Sa 10 - Sơ̆p Hlabơar Nơ̆r 'Bok Kei-Dei

Tơdrong dŏng pơklaih đơ̆ng Kră Yang 'Bok Kei-Dei. Isơrael gô pơjing dơ̆ng teh đak sư kơdih

¹ Apinh bĕ đak 'mi đơ̆ng Kră Yang kơplah bơyan 'mi wă tôch, na Kră Yang gô ăn kơmlat păng tơjur đak 'mi rơkah rơkai, wă ăn kơ rim 'nu bơngai đei hla 'nhot sa đơ̆ng mir.

² Yua kơ lu rup man chă pơma pơhlŭ lu pơjâu 'bôh hơlĕnh đĕch; lu sư roi tơdrong lu sư hơpo hơlĕnh, sư pơlung ngôi đĕch ưh kơ đei yua kiơ. Thoi noh na kon pơlei tơklah tơklang thoi triu, đe pơmat lu sư yua kơ ưh pă đei bơngai wei.

³ “Tơdrong blĕk Inh iung hil kơ lu bơngai wei, Inh gô phak lu bơbe tơno; yua kơ Kră Yang Tih Hloh gô năm lăng khŭl triu Sư, wă khan hnam Juđa; păng pơjing lu sư pran thoi aseh tơblah đe ang.

⁴ Đơ̆ng lu sư gô đei tơmo mum hnam, đơ̆ng lu sư đei 'long đe pơ̆ng hnam khăn, đơ̆ng lu sư đei hră tơblah, đơ̆ng lu sư gô đei lu kră pơgơ̆r;

⁵ mă-lei lu sư jơ̆ lu bơngai nuih pran pơjuă lu ayăt kơ lu sư, thoi đe pơjuă teh hlŭt rok trong đe năm tơblah; lu sư gô blah jei, yua kơ Kră Yang oei hơdai lu sư, na lu linh ayăt hao aseh gô thuơ păng mơlâu kơ lu sư.

⁶ Inh gô ăn kơ hnam Juđa jing pran păng dŏng pơklaih hnam Jôsep. Inh chông tơwih lu sư brŏk, yua kơ 'mêm mơnat kơ lu sư, lăng lu sư thoi Inh ưh tam layơ achăng lê̆ lu sư, yua kơ Inh Kră Yang lu sư, Inh gô tơl tơwih nơ̆r lu sư krao apinh.

⁷ Bơngai Êphraim gô thoi bơngai nuih pran kơtang, jơhngơ̆m lu sư chhôk hal thoi suai kơ et sik hơmu; kon sâu lu sư gô 'bôh păng chơt hiôk tơpă, jơhngơ̆m lu sư chơt hiôk lăm Kră Yang.

⁸ Inh wă krao pơpôi lu sư, yua kơ Inh huai iŏk lu sư boih; lu sư đei thim rai lơ thoi sơ̆.

⁹ Inh gô săi tơraih lu sư tơ jơ̆p-jang kơ teh đak, lu sư mă đơ̆ng dêh char ataih gô 'blŏk kơ Inh; lu sư gô oei arih hơdai brŏk tơ kon akăn kơdih.

¹⁰ Thoi ei na Inh gô anhăk lu sư brŏk đơ̆ng dêh char Êyiptơ, pơpôi akŭm lu sư đơ̆ng char Asiri, ba lu sư mơ̆t lăm teh đak Gileat păng Liban păng lu sư gô chă anih oei ưh kơ mah.

¹¹ Lu sư yak hlôi kơ đak dơsĭ anat dêh, yak rok đak dơsĭ poh-yă, đơ̆ng noh dơ̆ng dôm lu đak krong Nil mă jrŭ gô hrĕng kro, Inh gô pơrăm lê̆ đĭ dôm tơdrong pơang char Asiri păng 'long jra pơtao Êyiptơ gô hiong đĭ.

¹² Inh gô ăn kơ lu sư pran kơtang lăm Kră Yang păng Lu sư yak năm lăm anăn Kră Yang.” Kră Yang khan thoi noh.