Rom 1 - Sơ̆p Hlabơar Nơ̆r 'Bok Kei-Dei

Pơih nơ̆r pơma

¹ Inh Pôl chih hơpong kơ iĕm bơngai Rôm. Inh bơngai đĭch đam Yêsu Krist. 'Bok Kei-Dei krao inh pơm jơ̆ng 'bang Sư, wă kơ inh năm chă bơtho kơ đe tơdrong 'nao 'lơ̆ng Sư.

² Hơdrol kơ Yêsu jur sơ̆ 'Bok Kei-Dei ăn kơ lu bơngai pơtruh nơ̆r Sư chih roi lê̆ hơdrol tơdrong noh tơ lăm sơ̆p hla bơar Sư.

³ Tơdrong 'nao 'lơ̆ng noh roi gah Kon Sư Yêsu Krist mă pơm Yŏng bơ̆n. Yêsu Krist jur jing kon bơngai Sư lĕch đơ̆ng adrĕch pơtao Đawit sơ̆.

⁴ Yang Bơhngol 'Lơ̆ng tơbăt ăn kơ bơ̆n Yêsu Yang, Kon 'Bok Kei-Dei. Sư tơbăt ăn kơ bơ̆n tơdrong Yêsu Kon 'Bok Kei-Dei, Sư tơ'bôh kơ bơ̆n 'bôh Sư mơsêh mơyang gơh iung arih đơ̆ng lôch. 'Noh bơ̆n băt kơ Yêsu Sư Yang tơpă.

⁵ Na Kră Yang Yêsu Krist mơnat kơ inh, ăn kơ inh pơm jơ̆ng 'bang Sư, wă kơ inh năm bơtho kơ đĭ-đăng khŭl bơngai jơ̆p kơ teh đak, wă kơ đĭ-đăng bơngai lui kơ Sư păng ư-ang kơ Sư ling-lang.

⁶ Na 'Bok Kei-Dei krao iŏk iĕm bơngai Rôm, wă kơ iĕm lui kơ Yêsu Krist mơ̆n.

⁷ Na dang ei inh chih kơthơ ăn kơ iĕm bơngai Rôm mă 'Bok Kei-Dei 'mêm kơeng. Iĕm boih 'Bok Kei-Dei krao wă kơ iĕm jing kon Sư. Inh krao khan apinh Sư 'Bă tơm bơ̆n hăm Kră Yang bơ̆n Yêsu Krist wei-lăng iĕm tôm tơdrong wă kơ Sư ăn kơ iĕm hiôk-hian ling-lang.

Pôl wă năm tơ Pơlei Rôm

⁸ Hơdrol kơ inh wă pơma, inh đei tơdrong bơnê kơ 'Bok Kei-Dei hơdrol 'mơ̆i. Yua kơ Yêsu Krist lôch tang bơ̆n na bơ̆n băt krao khan bơnê kơ 'Bok Kei-Dei. Inh bơnê kơ Sư yua kơ Sư ăn kơ iĕm lui kơjăp. Đĭ kơ bơngai lui jơ̆p kơ teh đak kư̆m băt kơ iĕm lui kơjăp tơpă.

⁹ Inh adrin jang tơdrong 'Bok Kei-Dei, bơtho tơdrong 'nao 'lơ̆ng Kon Sư Yêsu Krist, na 'Bok Kei-Dei Sư 'bôh inh krao khan kơ Sư, Sư băt kơ inh krao khan tơgŭm iĕm ling-lang tơpă.

¹⁰ Inh krao khan apinh Sư pơchoh kơ inh trong wă kơ inh gơh năm ngôi hơpong hăm iĕm.

¹¹ Inh 'maih năm tơ iĕm dêh, wă kơ inh gơh tơgŭm iĕm lui kơ 'Bok Kei-Dei rai kơjăp hloh.

¹² Inh wă kơ bơ̆n pơm thoi âu: Inh 'maih năm tơ iĕm wă kơ bơ̆n gơh tơgŭm dih băl, wă kơ inh 'bôh tơdrong lui iĕm, iĕm 'bôh tơdrong lui inh, noh na bơ̆n lui rai kơjăp hloh.

¹³ Ơ 'nhŏng oh, inh khan tơbăt ăn kơ iĕm tơdrong inh khan wă năm ngôi hơpong tơ iĕm lơ 'măng boih mă ưh kơ yĕng. Inh 'maih bơtho 'biơ̆ pơlei iĕm, wă kơ đei bơngai lui rai lơ thoi lu kon pơlei nai mă ưh kơ khŭl Juđê, lu sư lui đơ̆ng inh bơtho.

¹⁴ Inh oei hre kơ rim khŭl bơngai mă inh ưh tam năm chă bơtho tơdrong 'nao 'lơ̆ng Yêsu Krist, mă bơngai Grĕk, mă bơngai nai, mă bơngai kơtul, mă bơngai hơgei, inh oei tă hre kơ sư ngăl.

¹⁵ Yua kơ thoi noh na inh hưch hanh hmăng dah truh tơ iĕm wă bơtho tơdrong 'nao 'lơ̆ng sư.

Pôl băt kơ tơdrong kăl na sư bơtho đe ưh kơ mơlâu

¹⁶ Tơdrong 'nao 'lơ̆ng Yêsu Krist kăl tơpă na inh bơtho đe ưh kơ mơlâu. Tơdrong noh tơbăt ăn kơ bơ̆n 'Bok Kei-Dei mơsêh mơyang tơpă pơklaih bơ̆n đơ̆ng tơdrong yoch na ăn kơ bơ̆n oei hiôk hăm Sư. Thoi noh dôm lu bơngai lui kơ tơdrong noh 'Bok Kei-Dei pơklaih ngăl. Lu bơngai Juđê lui hơdrol, đơ̆ng noh lu bơngai nai lui.

¹⁷ Yua kơ bơ̆n lui kơ tơdrong 'nao 'lơ̆ng Yêsu Krist, na 'Bok Kei-Dei jô̆ bơ̆n jing bơngai 'lơ̆ng hăm Sư. Sư jô̆ bơ̆n thoi noh yua kơ minh tơdrong bơ̆n lui kơ Kon Sư đĕch. 'Noh kư̆m thoi đe roi lăm sơ̆p hla bơar Sư sơ̆ thoi âu: “Bơngai bu lui kơ 'Bok Kei-Dei, 'Bok Kei-Dei jô̆ sư bơngai 'lơ̆ng tơpăt ăn kơ sư arih ling-lang.”

Kon bơngai bơ̆n yoch tơpă

¹⁸ 'Bok Kei-Dei oei tơ plĕnh ti, Sư 'bôh tôm tơdrong kon bơngai pơm yoch pơm kơnê̆ tơpă, na Sư ơh wă phak kon bơngai. Kon bơngai lăp đon kơ pơm tơdrong kơnê̆, thoi noh na lu sư nŏng kơ pơgăn lê̆ lu bôl sư wă kiơ̆ tơdrong 'Bok Kei-Dei.

¹⁹ 'Bok Kei-Dei tơbăt kơ kon bơngai nhên dêh boih gah tơdrong Sư đei tơpă.

²⁰ Đơ̆ng Sư pơjing plĕnh teh sơ̆ khơ̆ dang ei kon bơngai băt tôm tơmam đơ̆ng 'Bok Kei-Dei ngăl. Thoi noh kon bơngai băt nhên kơ 'Bok Kei-Dei Sư Yang tơm mơsêh mơyang ưh kơ tôch. Mă-lei kon bơngai bơ̆n oei khan ưh kơ đei 'Bok Kei-Dei 'mơ̆i, kon bơngai bơ̆n hơlĕnh dêh tơpă.

²¹ Kon bơngai bơ̆n băt kơ đei 'Bok Kei-Dei, mă-lei kuă bơnê ư-ang kơ Sư, thoi noh kon bơngai bơ̆n tơchĕng rai ưh kơ tơpăt rai kơtul jing măng mu.

²² Đon bơ̆n tơchĕng kơdih khan bơ̆n hơgei, mă tơpă bơ̆n kơtul dêh.

²³ 'Bok Kei-Dei mơsêh mơyang tih-tin arih ling-lang mă kuă kơ kơkuh kơ Sư, na man kơdih rup kon bơngai rup sem brem, noh boih kơkuh khan yang.

²⁴ Yua kơ thoi noh na 'Bok Kei-Dei achăng lê̆ bơ̆n gô mơ̆ng kơ bơ̆n wă pơm, pơm kơnê̆ bưh kiơ bưh. Bơ̆n pơm tơdrong kơnê̆ truh tơ akâu bơ̆n ưh kơ băt mơlâu kơ đe.

²⁵ Kuă kơ kơkuh kơ 'Bok Kei-Dei mă arih ling-lang, kơkuh kơ rup yang mă ưh kơ arih. Bơ̆n wă kơkuh kơ đêl tơmam Sư pơjing, kuă kơ kơkuh kơ tơ'ngla Sư mă gơh pơjing tôm tơdrong. 'Bok Kei-Dei boih trŏ kơ bơ̆n ư-ang ling-lang ưh kơ đei layơ tôch. A-men.

²⁶ Yua kơ thoi noh na 'Bok Kei-Dei achăng lê̆ bơ̆n pơm kơnê̆ bưh kiơ bưh, na bơ̆n pơm kơnê̆ kư̆ kă tơpă. Roi gah tơdrong drŏ-kăn: Đei lu drŏ-kăn mơ'nah rai pă 'maih iŏk klo kiơ̆ thoi 'Bok Kei-Dei pơkă. Lu sư wă pơm kư̆ kă tơduă lu sư đĕch.

²⁷ Lu drŏ-nglo kư̆m lei-lăi. Đei lu drŏ-nglo mơ'nah kư̆m rai pă 'maih iŏk akăn kiơ̆ thoi 'Bok Kei-Dei pơkă. Lu sư wă pơm kư̆ kă tơduă lu sư mơ̆n. Yua kơ lu sư pơm yoch dêh, na 'Bok Kei-Dei phak lu sư ăn kơ lu sư đei tơdrong gleh.

²⁸ Yua kơ bơ̆n kuă kơ kơkuh kơ 'Bok Kei-Dei Kră Yang tih-tin na 'Bok Kei-Dei achăng lê̆ bơ̆n ăn kơ bơ̆n jing kơtul pơm yoch ling-lang.

²⁹ Kon bơngai bơ̆n pơm tôm tơdrong kơnê̆, tôm tơdrong yoch tơpă. Bơ̆n 'nhĕng tơmam đe, bơ̆n areh dih băl, bơ̆n tơgar sa băl, pơlôch dih băl, tơteh dih băl, plơ̆ plĕch kơ bôl buăl; jơhngơ̆m 'maih hil kơ đe, wă bâu roi đe,

³⁰ pơjăm pơjuă dih băl. 'Bok Kei-Dei Sư Kră Yang, bơ̆n kư̆m areh kơ Sư mơ̆n. Bơ̆n bơngai hơwĕng dêh, bơ̆n pơ'brơh kơ đe, bơ̆n pơang akâu kơ đe, jơhngơ̆m bơ̆n 'bĕnh kơ tơdrong kơnê̆ ling-lang. Mĕ 'bă kơdih kư̆m ưh kơ băt kơ chu yom.

³¹ Bơ̆n pơm tôm tơdrong kơnê̆ kư̆ kă, đon bơ̆n jing ưh kơ tơpăt nŏng kơ hơlĕnh kơ đe ling-lang, ưh kơ băt mơnat kơ bôl buăl tŏ sĕt.

³² Bơ̆n băt kơ ning-mônh 'Bok Kei-Dei wă phak dôm lu bơngai thoi noh ră, mă-lei bơ̆n kư̆m oei pơm khŏm khŏm thoi noh. Bơ̆n 'bôh đe pơm yoch thoi noh, bơ̆n khan tơdrong 'lơ̆ng tơdrong trŏ.