Rom 9 - Sơ̆p Hlabơar Nơ̆r 'Bok Kei-Dei

^1-2 Inh wă roi kơ iĕm gah tơdrong 'nhŏng oh inh khŭl Isơrael. Inh sơ'ngon dêh yua kơ lu sư ưh kơ lui kơ Yêsu. Inh roi kơ iĕm tơdrong 'nâu inh roi tơpă, inh bơngai kiơ̆ Yêsu Krist ưh kơ anul ôh. Yua kơ Yang Bơhngol 'Lơ̆ng oei lăm inh, thoi yơ inh gơh anul?

³ Inh 'mêm ră kơ lu bơngai Isơrael tă kơ 'nhŏng oh inh ngăl. Đon inh hơdơ̆r kơ lu sư lui kơ Yêsu Krist đĭ, lê̆ kơ inh ưh, pŭ dôm tơdrong phak lu sư ning-mônh.

⁴ Lu sư boih đe anăn bơngai Isơrael, lu sư boih 'Bok Kei-Dei jô̆ khan kon Sư; 'Bok Kei-Dei oei hơdai hăm lu sư, pơkă khan wă tơgŭm lu sư. 'Bok Kei-Dei pơkă kơ lu sư tơdrong juăt wă kơ lu sư kiơ̆ păng bơtho lu sư soi sơmah kơkuh kiơ̆ trŏ thoi Sư wă.

⁵ Lu yă 'bok lu sư sơ̆ lui kơ 'Bok Kei-Dei hơdrol kơ đĭ-đăng lu bơngai nai. Na 'Bok Krist mă 'Bok Kei-Dei wơh dŏng pơklaih kon bơngai Sư kư̆m bơngai Isơrael mơ̆n tơ̆ng kiơ̆ kơ mĕ Sư tơpŭ. 'Bok Krist boih Yang tih hloh gơh pơgơ̆r tôm tơdrong, trŏ kơ kon bơngai ư-ang kơ Sư ling-lang tơpă. A-men.

Kon sâu Abraham ưh kơ trŏ kơ wă jing kon 'Bok Kei-Dei ngăl ôh

⁶ Ưh kơ sĭ 'Bok Kei-Dei kuă kơ tơgŭm lu bơngai Isơrael kiơ̆ thoi Sư pơkă sơ̆ ôh; Sư wă tơgŭm mơ̆n, mă ưh kơ tơgŭm đĭ-đăng hăm lu bơngai ưh kơ lui hai ôh. Sư tơgŭm pôm lu bơngai lui kơ Sư đĕch, lu bơngai Isơrael thoi noh 'Bok Kei-Dei tơgŭm păng lăng dang kon Sư kơdih.

⁷ 'Bok Kei-Dei ưh kơ jô̆ đĭ-đăng lu kon sâu Abraham khan kon sâu Abraham ngăl ôh. Yua kơ 'Bok Kei-Dei khan kơ Abraham sơ̆ thoi âu: “Lu kon sâu ih mă lĕch đơ̆ng kon ih Isăk noh Inh jô̆ khan kon sâu ih.”

⁸ Yua kơ thoi noh na bơ̆n băt đĭ-đăng bơngai Isơrael ưh kơ jing kon 'Bok Kei-Dei ngăl ôh, pôm lu bơngai mă lĕch đơ̆ng adrĕch 'Bok Kei-Dei anăn đĕch jing kon 'Bok Kei-Dei.

⁹ 'Bok Kei-Dei khan kơ Abraham sơ̆ thoi âu: “Gô pă minh sơnăm đơ̆ng âu dơ̆ng inh wă ăn kơ biĕm Sara tơpŭ minh 'nu kon drŏ-nglo.”

¹⁰ Tơpă, đơ̆ng rŏng kơ noh na bre sư đei minh 'nu kon drŏ-nglo anăn sư Isăk. Isăk noh boih 'bok kơdră lu bơ̆n sơ̆. Akăn Isăk anăn sư yă Rê'bêka, sư tơpŭ 'bar 'nu kon drŏ-nglo kơmar.

^11-12 Kơplah yă Rê'bêka tam mă tơpŭ kơ bre noh sơ̆, 'Bok Kei-Dei khan lê̆ kơ yă bơ̆n noh sơ̆ thoi âu: “Ning-mônh ih gô tơpŭ 'bar 'nu kon drŏ-nglo kơmar. 'Nhŏng sư gô pơm iĕ kơ oh sư.” 'Bok Kei-Dei khan thoi noh, ưh kơ sĭ yua kơ bre 'nhŏng oh pơm 'lơ̆ng pơm kơnê̆ ôh. Kơplah noh bre ei, mĕ bre sư ưh tam mă tơpŭ ôh. 'Bok Kei-Dei pơkă lê̆ hơdrol pơrơ̆ng wă rơih iŏk oh sư pơm tih kơ 'nhŏng sư.

¹³ Na tơdrong bre noh, lăm hla bơar 'Bok Kei-Dei roi thoi âu: “Inh 'mêm kơ oh sư Jakôp; gah 'nhŏng sư Êsâu Inh ưh kơ 'mêm ôh.”

'Bok Kei-Dei 'mêm kơ bơ̆n Sư 'mêm kơdih

¹⁴ Bơ̆n 'bôh 'Bok Kei-Dei ưh kơ 'mêm kơ bre noh dang ăi, mă-lei bơ̆n 'nĕ tơchĕng khan 'Bok Kei-Dei ưh kơ tơpăt.

¹⁵ Tơdrong noh bơ̆n gô mơ̆ng kơ 'Bok Kei-Dei đĕch, yua kơ sơ̆ 'Bok Kei-Dei khan kơ Môis thoi âu: “Inh 'mêm kơ bu gô mơ̆ng kơ Inh wă 'mêm đĕch.”

¹⁶ Thoi noh na dang ei bơ̆n băt nhên boih gah tơdrong noh, ưh kơ sĭ đơ̆ng bơ̆n wă kơ Sư 'mêm, dah bơ̆n pơlung Sư wă kơ Sư 'mêm kơ bơ̆n ôh. Sư 'mêm kơ bơ̆n yua kơ Sư wă 'mêm kơdih đĕch.

¹⁷ Tơdrong noh thoi lăm sơ̆p hla bơar 'Bok Kei-Dei pơma kơ 'bok Pharôn pơtao đe Êyiptơ sơ̆ thoi âu: “Inh ăn kơ ih pơm pơtao arăng kơ̆l tôm tơdrong ưh kơ chu kơ Inh. Na mơsêh mơyang Inh blah ih, wă kơ kon bơngai ư-ang Inh jơ̆p kơ teh đak.”

¹⁸ 'Noh bơ̆n băt kơ 'Bok Kei-Dei Sư wă 'mêm kơ bu gô mơ̆ng kơ Sư wă đĕch. Na tơdrong Sư wă ăn kơ đe arăng kơ̆l kư̆m lei-lăi, gô mơ̆ng kơ Sư wă.

Mă 'Bok Kei-Dei wă pơm thoi yơ kư̆m trŏ Sư ngăl

¹⁹ Hli kơ iĕm khan: “Yua kơ kiơ 'Bok Kei-Dei oei jô̆ yo kơ bơngai mă Sư ăn arăng kơ̆l, mă bơngai bơ̆n khan kơ Sư, Sư kư̆m ưh kơ chu?”

²⁰ Inh khan kơ iĕm tơpă, tơdrong noh tơdrong jang 'Bok Kei-Dei, bơ̆n ưh kơ gơh pơma tơwih kơ Sư ôh. Pơtih gia bơngai man gŏ ge, sư kư̆ kơ man gô mơ̆ng kơ sư wă. Lu gŏ ge mă sư man ưh kơ trŏ kơ pơma tơwih kơ sư khan: “Man kiơ kơ inh kơnê̆ thoi âu?”

²¹ Hăm trŏ kơ bơngai man gŏ ge gô mơ̆ng kơ sư wă man? Sư kư̆ kơ iŏk teh lơ̆n man khŭl gŏ ge 'lơ̆ng kư̆m đei, man gŏ ge kư̆ kă wă kơ gơh mong sa đĕch kư̆m đei.

²² Na 'Bok Kei-Dei Sư kư̆m pơm gô mơ̆ng kơ Sư wă. Tơ̆ng kiơ̆ kơ Sư ơh, athei phak lu bơngai kơnê̆ dang ei trŏ, wă kơ kon bơngai jơ̆p kơ teh đak ư-ang kơ Sư Yang mơsêh pran kơtang. Mă-lei dang ei 'Bok Kei-Dei oei ĕnh kơ tơdrong phak noh.

²³ Yua kơ Sư oei gô lu bơngai mă Sư 'mêm. Sư wă hơmet jơhngơ̆m lu bơngai mă Sư 'mêm noh hơdrol 'mơ̆i, wă kơ lu bơngai noh gơh oei hơdai hăm Sư ning-mônh. Lu bơngai noh 'Bok Kei-Dei rơih iŏk đơ̆ng blŭng-a sơ̆ hloi boih, noh na Sư oei gô.

²⁴ Lu bơngai noh wă khan lu bơ̆n âu boih Sư rơih iŏk. Ưh kơ sĭ Sư rơih iŏk pôm lu bơngai Isơrael đĕch ôh, Sư rơih iŏk lu bơngai nai hai.

²⁵ Tơdrong noh sơ̆ 'bok Hôssê kư̆m chih roi nơ̆r 'Bok Kei-Dei thoi âu: “Lu bơngai tơmoi nai mă ưh kơ trŏ kơ khŭl kon Inh, Inh kư̆m krao lu sư kon Inh mơ̆n. Lu bơngai mă Inh ưh kơ gan 'mêm sơ̆, Inh gô 'mêm kơ sư tơpă.

²⁶ Mă tơ yơ yơ đe jô̆ lu sư khan ưh kơ trŏ kơ kon Inh, tơ noh đe gô jô̆ kơ lu sư kon Inh mơ̆n; yua kơ Inh Yang, 'Bă lu sư mă arih ling-lang.”

²⁷ Gah tơdrong lu bơngai Isơrael, Êsai sư khan thoi âu: “Mă lu bơngai Isơrael lơlap lơlang dang pơlao chuơh dơsĭ, hui bơngai klaih đơ̆ng tơdrong yoch,

²⁸ yua kơ 'Bok Kei-Dei wă phak jơ̆p-jang kơ teh đak.”

²⁹ Êsai kư̆m khan lê̆ hơdrol sơ̆ thoi âu: “Dah Kră Yang 'Bok Kei-Dei ưh kơ rong lê̆ bơ̆n 'biơ̆, lei kon bơngai bơ̆n lôch đĭ thoi Pơlei Sôđôm păng Gômôrơ sơ̆.”

Bơngai Isơrael ưh kơ chu kơ Yêsu

³⁰ Thoi noh na lu bơngai tơmoi nai mă ưh kơ khŭl Isơrael, sơ̆ lu sư ưh kơ băt chă tơdrong pơm 'lơ̆ng hăm 'Bok Kei-Dei thoi yơ ôh, mă-lei 'Bok Kei-Dei kư̆m 'mêm kơ lu sư mơ̆n, kư̆m jô̆ lu sư bơngai 'lơ̆ng. Lu bơngai noh wă khan dôm lu bơngai khŭl nai mă oei gơnang kơ Yêsu.

³¹ Gah lu bơngai Isơrael lu sư gơnang kơ akâu kơdih đĕch wă kiơ̆ tơdrong juăt 'Bok Kei-Dei pơkă sơ̆ khan jing bơngai 'lơ̆ng hăm 'Bok Kei-Dei. Mă-lei lu sư ưh kơ kĕ kiơ̆ tơdrong 'Bok Kei-Dei pơkă ôh,

³² yua kơ lu sư ưh kơ gơnang kơ Yêsu gơh tơgŭm sư jing bơngai 'lơ̆ng hăm 'Bok Kei-Dei. Lu sư gơnang kơ akâu lu sư kơdih đĕch wă kiơ̆ tơdrong juăt 'Bok Kei-Dei pơkă khan jing bơngai 'lơ̆ng hăm 'Bok Kei-Dei. Lu sư băt mơ̆n kơ Yêsu, mă-lei ưh kơ wă gơnang kơ Yêsu ôh. 'Noh hơmơt tơblĕnh kơ lu sư dêh thoi lĕ kơ đe 'bôh boih tơmo tŏk-bŏk trong mă-lei ngê̆ kơ kơtơih pơ̆k 'mơ̆i.

³³ 'Noh thoi sơ̆p hla bơar 'Bok Kei-Dei khan lê̆ sơ̆ thoi âu: “Iĕm lăng. Tơ Pơlei Siôn Inh đei 'măn minh pôm tơmo tŏk-bŏk trong wă kơ đe kơtơih pơ̆k. Bu lui kơ tơmo noh, bơngai noh huay kơ hli minh tơdrong kiơ ôh.”