Rom 3 - Sơ̆p Hlabơar Nơ̆r 'Bok Kei-Dei

¹ Tơdrong noh thoi noh boih, tơ̆ng lei bĭ bơngai Juđê hăm tih hloh kơ bơngai nai, dah lei-lăi đĕch? Păng tơdrong kăt tơdra akar hăm mah yua kiơ?

² Lu bơngai Juđê tih hloh kơ lu bơngai nai 'biơ̆ mơ̆n yua kơ 'Bok Kei-Dei chih pơkă kơ lu sư tơdrong juăt Sư hơdrol kơ lu bơngai nai păng pơkă khan wă tơgŭm lu sư tơpă.

³ Inh kư̆m băt mơ̆n lu sư mơ'nah ưh kơ wă lui kơ tơdrong 'Bok Kei-Dei ăn kơ lu sư noh; mă lu sư ưh kơ lui, bơ̆n 'nĕ tơchĕng khan 'Bok Kei-Dei wă tŭk dôm tơdrong Sư pơkă wă tơgŭm noh, ưh ôh.

⁴ Đêl Sư pơkă lê̆ hơdrol Sư gô pơm 'blep thoi Sư pơkă tơpă. Mă kon bơngai bơ̆n juăt kơ hơlĕnh kơ Sư, kuă kơ kiơ̆ 'bơ̆r đon Sư mă-lei Sư oei pơm 'blep kơ nơ̆r Sư pơkă đĕch, Sư ưh kơ hơlĕnh thoi bơ̆n ôh. Na tơdrong noh 'blep thoi tơdrong đe chih roi lê̆ sơ̆ tơpă, sư khan thoi âu: “Ơ Kră Yang, Ih pơma 'lơ̆ng, pơma tơpăt ling-lang. Na kon bơngai wă sek tơlang tơdrong Ih, mă-lei lu sư ưh kơ gơh sek tơlang thoi yơ, yua kơ Ih pơm tơpăt kiơ̆ kơ nơ̆r Ih pơkă ngăl.”

'Bok Kei-Dei wă phak tơpă dôm lu bơngai pơm yoch

⁵ Bơ̆n 'bôh tôm tơdrong 'Bok Kei-Dei pơm 'lơ̆ng tơpăt ngăl boih, na bơ̆n 'nĕ tơchĕng khan, bơ̆n pơm kơnê̆ kư̆m bưh, wă kơ đe kơnăl kơ 'Bok Kei-Dei pơm 'lơ̆ng tơpăt păng wă kơ đe kơnăl kơ 'Bok Kei-Dei Sư ưh kơ pơm kơnê̆ thoi kon bơngai. Bơ̆n pơm kơnê̆ noh na đe gô ư-ang kơ 'Bok Kei-Dei rai tih, na dah 'Bok Kei-Dei wă phak bơ̆n ning-mônh noh Sư wă hơlĕnh đĕch yua kơ bơ̆n dang ư-ang anăn Sư kơ đe boih. Bơ̆n 'nĕ tơchĕng tơdrong noh khan trŏ, ưh ôh hŏ. Kon bơngai bơ̆n đĕch tơchĕng khan trŏ.

⁶ Dah bơ̆n khan 'Bok Kei-Dei sek tơlang ưh kơ tơpăt, lei thoi yơ jơ̆p kơ teh đak chu kơ Sư sek tơlang mơ̆n.

⁷ Bơ̆n 'bôh dôm tơdrong 'Bok Kei-Dei pơm trŏ thoi Sư pơkă ngăl boih, na bơ̆n 'nĕ tơchĕng khan, lê̆ bơ̆n pơma hơlĕnh kư̆m bưh, wă kơ đe băt kơ 'Bok Kei-Dei tơpăt. Na dah 'Bok Kei-Dei wă phak bơ̆n ning-mônh, noh Sư hơlĕnh đĕch, yua kơ bơ̆n dang ư-ang anăn Sư kơ đe boih. Bơ̆n tơchĕng thoi noh ưh kơ trŏ ôh, kon bơngai bơ̆n đĕch tơchĕng khan trŏ.

⁸ Mă tơdrong pơm kơnê̆ kư̆m lei-lăi. Bơ̆n 'nĕ pă tơchĕng khan trŏ. Na đei lu bơngai mơ'nah khan inh Pôl bơtho đe thoi noh; mă tơpă inh ưh kơ bơtho đe thoi noh ôh. Bơngai bu jô̆ kơ inh bơtho đe thoi noh, bơngai noh 'Bok Kei-Dei phak sư tơpă ning-mônh.

Đĭ-đăng kon bơngai yoch ngăl

⁹ Bơ̆n 'nĕ pơang lu bơngai Juđê bơ̆n, khan bơ̆n bơngai ưh kơ yoch thoi lu bơngai nai. Yua kơ inh khan boih, đĭ-đăng kon bơngai yoch ngăl, na mă bơngai Juđê, mă bơngai khŭl nai.

¹⁰ 'Noh kư̆m thoi đe chih roi lăm sơ̆p hla bơar 'Bok Kei-Dei sơ̆ thoi âu: “Đĭ-đăng kon bơngai ưh kơ đei bu 'lơ̆ng tơpăt, hoh-hoy 'nhŏ kơ minh 'nu.

¹¹ Păng ưh kơ đei bu hlôh wao tơdrong 'Bok Kei-Dei, yua kơ ưh kơ đei bu wă chă Sư.

¹² Đĭ-đăng bơngai jrok trong weh ataih đơ̆ng 'Bok Kei-Dei ngăl. Lu sư jing kơnê̆, ưh kơ đei bu tơpăt, hoh-hoy 'nhŏ kơ minh 'nu.

¹³ 'Bok Kei-Dei lăng jơhngơ̆m kon bơngai kơnê̆ thoi lĕ kơ sơlŭng đe tah atâu ôm ưh kơ 'bŭ. Hơpiĕt kon bơngai băt pôm hơlĕnh kơ kơdih bôl. 'Bơ̆r kon bơngai dang 'bơ̆r 'bih 'maih choh đe.

¹⁴ 'Bơ̆r băt kơ hiap areh kơ đe.

¹⁵ Jơ̆ng kư̆m băt kơ chop pơlôch đe.

¹⁶ Trong đêl lu sư yak năm tơblah băl mơhlik mơhlak.

¹⁷ Kon bơngai ưh kơ băt chă tơdrong hiôk thoi yơ.

¹⁸ Lu sư ưh kơ băt hli kơ 'Bok Kei-Dei.”

¹⁹ Bơ̆n băt boih tơdrong đe chih noh sơ̆ ưh kơ trŏ jô̆ kơ lu bơngai nai đĕch pơm yoch ôh. Sư jô̆ kơ lu bơngai Juđê kư̆m pơm yoch mơ̆n, yua kơ sơ̆p hla bơar 'Bok Kei-Dei wă chih bơtho lu sư. 'Noh na lu bơngai Juđê bơ̆n băt boih, đĭ-đăng kon bơngai ưh kơ đei bu gơh khan sư bơngai ưh kơ yoch. Đĭ-đăng kon bơngai lăm teh đak yoch hăm 'Bok Kei-Dei ngăl boih.

²⁰ Na mă bơngai Juđê mă bơngai nai, dah bơ̆n oei gơnang kơ akâu bơ̆n kơdih wă kiơ̆ dôm tơdrong juăt 'Bok Kei-Dei pơkă sơ̆, 'Bok Kei-Dei ưh kơ jô̆ bơ̆n bơngai 'lơ̆ng tơpăt ôh, yua kơ tơdrong Sư pơkă noh sư pôm tơbăt kơ bơ̆n bơngai yoch hăm 'Bok Kei-Dei đĕch.

'Bok Kei-Dei jô̆ bơ̆n bơngai 'lơ̆ng yua kơ minh tơdrong bơ̆n lui kơ Yêsu đĕch

²¹ Na dang ei 'Bok Kei-Dei wă tơ'bôh kơ bơ̆n tơdrong Sư wă ăn kơ kon bơngai jing 'lơ̆ng tơpăt. Sư jô̆ kon bơngai bơ̆n 'lơ̆ng tơpăt yua kơ bơ̆n lui kơ Yêsu, ưh kơ sĭ yua kơ bơ̆n gơnang kơ akâu kơdih wă kiơ̆ tơdrong juăt 'Bok Kei-Dei pơkă sơ̆ ôh. Tơdrong juăt Sư pơkă noh hăm lu bơngai pơtruh nơ̆r Sư sơ̆ tơbăt ăn kơ bơ̆n

²² 'Bok Kei-Dei jô̆ đĭ-đăng kon bơngai jing 'lơ̆ng yua kơ sư lui kơ Yêsu Krist. Yua kơ thoi noh na dang ei bơ̆n băt boih đĭ-đăng bơngai dang ăi đĕch;

²³ đĭ-đăng kon bơngai weh ataih đơ̆ng 'Bok Kei-Dei kiơ̆ tơdrong yoch ngăl.

²⁴ Mă-lei 'Bok Kei-Dei oei 'mêm kơ kon bơngai jô̆ kon bơngai jing 'lơ̆ng hăm Sư. Sư mơnat ăn đĕch. Yua kơ Sư mơnat na Sư ăn Yêsu Krist huai iŏk bơ̆n.

^25-26 'Bok Kei-Dei Sư sek tơlang kiơ̆ tơdrong tơpăt ngăl, na lu bơngai yoch Sư wă phak tơpă. Mă-lei Sư oei 'mêm kơ kon bơngai, na ăn Kon pôm Sư Yêsu lôch tang kon bơngai tơ 'long pơglang, wă huai iŏk lu bơngai yoch, wă kơ lu bơngai yoch noh lui kơ Kon Sư, gơnang kơ Kon Sư, na 'Bok Kei-Dei jô̆ lu sư jing bơngai 'lơ̆ng rơgoh, Sư huay pă jô̆ yo boih. Kơplah Yêsu tam mă lôch tang sơ̆, đei mơ̆n lu bơngai lui kơ 'Bok Kei-Dei, gơnang kơ 'Bok Kei-Dei, mă-lei Sư huay kơ jô̆ yo ôh dôm tơdrong yoch lu sư, yua kơ Sư wă ăn Yêsu lôch tang lu sư ning-mônh. Tơdrong Sư ăn Kon Sư Yêsu lôch tang kon bơngai noh, Sư wă kơ kon bơngai băt kơ Sư sek tơlang kon bơngai tơpăt.

²⁷ Thoi noh na bơ̆n ưh kơ gơh pơang kơ đe khan bơ̆n bơngai 'lơ̆ng ôh yua kơ Sư jô̆ bơ̆n bơngai 'lơ̆ng kơlih kơ Sư mơnat đĕch. Mă-lei dah bơ̆n oei gơnang kơ akâu bơ̆n kơdih wă kiơ̆ tơdrong juăt 'Bok Kei-Dei pơkă, bơ̆n oei pơang akâu bơ̆n kơ đe ling-lang đĕch. Na dang ei bơ̆n lui kơ Yêsu Krist boih păng gơnang kơ Sư tơpă, thoi yơ bơ̆n gơh wă pơang kơ đe dơ̆ng?

²⁸ Kon bơngai bơ̆n hiôk 'lơ̆ng hăm 'Bok Kei-Dei yua kơ bơ̆n lui, ưh kơ sĭ yua kơ kĕ kiơ̆ tơdrong juăt Sư pơkă ôh.

²⁹ Bĭ iĕm tơchĕng thoi yơ, 'Bok Kei-Dei Sư Kră Yang lu bơngai Juđê đĕch dah lu bơngai nai hai? Sư Kră Yang lu bơngai nai hai mơ̆n.

³⁰ Tơpă yua kơ đei lăp minh 'nu 'Bok Kei-Dei đĕch. 'Bok Kei-Dei jô̆ bơ̆n bơngai 'lơ̆ng tơpăt yua kơ bơ̆n lui kơ Sư, mă bơngai Juđê mă bơngai nai Sư jô̆ lei-lăi đĕch.

³¹ Thoi noh boih, mă-lei bơ̆n hăm wă hŭt lê̆ tơdrong juăt 'Bok Kei-Dei pơkă sơ̆? Ưh ôh, bơ̆n kư̆m oei kiơ̆ mơ̆n, bơ̆n lui kơ Yêsu 'mơ̆i na bơ̆n kĕ kiơ̆ tơdrong juăt Sư pơkă noh.