Tơdrông Pơđơk 11 - Sơ̆p Hlabơar Nơ̆r 'Bok Kei-Dei

¹ Kră Yang ưh kơ lăp ôh kơ 'long kŏng sa pơgâm. Mă-lei plei kŏng trŏ noh sư lăp đon.

² Mưh tơdrong pơang truh, duh đei hloi tơdrong mơlâu. Mă-lei tơdrong hơgei oei ling-lang lăm bơngai iŏk đon ala.

³ Tơdrong 'lơ̆ng lu bơngai tơpăt băt dui ba lu sư. Mă-lei tơdrong hơlĕnh pơdăr lu bơngai kơnê̆ gô pơrăm lu sư.

⁴ Mŭk tơmam mơdrŏng ưh kơ yua kiơ lăm năr hil blĕk, Mă-lei đei đon tơpăt pơklaih đơ̆ng tơdrong lôch.

⁵ Lu bơngai tơpăt 'lơ̆ng gô dơ̆ng tơpăt lăm trong lu sư, Mă-lei lu bơngai kơnê̆ gô pơ̆k huŏng lăm tơdrong kơnê̆ lu sư.

⁶ Tơdrong 'lơ̆ng lu bơngai tơpăt gô pơklaih lu sư; Mă-lei bơngai đŏng đĕo pơm kơ lu sư kơdih 'leh hơđong.

⁷ Mưh lu bơngai kơnê̆ lôch, tơdrong sư chang hơmĕng pă đei. Păng tơdrong lu sư chang gô hoh-hoy.

⁸ Bơngai tơpăt gô đei dŏng pơklaih đơ̆ng tơdrong pơmat-tat; Mă-lei gô đei tơdrong pơmat-tat truh tơ lu bơngai pơm kơnê̆.

⁹ Bơngai kơnê̆ pơma wă pơrăm lu rông 'bôt sư, Mă-lei lu bơngai hơgei đei đon tơpăt gơh klaih.

¹⁰ Kơplah lu bơngai tơpăt mơdrŏng, đĭ lu pơlei tih đei chơt hiôk. Mă-lei đei bơngai kơnê̆ hiong răm, đe gô jreo chơt hiôk.

¹¹ Minh pơlei đei pŭn hiôk 'lơ̆ng đơ̆ng lu bơngai tơpăt, Mă-lei đơ̆ng 'bơ̆r lu bơngai kơnê̆ tơhuŏng lê̆ lu sư.

¹² Bơngai bu ưh kơ lăng păng pơjăm rông 'bôt, bơngai noh ưh kơ đei đon hlôh. Mă-lei lu bơngai gơh hơgei oei ngăn hreh.

¹³ Bơngai bu ngăl juăt pơma 'bơ̆r lơ, pơdah tơdrong hlơp. Mă-lei bơngai bu đei đon tơpăt băt ôn hlơp tôm tơdrong.

¹⁴ Ưh kơ đei bơtho tơ'bôh lu kon pơlei gô huŏng, Mă-lei tơdah đei bơngai pơđâu chă đon kon pơlei kĕ jei.

¹⁵ Bơngai bu chu iŏk bơngai tơmoi nai, bơngai noh gô răm, Mă-lei bơngai bu areh kơ sơng iŏk noh, gô đei oei rơnŭk.

¹⁶ Đe gô pơyom kơ bơngai drŏ-kăn ayơ đei đon mơnat. Mă-lei bơngai drŏ-nglo nuih pơm kơnê̆ lăp đei mơdrŏng đĕch.

¹⁷ Bơngai iơ̆m dim thim hiôk kơ bơhngol sư; Mă-lei lu bơngai pơm kơnê̆ gô pơrăm sĕch akar sư.

¹⁸ Bơngai pơm kơnê̆ sa apah đơ̆ng tơdrong hơlĕnh; Mă-lei lu bơngai pơm 'lơ̆ng đei tơdrong apah sĭt.

¹⁹ Bơngai bu đei jơhngơ̆m arih sa 'lơ̆ng tơpăt gô đei arih; Mă-lei gah lu bơngai kư̆ kă chă tơdrong kơnê̆ gô lôch.

²⁰ Kră Yang areh kơ bơngai đei jơhngơ̆m kư̆ kă. Mă-lei bơngai bu đei jơhngơ̆m tơpăt noh pơm kơ Sư lăp đon.

²¹ Ăn kơ ih băt, lu bơngai kơnê̆ ưh kơ lê̆ jor ôh kơ phak; Mă-lei adrĕch lu bơngai 'lơ̆ng tơpăt gô klaih.

²² Bơngai drŏ-kăn 'lơ̆ng hơbŏ ưh kơ wao, kư̆m thoi kong 'maih tơ'băk kơ muh nhŭng.

²³ Lu bơngai tơpăt hơpơi wă tă kơ 'lơ̆ng ngăl; Mă-lei lu bơngai kơnê̆ chang gô noh đei hil mĭl.

²⁴ Bơngai bu đei đon hơmrah, gô rai mơdrŏng dêh. Bơngai bu kret pơ'met rai kơmah kơ'bah rai dêh.

²⁵ Bơngai bu hơmrah gô đei tôm mah, Bơngai tơgŭm đe đei đe tơgŭm sư mơ̆n.

²⁶ Bơngai bu mong 'ba sa kơdih, kon pơlei blei hiap, Mă-lei bơngai bu đei tĕch 'ba gô sơkat ăn pŭn hiôk.

²⁷ Bơngai bu chă tơdrong 'lơ̆ng gô đei tơdrong hiôk, Mă-lei bơngai bu wă chă tơdrong kơnê̆ gô đei tơdrong kơnê̆ truh.

²⁸ Bơngai bu gơnang kơ mŭk tơmam mơdrŏng gô huŏng răm; Mă-lei đei bu tơpăt băt rai 'lơ̆ng thoi tơmơ̆ng hla hơdrih.

²⁹ Bơngai bu pơrŭng hnam dơnŏ sư gô pŭ kial 'biao ưh kơ đei kiơ. Lu bơngai kơhlôh kơwao gô jing đĭch kơ bơngai gơh hơgei đei hlôh wao.

³⁰ Bơngai 'lơ̆ng tơpăt gô đei nhen thoi tơnơm 'long arih, Bơngai gơh hơgei đei dŏng bơhngol đe.

³¹ Bơngai 'lơ̆ng tơpăt, Kră Yang gô apah bơnê kơpal teh. Pơma kiơ kơ lu bơngai pơm kơnê̆ pơm yoch gô phak ngei.