Tit 1 - Sơ̆p Hlabơar Nơ̆r 'Bok Kei-Dei

Pơih nơ̆r pơma

^1-4 Pôl chih hơpong kơ Tĭt. Hmach kơ ih, dăm. Ih kon inh tơpă kơlih kơ ih lui kơ Kră Yang Yêsu đơ̆ng inh bơtho ih sơ̆. Inh boih đĭch đam 'Bok Kei-Dei păng jơ̆ng 'bang Yêsu Krist. 'Bok Kei-Dei wơh inh bơtho kon bơngai đêl Sư rơih iŏk wă kơ lu sư lui kơ Sư păng wă tơbăt ăn kơ lu sư tơdrong Sư, na lu sư gơh pơm tơdrong 'lơ̆ng tơpăt. Thoi noh na lu sư gô arih ling-lang. 'Bok Kei-Dei ưh kơ hơlĕnh ôh. Đơ̆ng blŭng-a sơ̆, đơ̆ng Sư tam mă pơjing plĕnh teh, đơ̆ng noh boih Sư pơkă khan gô ăn kơ bơ̆n arih ling-lang. Na truh sơnăm Sư boih, na Sư pơtruh ăn kơ bơ̆n tơdrong 'nao 'lơ̆ng Sư wă ăn kơ bơ̆n arih ling-lang. Thoi noh boih 'Bok Kei-Dei dŏng pơklaih bơ̆n. Kư̆m Sư boih athei inh bơtho tơdrong 'nao 'lơ̆ng Sư. Ơ dăm, inh krao khan apinh 'Bă tơm bơ̆n 'Bok Kei-Dei hăm 'Bok Dŏng Pơklaih bơ̆n Yêsu Krist wei-lăng ih tôm tơdrong wă kơ Sư ăn kơ ih hiôk-hian ling-lang.

Pôl wă kơ Tĭt rơih chă kră wei-lăng bơngai lui

⁵ Lăp ba tơklah băl đơ̆ng bŏl đak Kret ki, inh pơkă kơ ih kư̆ kơ oei tơ noh wă kơ ih jang mă keh dôm tơdrong inh jang ưh kơ tam keh. Inh wă kơ ih rơih chă lu bơngai lui wă pơm kră wei-lăng bơngai lui tơ rim pơlei, kư̆m thoi inh pơkă kơ ih ki.

⁶ Inh wă kơ ih rơih chă lu bơngai lui trŏ thoi âu: Bơngai bu đon 'lơ̆ng tơpăt mă đe ưh kơ lah bâu roi sư; păng sư bơngai iŏk akăn minh, kon sư kư̆m lui kơ 'Bok Kei-Dei mơ̆n; lu kon sư mă ưh kơ pơm kư̆ kă, sư băt chu yom kơ mĕ 'bă sư, hăm chu yom kơ 'Bok Kei-Dei đĕch.

⁷ Bơngai bu mă pơm kră wei-lăng lu bơngai lui sư athei pơm mă 'lơ̆ng 'nĕ kơ pơm yoch hŏ, kơlih kơ sư pơm kră wei-lăng tơdrong 'Bok Kei-Dei. Lu bơngai pơang akâu kơdih, lu bơngai khĕnh, lu bơngai et sik suai, dah lu bơngai tôn teh đe, dah sư hưch hanh kơ sa jên lơ păng trŏ tơdrong jang sư mă-lei pơgŏ athei iŏk jên đe, lu bơngai thoi noh ưh kơ gơh pơm kră wei-lăng lu bơngai lui ôh.

⁸ Bơngai bu pơm kră bơngai lui, năr tơmoi truh tơ sư, sư tơkan sơng iŏk atŏk tơ hnam sư. Păng sư lăp đon kơ tơdrong 'lơ̆ng tơdrong kiơ̆ trŏ. Sư pơm đon chơ̆n. Sư đei đon 'lơ̆ng tơpăt păng 'Bok Kei-Dei hăm bôl buăl mơ̆n,

⁹ sư bơtho tơdrong 'Bok Kei-Dei 'blep trŏ nơ̆r 'Bok Kei-Dei tơpă. Thoi noh đe anăn sư gơh bơtho trŏ tơdrong 'Bok Kei-Dei păng sư gơh pơjah pơjăng păng lu bơngai mă ưh kơ lui ayăt tơdrong sư bơtho.

Lu bơngai bơtho kư̆ kă

¹⁰ Đei lơ bơngai ưh kơ chu lui tơdrong bơ̆n bơtho. Lu sư pơma bơtho ưh kơ yua kiơ, sư pơma pơsôm kơ đe đĕch. Mă loi bơngai Juđê boih mơ'nah, sư khan sư lui kơ Kră Yang Yêsu Krist boih mă sư oei pơm thoi noh.

¹¹ Ih athei khă lu sư 'nĕ pă pơm thoi noh dơ̆ng. Đei hnam dơnŏ mơ'nah mơ̆ng sư bơtho na đĭ kơ hnam dơnŏ sư jing hơwơ̆l kơ tơdrong 'Bok Kei-Dei na achăng lê̆ tơdrong lui sư. Lu đe ei sư bơtho tơdrong ưh kơ trŏ kơ tơdrong bơtho. Lu sư bơtho thoi noh, lu sư wă kơ gơh iŏk jên đe đĕch.

¹² Âu minh 'nu 'bok thây 'lơ̆ng oei tơ bŏl đak Kret sơ̆, sư bơtho pơhil kơ lu buăl sư kơlih kơ lu buăl sư bơngai kơchu, sư khan: “Nhôn bơngai tơring đak Kret hơlĕnh plơ̆ plĕch kơ đe. Nhôn 'maih chă tơdrong blah 'bet đe. Nhôn bơngai sa dư păng alah kơ jang.”

¹³ Sư bơtho khan thoi noh trŏ tơpă. Na ih athei khă lu sư 'nĕ pă bơtho tơdrong kư̆ kă, wă kơ lu sư jah lui mă kơjăp.

¹⁴ Păng ih khan kơ lu sư 'nĕ pă lui kơ tơdrong hơ'mon lu bơngai Juđê. Athei lu sư hŭt đĭ lu tơdrong 'noh yua kơ tơdrong 'noh đơ̆ng kon bơngai tơchĕng đĕch. Kơlih kơ bơngai mă nŏng bơtho đe hơ'mon 'noh sư hŭt lê̆ tơdrong 'Bok Kei-Dei boih.

¹⁵ Bơngai bu đei đon 'lơ̆ng tơpăt, sư huay kơ tơchĕng kơ tơdrong giĕng ôh yua kơ sư pơm tôm tơdrong 'lơ̆ng tơpăt ngăl. Bơngai bu yoch ưh kơ wă lui kơ 'Bok Kei-Dei, bơngai 'noh mă sư kiơ̆ tơdrong giĕng mă ưh, sư ưh kơ đei layơ pơm tơdrong 'lơ̆ng, kơlih kơ đon sư lơ kơnê̆ tơpă.

¹⁶ Lu bơngai bơtho hơ'mon tơdrong bơngai Juđê 'noh sư khan sư lui kơ 'Bok Kei-Dei boih mă-lei sư ưh kơ kiơ̆ tơdrong 'Bok Kei-Dei wă. Đon lu sư thoi noh, bơ̆n băt lu sư tam mă lui tơpă. 'Bok Kei-Dei ưh kơ lăp đon kơ tơdrong lu sư pơm ôh. Lu sư bơngai kơnê̆ krưp ưh kơ chu. Lu sư ưh kơ đei pơm minh tơdrong kiơ 'lơ̆ng thoi yơ.