Sa 5 - Sơ̆p Hlabơar Nơ̆r 'Bok Kei-Dei

'Bôh sơ̆p hla bơar đông, bơngai drŏ-kăn păng epha

¹ Inh ngơk păng bơyar măt inh lăng dơ̆ng, na 'bôh đei minh sơ̆p hla bơar akar đông!

² Sư khan kơ inh: “Ih 'bôh kiơ?” Inh tơl sư: “Inh 'bôh đei sơ̆p hla bơar akar oei đông, să tor sư 'bar-jĭt plaih, wơ̆l sư mơjĭt plaih.”

³ Đơ̆ng noh sư khan kơ inh: “'Nâu jing tơdrong hiap pơtê̆ jơ̆p-jang kơ teh đak; yua kơ kiơ̆ kơ sơ̆p hla bơar đei chih boih tơ gah minh pah, rim 'nu bơngai bu mă tơtông klĕ đe gô pơrăm lê̆ sư, đơ̆ng noh kư̆m kiơ̆ kơ hla bơar đei chih tơ minh pah nai dơ̆ng bơngai bu mă kăt tơdra hơkar hơlĕnh đe kư̆m gô pơrăm lê̆ sư.”

⁴ Kră Yang Tih Hloh khan: “Inh gô wơh sơ̆p hla bơar âu năm, đơ̆ng noh sư gô mơ̆t tơ lăm hnam lu bơngai tơtông păng tơ hnam lu bơngai pơkă hơlĕnh; thoi noh sư oei hloi tơ lăm hnam lu đe noh păng sư gô pơrăm lê̆ hnam noh, mă khan pơm păng 'long dah păng tơmo.”

⁵ Linh jang mă pơma hăm inh lĕch weh păng khan kơ inh thoi âu: “Dang ei ih ngơk lăng 'bôh kiơ lĕch to.”

⁶ Inh khan: “Noh kiơ?” Sư tơl inh thoi âu: “Noh boih jơ̆ minh pôm ephaa lĕch.” Sư khan kơ inh dơ̆ng: “Noh rup tơdrong kơnê̆ lu sư tơ jơ̆p-jang kơ teh đak.”

⁷ Đơ̆ng noh, inh 'bôh minh kơtuăl bơlơ̆k đei pôk hơtŏk lê̆ păng đei minh 'nu drŏ-kăn hơ-oei lăm epha.

⁸ Sư khan thoi âu: “Noh tơdrong kơnê̆.” Đơ̆ng noh đe tơlơ̆ sư tơ lăm epha dơ̆ng păng tơhuŏng kơtuăl bơlơ̆k noh klơ̆p lê̆ 'măng epha.

⁹ Đơ̆ng noh inh ngơk lăng, 'nâu, đei 'bar 'nu drŏ-kăn lĕch, tơklă anăp inh. Đei kial đơ̆ng lăm pơnăr lu sư, na lu sư đei pơnăr thoi pơnăr klang kok; păng lu bơngai pôk epha dan tŏk-bŏk teh hăm plĕnh.

¹⁰ Inh apinh linh jang mă pơma hăm inh: “Lu sư pôk chĕp ba epha năm tơ yơ?”

¹¹ Sư tơl inh thoi âu: “Noh jơ̆ wă pơjing ăn hnam kơ epha tơ lăm dêh char Sinar, mưh đei hơmet lê̆ keh boih na dan sư tơ anih đêl sư noh.”