Sa 4 - Sơ̆p Hlabơar Nơ̆r 'Bok Kei-Dei

Tơdrong tơ'bôh gah jơ̆ng ŭnh kơđeng maih păng 'bar tơnơm 'long ôliwơ

¹ Đơ̆ng noh ling jang khan hăm inh, wơ̆t râu tơiung inh dơ̆ng, thoi minh 'nu bơngai oei tep na râu tơiung sư.

² Sư khan kơ inh: “Ih 'bôh kiơ?” Inh tơl: “To inh 'bôh boih minh pôm jơ̆ng ŭnh kơđeng pơm păng maih ngăl păng đei minh hlak pơnhan chhĕr kơpal sư, đei tơpơh tŏ pla ŭnh kơđeng, đei tơpơh tŏ đing kơ rim kơpal ŭnh kơđeng noh.

³ 'Bơ̆t cheng sư đei 'bar tơnơm 'long ôliwơ, minh tơnơm gah 'ma kơ pơnhan chhĕr păng minh pôm gah 'ngiĕo.”*

⁴ Inh apinh linh jang mă oei pơma hăm inh thoi âu: “Ơ yŏng inh, dôm tơdrong âu wă khan kiơ?”

⁵ Linh jang ei khan kơ inh thoi âu: “Ih ưh kơ băt dôm tơdrong 'nâu wă khan kiơ hă?” Inh khan: “Ơ yŏng inh! Inh ưh kơ băt.”

⁶ Sư tơl inh: “'Nâu jơ̆ nơ̆r Kră Yang khan kơ Sôrôbabel, thoi âu: ‘Noh ưh kơ sĭ đơ̆ng tơdrong gơh hơgei, kư̆m ưh kơ sĭ đơ̆ng tơdrong pran kơtang ôh, mă-lei đơ̆ng Yang Bơhngol 'Lơ̆ng Inh.’ Kră Yang Tih Hloh khan thoi noh.*

⁷ Ơ kông tih ih bu? 'Bơ̆t anăp Sôrôbabel ih gô jing teh dơhnă đe gô anhăk lê̆ tơmo mă kơpal hloh noh tơ nai, gô đei nơ̆r đe ôr krao thoi âu: ‘Apinh tơdrong mơnat, mơnat ăn kơ sư!’ ”

⁸ Đơ̆ng noh đei dơ̆ng nơ̆r Kră Yang khan kơ inh.

⁹ “Đơ̆ng ti Sôrôbabel đei pơjing hnam 'nâu păng ti sư kư̆m gô pơm keh mơ̆n.” Kơplah noh ih gô băt Kră Yang Tih Hloh đei wơh inh năm tơ lu iĕm.

¹⁰ Yua kơ bu pơ̆n pơjăm kơ năr tơdrong iĕ âu? Sư gô chơt hiôk 'bôh tơlei dăng pơtŏ 'bơ̆t ti Sôrôbabel.* Đei tơpơh tŏ măt 'nâu măt Kră Yang năm tơmang lăng jơ̆p kơ teh đak.

¹¹ Inh tơl sư thoi âu: “'Bar tơnơm 'long ôliwơ minh tơnơm gah 'ma minh tơnơm gah 'ngiĕo kơ jơ̆ng ŭnh kơđeng noh wă khan kiơ?”

¹² Inh apinh sư mă 'bar dơ̆ng thoi âu: “'Bar tŏ dơng ôliwơ 'bar pah kơ đing maih, đei đak maih ro, noh wă khan kiơ?”

¹³ Sư tơl inh thoi âu: “Ih ưh kơ băt noh khan kiơ hă?” Inh drơ̆ng: “Ơ Yŏng inh, inh ưh kơ băt.”

¹⁴ Sư khan thoi âu: “Noh wă khan đei 'bar 'nu chu tuh đak rơmă, dơ̆ng cheng 'bơ̆t Kră Yang mă Yang kơ đĭ-đăng teh đak.”