Tơdrông Pơđơk 10 - Sơ̆p Hlabơar Nơ̆r 'Bok Kei-Dei

Tơdrong pơtao Sôlômôn pơđơ̆k

¹ Kon drŏ-nglo gơh hơgei đei pơhiôk kơ 'bă sư. Mă-lei đei kon kơhlôh kơwao pơm kơ mĕ sư sơ'ngon.

² Mŭk tơmam đei đơ̆ng pơm kư̆ kă ưh kơ yua kiơ; Mă-lei đei tơdrong tơpăt gơh klaih đơ̆ng lôch.

³ Kră Yang ưh kơ lê̆ ôh lu bơngai tơpăt pơngot rơwĕt. Mă-lei sư sơngah tơdrong bơngai kư̆ kă wă.

⁴ Ti lu bơngai jang alah apah jing dơnuh hin. Ti lu bơngai pơnam đei mŭk tơmam mơdrŏng.

⁵ Bu băt mong 'măn lê̆ lăm bơyan phang noh boih bơngai kon drŏ-nglo gơh hơgei; Mă-lei đei bơngai kon drŏ-nglo ayơ tep bơyan kĕch pŭ iŏk tơdrong mơlâu.

⁶ Tơdrong pŭn hiôk pôk dan kơpal kơ̆l lu bơngai tơpăt; Mă-lei lăm 'bơ̆r lu bơngai kơnê̆ ôn tơdrong kơnê̆.

⁷ Tơdrong 'blŏk kơ lu bơngai tơpăt noh pŭn hiôk, Mă-lei anăn lu bơngai kơnê̆ ôm hach.

⁸ Bơngai bu đei đon gơh hơgei đei chu nơ̆r tơtă. Mă-lei 'bơ̆r lu bơngai kơwao gô hiong tôch.

⁹ Bơngai bu năm kiơ̆ trong tơpăt băt yak hiôk-hian. Mă-lei bơngai bu yak kiơ̆ trong đŏng gô pơmat.

¹⁰ Bơngai bu gơ'mreh măt wă pơm kơnê̆ kơ đe, Păng hơkŭng 'bơ̆r bơngai kơhlôh 'bôh tơdrong răm.

¹¹ Nơ̆r đơ̆ng 'bơ̆r lu bơngai tơpăt noh boih tơm tơdrong arih; Mă-lei 'bơ̆r lu bơngai pơm kơnê̆ ôn tơdrong kơnê̆.

¹² Tơdrong areh jing tơdrong tơhil; Mă-lei đei tơdrong 'mêm mơnat 'bŭ đĭ lu tơdrong yoch.

¹³ Tơdrong gơh hơgei đei 'bôh lăm 'bơ̆r bơngai hlôh, mă-lei đei sơnguĕt teh rŏng lu bơngai kơwao.

¹⁴ Lu bơngai gơh hơgei đei răt mong tơdrong hlôh wao lơ. Mă-lei 'bơ̆r lu bơngai kơtul kơwao ba tơdrong truh răm.

¹⁵ Mŭk tơmam bơngai mơdrŏng jing thoi kơđông kơjăp kơ sư, Mă-lei tơdrong hiong răm kơ bơngai dơnuh hoh noh tơdrong dơnuh hin kơ lu sư.

¹⁶ Hrat gleh lu bơngai tơpăt noh ba tơdrong arih; Mă-lei lơi yua lu bơngai kơnê̆ noh tơdrong yoch.

¹⁷ Bu mơ̆ng pơhrăm iŏk nơ̆r bơtho oei lăm trong tơdrong arih; Mă-lei bơngai bu sơngah kơ tơdrong chrih bơtho gô hiong.

¹⁸ Bơngai bu ôn tơdrong hil areh gô lĕch nơ̆r 'bơ̆r pơma hơlĕnh. Păng bơngai bu chă roi sa jing bơngai kơtul.

¹⁹ Pơma lơ, tơ yơ mă huay kơ glăi. Bơngai bu kĕ wei hơpiĕt noh bơngai hơgei.

²⁰ Hơpiĕt lu bơngai tơpăt thoi hu rơgoh, Jơhngơ̆m lu bơngai kơnê̆ ưh kơ yua kiơ.

²¹ Nơ̆r 'bơ̆r lu bơngai tơpăt rong arih lơ bơngai; Mă-lei lu bơngai kơwao lôch, yua kơ ưh kơ hlôh.

²² Pŭn hiôk đơ̆ng Kră Yang ba ăn mơdrŏng; Sư ưh kơ đei thim tơdrong sơ'ngon ôh.

²³ Lu bơngai kơwao lăng tơdrong pơm kơnê̆ thoi hơnul; Mă-lei bơngai hơgei 'maih đei chơt hiôk lăm tơdrong hlôh wao.

²⁴ Tơdrong kiơ lu bơngai kơnê̆ hli hơmơt gô đei truh kơ sư tơpă. Mă-lei lu bơngai tơpăt gô đei thoi sư hơpơi wă.

²⁵ Tơdah hơbŭt truh, lu bơngai pơm kơnê̆ ưh pă đei dơ̆ng; Mă-lei lu bơngai pơm 'lơ̆ng hơnă jrăng oei đei ling-lang.

²⁶ Đak iŭ pơm kơ hơnĕnh hơker, thoi 'nhui pơm kơ măt hang, Lu bơngai hơlah sơngah kơ bơngai wơh sư thoi noh.

²⁷ Tơdrong hli yom kơ Kră Yang ba thim khei năr; Mă-lei khei sơnăm lu bơngai pơm kơnê̆ gô rai djăl.

²⁸ Tơdrong chang hơmĕng lu bơngai tơpăt băt đei chơt hiôk. Mă-lei tơdrong lu bơngai pơm kơnê̆ hơpơi ưh kơ đei.

²⁹ Trong Kră Yang kơđông kơjăp kơ bơngai tơpăt. Mă-lei đei tơdrong răm lăm lu bơngai pơm kơnê̆.

³⁰ Bơngai tơpăt ưh kơ đei hli kơ kiơ; Mă-lei bơngai kơnê̆ pă gơh oei lăm teh.

³¹ Nơ̆r 'bơ̆r bơngai tơpăt lĕch tơdrong gơh hơgei, Mă-lei đei hơpiĕt lu bơngai pơma kư̆ kă gô kăt lê̆.

³² Nơ̆r 'bơ̆r bơngai tơpăt băt tơdrong trŏ 'lơ̆ng; Mă-lei đei nơ̆r 'bơ̆r lu bơngai kơnê̆ lăp băt pơma hơlĕnh đĕch.