Sa 1 - Sơ̆p Hlabơar Nơ̆r 'Bok Kei-Dei

Athei tơbral tơdrong tơ'bôh gah aseh păng thơ̆ hơjơ̆m

¹ Khei tơhngam sơnăm mă 'bar lăm chăl Đarius pơgơ̆r. Đei nơ̆r Kră Yang pơma hăm Sachari, 'bok khan lê̆ adrol, kon drŏ-nglo Bêrekia, sâu Iđô, thoi âu:

² “Kră Yang ưh kơ lăp đon kơ yă 'bok iĕm.

³ Thoi noh na ih khŏm roi kơ kon pơlei pơla thoi âu: Kră Yang Tih Hloh khan: ‘Wih tơ Inh bĕ, na Inh gô wih tơ lu iĕm dơ̆ng,’ Kră Yang Tih Hloh khan thoi noh.

⁴ 'Nĕ kơ pơm thoi 'bok yă lu iĕm sơ̆ thoi lu 'bok khan lê̆ adrol sơ̆ đei krao lu sư. Kră Yang Tih Hloh đei khan: ‘Dang ei weh bĕ đơ̆ng trong kơnê̆ păng đơ̆ng lu tơdrong pơm kơnê̆.’ Mă-lei lu sư ưh kơ mơ̆ng, kuă kơ mơ̆ng Inh, Kră Yang khan thoi noh.

⁵ Bê̆ tơ yơ 'bok yă lu iĕm dang ei? Păng lu 'bok khan lê̆ adrol noh hăm đei arih ling-lang ưh?

⁶ Na dôm nơ̆r Inh pơma păng khôi juăt Inh đei tơtă kơ lu đĭch đam inh bơngai khan lê̆ adrol ưh tam mă truh tơ lu 'bok yă iĕm hă? Na lu yă 'bok iĕm wih tơbral khan thoi âu: ‘Bơ̆n pơm ưh kơ lăp kơ Kră Yang Tih Hloh na Sư phak bơ̆n boih kư̆m kiơ̆ thoi Sư đei pơkă.’ ”

⁷ Năr 'bar-jĭt puăn khei mơjĭt-mônh, noh khei Sa'bat, lăm sơnăm mă 'bar chăl Đarius, đei Kră Yang tơ'bôh ăn kơ Sachari 'bok khan lê̆ adrol, sư kon drŏ-nglo Bêrekia, sâu Iđô, thoi âu:

⁸ Kơmăng inh 'bôh; thoi 'nâu đei minh 'nu bơngai hao aseh hŭng dơ̆ng 'bơ̆t tơm 'long pơgang tơ anih ala sŭng păng đơ̆ng rŏng kơ sư đei lu aseh hŭng, aseh hơi, aseh hak.

⁹ Inh khan thoi âu: “Ơ yŏng inh, lu aseh noh wă khan kiơ?” Na linh jang mă oei pơma hăm inh khan kơ inh thoi âu: “Inh gô tơ'bôh ăn kơ ih dôm lu aseh âu wă khan kiơ.”

¹⁰ Bơngai mă dơ̆ng tŏk-bŏk lu 'long pơgang noh tơlang: “'Nâu mă lu bơngai Kră Yang wơh năm tơ jơ̆p-jang teh đak.”

¹¹ Lu sư drơ̆ng linh jang mă dơ̆ng tơ tơm 'long pơgang noh thoi âu: “Lu nhôn đei năm jơ̆p boih kơ teh đak, đĭ-đăng jơ̆p-jang kơ teh đak oei hiôk-hian.”

¹² Đơ̆ng noh linh jang Kră Yang khan: “Ơ Kră Yang Tih hloh! Ih gô ưh pă 'mêm kơ pơlei Jêrusalem păng lu pơlei lăm char Juđa dĭng truh dang yơ? Noh boih lu pơlei tih mă Ih đei hil kơ lu sư tơpơh-jĭt sơnăm kơ âu?”

¹³ Kră Yang iŏk dôm nơ̆r rơngơp nơ̆r pơlung tơl linh jang mă oei pơma hăm inh.

¹⁴ Đơ̆ng noh linh jang mă oei pơma hăm inh, khan kơ inh thoi âu: “Ôr krao păng khan Kră Yang Tih hloh đei khan: ‘Yua kơ pơlei Jêrusalem păng Siôn jơhngơ̆m inh ơh gar dêh.

¹⁵ Păng Inh ưh kơ lăp jơhngơ̆m đon kơ adrĕch adrung mă oei hiôk. Sơ̆ Inh hli kơ kon pơlei pơla Inh lăp ai đĕch, mă-lei lu adrĕch adrung sư thim tơdrong pơmat kơ lu sư.’

¹⁶ Thoi noh Kră Yang khan thoi âu: ‘Inh iŏk jơhngơ̆m 'mêm mơnat dơ̆ng kơ Jêrusalem; Inh gô man pơdơ̆ng hnam Inh dơ̆ng tơ lăm sư, tơlei đak mơ̆k pơtŏ gô dăng tơ pơlei Jêrusalem.’ Kră Yang khan thoi noh.

¹⁷ Ôr ră roi pă minh 'măng dơ̆ng bĕ thoi âu: ‘Lu pơlei tih Inh gô oei đei 'bĕnh kơ tơdrong hiôk jơnap, Kră Yang kư̆m oei pơlung Siôn păng oei rơih iŏk Jêrusalem.’ ”

¹⁸ Đơ̆ng noh, inh ngơk muh măt, inh lăng, 'bôh đei puăn tŏ hơke.

¹⁹ Inh khan hloi kơ linh jang mă oei pơma hăm inh thoi âu: “Lu tơmam noh tơmam kiơ?” Sư tơl inh thoi âu: “Noh boih lu hơke mă đei pơm kơ char Juđa, Isơrael păng Jêrusalem pơchah đĭ.”

²⁰ Đơ̆ng noh, Kră Yang tơ'bôh ăn kơ inh lăng puăn 'nu bơngai thơ̆ hơjơ̆m.

²¹ Na inh apinh: “Lu bơngai âu truh wă pơm kiơ?” Sư tơl: “Noh boih lu hơke mă pơm kơ char Juđa pơchah đĭ, dĭng mah pă đei bu pơ̆n ngơk muh măt; mă-lei lu bơngai âu truh boih wă tơhli lu sư păng wă klơ̆m hŭt lê̆ lu hơke đơ̆ng dêh char nai mă đei yua hơke tơblah hăm teh đak Juđa wă pơrăm pơchah lê̆ sư.”