Nhom 5 - Sơ̆p Hlabơar Nơ̆r 'Bok Kei-Dei

Nơ̆r krao khan đơ̆ng kon pơlei đe pơjuă pơđep

¹ Ơ Kră Yang, apinh Ih 'blŏk tơdrong truh kơ lu nhôn. Lăng bĕ tơdrong đe pơmat lu nhôn!

² Tơdrong jang sư lu nhôn tă tơ ti lu kon pơlei tơmoi ngăl. Hnam oei lu nhôn đĭ tơ lu adrĕch adrung nai.

³ Lu nhôn jing mơti 'bă. Mĕ lu nhôn jing adro po.

⁴ Đak lu nhôn nhă athei ăn jên, 'Long ŭnh kư̆m athei răt

⁵ Lu bơngai druh lu nhôn tam boih, Rôp juă hơko lu nhôn; Lu nhôn rơmơ̆n dêh boih, đe pă đei ăn nhôn pơdơh!

⁶ Lu nhôn chro ti tơ lu bơngai Êyiptơ, păng bơngai Asiri, wă kơ đei tơmam sŏng sa phĭ mah.

⁷ 'Bok yă lu nhôn pơm yoch boih, dang ei lu sư lôch đĭ boih. Lu nhôn pŭ iŏk tơdrong kơnê̆ lu sư.

⁸ Lu đĭch đam nhôn pơgơ̆r lu nhôn; Ưh kơ đei bu dŏng pơklaih nhôn đơ̆ng ti lu sư.

⁹ Lu nhôn hiong akâu 'mơ̆i na đei tơmam sŏng sa. Yua kơ đao gưm tơ tơmăn glă oei răp wă pơlôch nhôn.

¹⁰ Akar lu nhôn tŏ thoi tŏ tơnuh ŭnh, Yua kơ đơ̆ng pơngot soh chhông lu nhôn.

¹¹ Lu sư đei pơgŏ lu drŏ-kăn tơ Siôn, Păng lu adruh hle tơ rim pơlei tih char Juđa.

¹² Đe chô̆ atol yŏng lu nhôn, Ưh pă pơyom boih kơ lu kră.

¹³ Lu tơdăm đe pơgŏ tôi tơpăl, lu hơ'lơ̆p tôi 'long ŭnh pơ̆k tơ ala 'long ŭnh.

¹⁴ Lu kră drŏ-nglo pă đei ngôi pơđâu 'bơ̆t 'măng jang pơlei tih, Lu tơdăm 'lơ̆p pă đei reh brŏ hơri.

¹⁵ Tơdrong chơt hiôk pă đei lăm jơhngơ̆m; Tơdrong suang pơchơt jing ơh sơ'ngon;

¹⁶ Môk pơtao pơlôch boih đơ̆ng kơ̆l lu nhôn, Lu nhôn pơmat-tat dêh, yua kơ lu nhôn pơm yoch!

¹⁷ Yua kơ tơdrong âu jơhngơ̆m lu nhôn hơngơ̆t, Yua kơ tơdrong âu măt lu nhôn hrŏ.

¹⁸ Yua kơ kông Siôn jing juơ rơhiăng, Kŏ bri yak rok noh.

¹⁹ Ơ Kră Yang, Ih pơgơ̆r oei đei ling-lang, Tang-dŏ pơtao Ih đơ̆ng chăl âu truh tơ chăl nai.

²⁰ Liơ Kră Yang hiơt kơ lu nhôn ling-lang boih hă? Liơ Ih achăng lê̆ lu nhôn đunh đang?

²¹ Ơ Kră Yang, dui tơwih lu nhôn brŏk tơ Ih bĕ, na lu nhôn gơh brŏk, Pơm ming năr lu nhôn jing 'nao thoi sơ̆.

²² Dah Ih kư̆m oei achăng lu nhôn ling-lang. Ih oei hil kơ lu nhôn hơnơ̆ng hă?