Philip 3 - Sơ̆p Hlabơar Nơ̆r 'Bok Kei-Dei

¹ Ơ lu 'nhŏng oh, hiôk bĕ iĕm yua kơ iĕm lui boih kơ Yêsu. 'Nâu inh chih kơ iĕm dơ̆ng, kư̆m thoi tơdrong inh chih kơ iĕm hơdrol mơ̆n. Mă inh chih kơ iĕm lei-lăi thoi tơdrong hơdrol, iĕm 'nĕ kơ tơchĕng khan inh gleh; ưh ôh, yua kơ inh 'mêm kơ iĕm wă kơ iĕm lui mă kơjăp.

² Iĕm kơchăng hli kơ lu bơngai kăt tơdra akar, lu sư pơgŏ iĕm kăt kiơ̆ thoi lu sư. Tơdrong noh ưh kơ sĭ lu sư kăt kiơ̆ kơ tơdrong 'Bok Kei-Dei pơkă tơpă ôh. Lu sư kăt dang wă pơjĭ akâu đĕch. Lu sư dang kŏ, jang tơdrong kư̆ kă mơ̆ng kơ jơhngơ̆m hưch.

³ Lu bơ̆n âu boih kiơ̆ kơ tơdrong 'Bok Kei-Dei pơkă tơpă. Mă-lei bơ̆n ưh kơ kăl kơ tơdrong kăt tơdra akar chă pơpơm kơdih păng ti thoi noh ôh. Bơ̆n kăl kơ Yang Bơhngol 'Lơ̆ng đĕch; bơ̆n athei gơnang kơ Sư wă kơ bơ̆n gơh kiơ̆ 'Bok Kei-Dei trŏ thoi Sư wă. Tơdrong kăt tơdra akar chă pơm kơdih păng ti đĕch na bơ̆n 'nĕ kơ kiơ̆ ôh hli kơ bơ̆n gơnang kơ tơdrong bơ̆n pơm kơdih, bơ̆n athei gơnang kơ Yêsu Krist đĕch.

⁴ Tơ̆ng bơ̆n 'maih pơma băl tơpă kơ tơdrong bơ̆n gơnang kơ akâu bơ̆n kơdih, bu kiơ̆ 'blep bu ưh, đe ưh kơ kĕ kiơ̆ 'blep dang inh. Mă-lei inh ưh kơ gơnang kơ tơdrong inh kiơ̆ 'blep noh ôh.

⁵ Sơ̆ đe kư̆m kăt tơdra akar inh kơplah inh oei nge 'nao lăp tơhngam năr. Yua kơ inh bơngai Isơrael tơpă na đe kăt tơdra akar inh đơ̆ng oei nge. Păng inh adrĕch adrung Bênjamin. Inh pơma nơ̆r Isơrael kư̆m lei-lăi thoi mĕ 'bă inh. Lu bơngai Pharisi kiơ̆ tơdrong juăt Môis kơjăp, inh kư̆m jing bơngai Pharisi kiơ̆ kơjăp thoi lu sư mơ̆n.

⁶ Inh kư̆m pơm kơnê̆ kơ lu bơngai lui kơ Yêsu yua kơ inh ngêh kơ 'Bok Kei-Dei wă thoi noh tơpă; mă tơdrong juăt Môis inh ưh kơ pơm kơnê̆, pơm yoch ôh.

⁷ Inh kiơ̆ dôm tơdrong noh sơ̆, inh tơchĕng yua dêh. Mă đơ̆ng inh kiơ̆ tơdrong Yêsu Krist dang ei dôm tơdrong noh ưh pă yua kơ inh minh tơdrong kiơ.

⁸ Mă tơdrong kiơ đe khan yua, inh lăng ưh pă yua boih, yua kơ dôm tơdrong inh sơđơ̆ng kơ Yŏng inh Yêsu Krist kăl hloh kơ đĭ-đăng tơdrong noh. Inh hăt kơ kiơ̆ Sư lê̆ đĭ dôm tơdrong akâu inh sơđơ̆ng thoi lĕ kơ hla đuih đăm, wă kơ inh gơh sơng iŏk Yêsu Krist,

⁹ na jing pôm đon hăm Sư. Kuă boih gơnang kơ akâu inh kiơ̆ tôm tơdrong juăt; inh wă gơnang kơ Yêsu Krist đĕch, na 'Bok Kei-Dei jô̆ inh bơngai tơpăt.

¹⁰ Inh wă gơnang kơ Sư đĕch, Sư mơsêh mơyang tơpă, Sư iung arih đơ̆ng lôch boih. Yua kơ thoi noh na inh chu iŏk tơdrong pơmat, chu iŏk tơdrong lôch thoi Sư. Tơdrong lôch wă khan tơdrong so inh lê̆ đĭ boih, ưh pă 'bơ'blŏk dơ̆ng.

¹¹ Inh adrin thoi noh wă kơ ning-mônh inh iung arih thoi Sư.

Pôl adrin jang tôm tơdrong đêl Yêsu pơkă

¹² Mă-lei tôm tơdrong inh ưh tam mă pơm 'blep thoi 'Bok Kei-Dei ôh. Mă-lei lăm jơhngơ̆m klơm klak inh adrin tôch bơneh thoi bơngai kơdâu pơjei ră. Inh adrin khŏm khŏm wă kơ pơm tôm tơdrong đêl Yêsu pơkă kơ inh kơplah Sư iŏk inh sơ̆.

¹³ Ơ lu 'nhŏng oh, inh băt boih inh pơm ưh tam mă tôm dôm tơdrong 'noh; na inh ưh pă tơchĕng boih dôm tơdrong so, inh tơchĕng kơ tơdrong jang inh tơ anăp đĕch. Inh wă adrin thoi lu bơngai kơdâu pơjei adrin kơdâu tôch kơ anih đêl đe pơkă, wă kơ inh gơh iŏk dôm tơdrong 'Bok Kei-Dei apah inh.

¹⁴ Ning-mônh 'Bok Kei-Dei gô krao inh iŏk dôm tơdrong Sư apah inh tơ plĕnh ti yua kơ Yêsu Krist lôch tang inh. Thoi noh na inh adrin kơdâu truh tơ anih đêl Sư pơkă, wă kơ inh gơh iŏk dôm tơdrong Sư apah ei.

¹⁵ Thoi noh na dôm lu bơ̆n mă lui kơjăp boih bơ̆n athei tơchĕng kơ tơdrong 'noh ling-lang. Tơ̆ng iĕm tơchĕng phara kơ tơdrong 'noh, 'Bok Kei-Dei Sư tơ'bôh hloi kơ iĕm tơdrong 'noh, wă kơ iĕm kiơ̆ 'blep thoi tơdrong Sư.

¹⁶ Dôm tơdrong mă Sư tơbăt kơ bơ̆n boih, Sư wă kơ bơ̆n kiơ̆ mă 'blep, wei mă kơjăp khŏm khŏm.

¹⁷ Ơ lu 'nhŏng oh, iĕm athei kiơ̆ tơdrong thoi inh lui, hăm kiơ̆ thoi lu bơngai lui trŏ thoi nhôn.

¹⁸ Mă-lei iĕm kơchăng hli kơ lu bơngai khan sư lui kơjăp mă ưh kơ 'mêm kơ tơdrong Yêsu lôch tơ 'long pơglang. Đei lơ bơngai thoi noh dang ei, thoi inh roi kơ iĕm boih; mă-lei inh wă roi kơ iĕm dơ̆ng. Tơdrong lu sư pơm, inh sơ'ngon dêh, đon 'brơ̆k đak măt đơng wă hmoi hloi.

¹⁹ Lu sư pơm thoi noh, ning-mônh 'Bok Kei-Dei phak pơmat lu sư dêh. Lu sư 'mêm kơ klak lu sư, rŏ kơ klak yŏng na pơm thoi noh. Lu sư chă pơang kơ đe kiơ̆ tơdrong mă đe mơlâu. Đon lu sư tơchĕng ling-lang gah tơdrong ala teh.

²⁰ Mă-lei lu bơ̆n bơngai wă oei tơ plĕnh, lu bơ̆n ưh kơ gơh pơm thoi lu sư ôh, lu bơ̆n minh tơdrong chang gô 'Bok Dŏng Pơklaih wă jur ning-mônh đĕch, wă khan Kră Yang Yêsu Krist boih 'noh.

²¹ Sư gơh tơplih akâu bơ̆n đơ̆ng bơngai răm-'băm, jing thoi akâu Sư 'lơ̆ng rŏ; Sư gơh pơm tôm tơdrong yua kơ Sư mơsêh tăp pang mơyang tăp dăr.