Sa 6 - Sơ̆p Hlabơar Nơ̆r 'Bok Kei-Dei

Tơdrong tơ'bôh gah puăn tŏ gre aseh. Nơ̆r pơkă gah pơjing hnam akŭm

¹ Inh ngơk lăng dơ̆ng na 'bôh puăn tŏ gre aseh lĕch đơ̆ng sơlam kông. Kông noh kông hu.

² Gre aseh mă minh noh aseh 'brê, gre aseh mă 'bar noh aseh găm.*

³ Gre aseh mă pêng noh aseh kok, đơ̆ng noh gre aseh mă puăn noh aseh brông drơ̆k-drơ̆l.*

⁴ Đơ̆ng noh inh apinh linh jang 'lơ̆ng mă oei pơma dơnuh hăm inh: “Ơ yŏng inh! Lu 'nâu wă pơtih kơ kiơ?”

⁵ Linh jang khan dơ̆ng kơ inh: “Noh kiala đơ̆ng plĕnh, lĕch đơ̆ng lăm anih lu sư 'bơ̆t anăp Kră Yang mă Kră Yang kơ đĭ-đăng teh đak.

⁶ Gre mă đei aseh găm sư dui gre năm tơ gah yă-nơ̆m, gre mă aseh kok năm tơpăt tơ gah bơmơ̆t, đơ̆ng noh aseh brông drơ̆k-drơ̆l năm tơklă tơ gah gơal.”

⁷ Đơ̆ng rŏng kơ noh đei lu aseh pran lĕch wă năm dăr juang jơ̆p kơ teh đak, Sư khan: “Năm bĕ, lăng teh đak.” Đơ̆ng noh, lu sư năm chă lăng teh đak.

⁸ Đơ̆ng noh sư krao inh: “'Nâu, lu aseh năm tơ gah yă-nơ̆m, ăn kơ Yang Bơhngol Inh oei pơdơh tơ gah yă-nơ̆m noh.”

Tơdrong pơyơ̆l ăn môk pơtao kơ Jôsua tơdrong pơđơ̆k

⁹ Đơ̆ng Kră Yang khan kơ inh:

¹⁰ “Iŏk bĕ jên dah maih đơ̆ng lu adrĕch Helđai, Tôbia păng Jêđaia, lu bơngai bơnă mă đơ̆ng Babilôn, kư̆m lăm năr noh mơ̆n năm bĕ tơ hnam Jôsia kon drŏ-nglo Sêphania.

¹¹ Iŏk jên dah maih đơ̆ng sư, pơm bĕ minh tŏ môk pơtao na pơyơ̆l ăn bĕ tơ kơ̆l Jôsua 'bok soi tơm kon dăm Jêhôsađak.

¹² Khan bĕ kơ sư, Kră Yang Tih hloh khan: ‘'Nâu, đei minh 'nu anăn dơ̆ng, sư gô chăt đơ̆ng ih păng bơngai noh gô pơjing hnam kơkuh kơ Kră Yang.

¹³ Sư boih wă man hnam kơkuh kơ Kră Yang; păng sư boih đe gô ư-ang, oei pơgơ̆r tơ anih tang-dŏ pơtao sư păng pơm 'bok soi tơm tơ anih pơtao sư, sư kư̆m pơgơ̆p hiôk-hian kơ 'bar tơdrong noh.’

¹⁴ Môk pơtao gô oei lăm Hnam Kră Yang jing tơmam wă kơ 'blŏk hơdơ̆r kơ Helđai, Tôbia, Jêđaia păng Hen kon dăm Sêphania.”

¹⁵ Lu bơngai đơ̆ng ataih năm păng tơgŭm pơjing pơdơ̆ng hnam Kră Yang; păng ih gô băt Kră Yang Tih hloh wơh boih inh năm tơ âu. Tơdah ih chơgăm pơnam pơm kiơ̆ nơ̆r Kră Yang 'Bok Kei-Dei ih, na tơdrong noh gô truh.