Philip 1 - Sơ̆p Hlabơar Nơ̆r 'Bok Kei-Dei

Pơih nơ̆r pơma

¹ Inh Pôl, nhi Timôthê bơngai đĭch đam Yêsu Krist, chih hơpong kơ lu kon 'Bok Kei-Dei tơ Pơlei Philip, lu iĕm pôm đon hăm Yêsu Krist. Nhi chih hơpong kơ lu kră wei-lăng iĕm hăm lu bơngai jang lăm hnam 'Bok Kei-Dei.

² Inh krao khan apinh 'Bă tơm bơ̆n 'Bok Kei-Dei hăm Kră Yang bơ̆n Yêsu Krist wei-lăng iĕm tôm tơdrong wă kơ Sư ăn kơ iĕm hiôk-hian ling-lang.

Pôl bơnê kơ 'Bok Kei-Dei yua kơ Pơlei Philip tơgŭm sư

³ Mưh đon inh 'blŏk kơ iĕm, inh bơnê kơ 'Bok Kei-Dei.

⁴ Rim inh krao khan kơ 'Bok Kei-Dei, inh apinh Sư tơgŭm iĕm, na lăm jơhngơ̆m inh hiôk,

⁵ yua kơ iĕm tơgŭm inh đơ̆ng inh lăp pơtơm jang tơ pơlei iĕm sơ̆ khơ̆ dang ei.

⁶ 'Bok Kei-Dei jô̆ iĕm jing bơngai 'lơ̆ng boih, na inh băt tơpă Sư gô tơgŭm iĕm ling-lang truh tơ năr Yêsu Krist jur ning-mônh.

⁷ Đon inh tơchĕng kơ iĕm ling-lang trŏ mơ̆n, yua kơ inh 'mêm kơ iĕm dêh. Inh 'mêm kơ iĕm yua kơ iĕm tơgŭm inh lăm tơdrong jang 'Bok Kei-Dei kơplah đe oei phak inh hăm kơplah inh oei pơjah pơjăng hăm đe gah tơdrong 'nao 'lơ̆ng.

⁸ 'Bok Kei-Dei băt mơ̆n inh 'mêm kơ iĕm, kư̆m thoi Yêsu Krist 'mêm kơ iĕm.

Pôl krao khan kơ lu bơngai lui

^9-10 Inh krao khan apinh 'Bok Kei-Dei ăn kơ iĕm rai đunh rai băt 'mêm mơnat dih băl păng hlôh tôm tơdrong Sư, wă kơ iĕm băt kơ tơdrong trŏ iĕm sŏ iŏk, tơdrong glăi iĕm săi tŭk. Thoi noh na iĕm jing bơngai 'lơ̆ng tơpăt, huay kơ đei tơdrong yoch kơplah Yêsu Krist jur ning-mônh.

¹¹ Yua kơ iĕm pơm tôm tơdrong 'lơ̆ng tơpăt păng gơnang kơ Yêsu Krist đơ̆ng dang ei, na đĭ-đăng bơngai gô ư-ang kơ 'Bok Kei-Dei tơpă.

Mă đe phak Pôl, tơdrong Yêsu Krist rai kơtơ̆ng lơ bơngai nai

¹² Ơ lu 'nhŏng oh, inh wă roi tơbăt kơ iĕm tơdrong âu: Mă dang ei đe oei phak inh, tơdrong 'nao 'lơ̆ng Yêsu Krist rai kơtơ̆ng lơ bơngai nai. Ưh kơ sĭ inh pă gơh bơtho boih ôh. Đe phak inh rai pơyua inh gơh bơtho lơ lu bơngai mă oei tăp dăr kơ inh.

¹³ Na dang ei đĭ-đăng lu linh gak hnam 'bok pơtao, lu bơngai nai tă băt kơ đe phak inh yua kơ inh jang tơdrong Yêsu Krist.

¹⁴ Lu 'nhŏng oh bơ̆n mă oei tơ pơlei nhôn tơ âu, lu sư 'bôh inh bơtho đe nuih tơpă mă khan inh bơngai đe phak, mă lu sư rai đunh kư̆m rai băt gơnang kơ Kră Yang Yêsu, kư̆m rai nuih kơ bơtho đe tơdrong 'Bok Kei-Dei huay pă hli boih.

¹⁵ Đei lu mơ'nah bơtho tơdrong Yêsu Krist kư̆m nuih mơ̆n, mă lu sư bơtho tơgar yua kơ lu sư 'nhĕng inh đei bơngai lui lơ. Đei lu mơ'nah bơtho kiơ̆ kơ jơhngơ̆m sư hiôk,

¹⁶ sư bơtho tơpă mơ̆n yua kơ sư 'mêm kơ Yêsu tơpă păng sư kư̆m 'mêm kơ inh mơ̆n na sư bơtho tơgŭm inh. Lu sư băt kơ 'Bok Kei-Dei ăn kơ inh oei tơ hnam phak wă kơ inh pơjah pơjăng hăm đe gah tơdrong 'nao 'lơ̆ng.

¹⁷ Mă gah lu bơngai bơtho tơgar noh, lu sư bơtho yua kơ lu sư 'nhĕng inh đĕch na lu sư bơtho. Ưh kơ sĭ lu sư wă bơtho tơpă ôh. Lu sư bơtho pơ'nhĕng inh wă kơ inh sơ'ngon rai dêh kơplah đe oei phak inh âu.

¹⁸ Mă-lei huay ôh, mă lu sư bơtho tơpă dah lu sư wă bơtho pơ'nhĕng inh, kư̆ kơ lu sư bơtho tơdrong Yêsu Krist đĕch, inh kư̆m hiôk mơ̆n.

Mă arih mă lôch yua kơ pơang anăn Yêsu Krist

¹⁹ Mă đei tơdrong gleh truh kơ inh dang ei jơhngơ̆m inh oei hiôk ling-lang, yua kơ inh băt tơpă inh gô klaih yua kơ iĕm krao khan tơgŭm inh, na Yang Bơhngol 'Lơ̆ng Yêsu Krist gô tơgŭm inh tơpă.

²⁰ Inh adrin wă kơ inh huay kơ mơlâu kơ đe, na jơhngơ̆m inh oei nuih mă đơ̆ng sơ̆ khơ̆ dang ei. Inh pơư pơang anăn Yêsu kơ đe ling-lang; mă đe pơlôch inh kơnh pơgê, noh kư̆m yua kơ tơdrong inh pơư pơang anăn Yêsu, na inh huay kơ mơlâu kơ đe ôh.

²¹ Dah inh oei arih, inh oei pơư pơang kơ đe anăn Yêsu; dah inh lôch inh oei hơdai hăm Sư boih, 'noh rai hiôk hloh.

²² Dah inh oei arih, inh oei jang tơdrong Sư, oei yua khŏm khŏm. Na 'bar tơdrong 'noh inh ưh kơ băt wă iŏk mă ayơ. Tơdrong 'nâu kư̆m kăl, tơdrong 'noh kư̆m kăl.

²³ Na inh oei hơwơ̆l kơ 'bar tơdrong 'noh. Wă 'maih iŏk tơdrong lôch, hiôk ră boih oei hơdai hăm Yêsu Krist, mă ưh pă yua kơ iĕm boih.

²⁴ 'Maih iŏk gah tơdrong arih, kư̆m hiôk tơpă, kăl tơpă, yua kơ inh oei gơh jang tơgŭm iĕm, wă kơ iĕm lui kơjăp.

²⁵ Thoi noh inh băt kơ tơdrong arih inh, 'Bok Kei-Dei ăn arih đunh 'biơ̆, yua kơ Sư wă kơ inh oei hơdai hăm iĕm, wă kơ iĕm rai đunh rai lui kơjăp, rai chơt.

²⁶ Na iĕm gô ư-ang Yêsu Krist ăn kơ inh gơh năm tơ iĕm dơ̆ng.

²⁷ Mă-lei iĕm athei lui mă kơjăp, pơm kiơ̆ mă 'blep trŏ thoi tơdrong Yêsu Krist. Thoi noh na mă inh gơh năm tơ iĕm, mă ưh, inh gô kơtơ̆ng tơdrong iĕm lui kơjăp pơgơ̆p băl minh jơhngơ̆m minh đon jang tơdrong Yêsu Krist na jơhngơ̆m inh hiôk.

²⁸ Păng iĕm 'nĕ kơ hli kơ lu bơngai ayăt kơ iĕm. Lu bơngai ayăt băt kơ iĕm ưh kơ hli kơ lu sư, na lu sư băt kơdih bơngai 'Bok Kei-Dei wă phak, băt kơ iĕm bơngai 'Bok Kei-Dei huay kơ hil.

²⁹ 'Bok Kei-Dei 'mêm kơ iĕm na Sư ăn kơ iĕm lui kơ Yêsu, mă ưh kơ sĭ Sư ăn kơ iĕm lui kơ Yêsu lui hiôk, kơkuh kơ Sư kơkuh hiôk đĕch ôh. Sư wă kơ iĕm pơư pơang kơ đe anăn Yêsu Krist mă tơpă, na mă Sư kư̆m ăn kơ iĕm pŭ pơmat tơdrong Yêsu mơ̆n.

³⁰ Iĕm kư̆m đei boih tơdrong đe pơm kơnê̆ kơ iĕm, thoi iĕm 'bôh đe pơm kơnê̆ kơ inh tơ pơlei iĕm sơ̆, hăm đe pơm kơnê̆ kơ inh dang ei mơ̆n.