tơmam mah rơkah rơkai.

⁵ Bơngai tơpăt băt areh kơ nơ̆r hơlĕnh; Bơngai kơnê̆ pơm trŏ kơ mơlâu hlơ̆l lĕm.

⁶ Tơdrong tơpăt băt wei bơngai oei sa 'lơ̆ng tơpăt Mă-lei tơdrong kơnê̆ teh pơrăm lê̆ lu bơngai pơm kư̆ kă.

⁷ Đei mơ'nah pơrŏ pơm mơdrŏng, mă-lei ưh kơ đei kiơ. Đei mơ'nah pơm dơnuh hin, mă-lei đei mŭk tơmam lơ.

⁸ Bơngai mơdrŏng gơh dŏng tơdrong arih sư; Lu bơngai dơnuh ưh kơ hli nơ̆r đe tơă.

⁹ Ŭnh kơđeng lu bơngai tơpăt pơchrang hơdah; Gah ŭnh kơđeng lu bơngai kơnê̆ păt đĭ.

¹⁰ Tơdrong pơang lĕch tơdrong pơjah; Gah tơdrong hơgei oei lăm bơngai băt mơ̆ng đe bơtho khan.

¹¹ Mŭk tơmam mơdrŏng đơ̆ng iŏk sa pơgâm gô hiong huach. Mă-lei đei bu băt mong măi 'net 'net gô đei rai lơ.

¹² Tơdrong chang gô hiơ̆ kơ đei lei pơm kơ jơhngơ̆m jĭ; Bĭ tơdrong hơpơi đei hloi thoi tơnơm 'long tơdrong arih.

¹³ Bơngai sơngah tơdrong bơtho, to sư gô hiong răm; Mă-lei bơngai đei bu pơyom kơ nơ̆r tơtă gô apah bơnê.

¹⁴ Tơdrong bơtho đơ̆ng lu bơngai hơgei 'nei boih tơm tơdrong arih. Pơm kơ đe weh ataih klaih đơ̆ng hơđong tơdrong lôch.

¹⁵ Tơdrong hlôh wao tơpă mă đei mơnat; Mă-lei tơdrong lu bơngai pơm yoch gô pơmat-tat.

¹⁶ Bơngai hơgei đei pơm kiơ̆ đon hlôh wao; Gah lu bơngai kơhlôh tơ'bôh tơdrong kơtul sư.

¹⁷ Bơngai pơtruh tơdrong kơnê̆ gô tơ'bơ̆p tơdrong răm. Mă-lei bơngai pơtruh tơpăt băt ba tơdrong ming klaih jĭ.

¹⁸ Bơngai bu sơngah kơ tơdrong bơtho pơhrăm gô dơnuh hin păng mơlâu; Mă-lei bơngai bu đei đon iŏk đe chrih bơtho đe gô pơyom.

¹⁹ Tơdrong hơpơi wă chă đei lei pơm kơ bơhngol rơngơp; Gah lu bơngai kơnê̆ wă lê̆ tơdrong yoch tơnat pat tơpă kơ lu bơngai kơhlôh.

²⁰ Bơngai bu pơm buăl juăt hăm bơngai hơgei gô gơh hơgei. Mă-lei bơngai bu pơm buăl juăt hăm bơngai kơtul kơwao gô răm.

²¹ Tơdrong pơmat-tat druh lu bơngai yoch. Mă-lei bơngai tơpăt đei apah pŭn hiôk.

²² Bơngai 'lơ̆ng mong tơmam ăn kơ lu kon sâu sư. Mă-lei bơngai kơnê̆ lê̆ tơmam sư kơ lu bơngai tơpăt.

²³ Mir na bơngai dơnuh hin đei plei sŏng sa mah rơkah rơkai; Bơngai bu yua kư̆ kă, mă tơhiong lê̆ đĭ-đăng.

²⁴ Bơngai bu ưh kơ đei chĕp 'long teh bơtho kon drŏ-nglo sư noh areh kơ kon sư. Mă-lei đei bu 'mêm kơ kon athei khŏm teh bơtho sư.

²⁵ Bơngai tơpăt đei tơmam sŏng sa phĭ mah Mă-lei đei klak lu bơngai kơnê̆ gô pơngot.