Nhom 3 - Sơ̆p Hlabơar Nơ̆r 'Bok Kei-Dei

Tơdrong pơmat chang gô Kră Yang 'Bok Kei-Dei mơnat

¹ Inh 'bôh boih tơdrong pơmat-tat, Đơ̆ng 'long jra tơdrong Sư hil.

² Sư ba păng chông yak năm lăm măng mu! Ưh kơ đei hơdah ôh.

³ Sĭt Kră Yang yơ̆r ti pơm kơ inh rim năr.

⁴ Sư pơm kơ sĕch inh hơđang, akar inh tơhek păng kơting inh tơgơ̆.

⁵ Sư pơm kơnê̆ wang inh păng gom inh hăm tơdrong ơh sơ'ngon pơmat-tat.

⁶ Sư ăn kơ inh oei lăm anih măng mu, thoi bơsat lăm dêh atâu.

⁷ Sư war tăp kơ inh păng dur man, na inh lĕch ưh kơ gơh, Sư chô̆ inh păng glang trăp.

⁸ Mă inh ôr krao apinh dŏng, Kră Yang chĭt đon ưh kơ wă mơ̆ng nơ̆r inh kro khan;

⁹ Sư iŏk tơmo klơ̆p lê̆ trong inh; Sư pơm kơ trong inh đŏng đĕo.

¹⁰ Sư răp inh thoi chơgơu, Thoi dăm-brang arum chă sa.

¹¹ Pơm kơ inh wơ̆l păng hek hok inh, pơm kơ inh pơmat dêh.

¹² Sư gŭt hră sư dan inh wă pơm tơmam sư prah pơđam.

¹³ Sư iŏk 'brơ̆m đơ̆ng jŏ Sư prah 'bơm han lăm plei nuih inh.

¹⁴ Inh jing bơngai pơm pơhiĕk kơ kon pơlei inh, lu sư hơri pơjăm inh rim năr.

¹⁵ Sư tơ'bĕnh kơ inh chhŭr nuih, Sư ăn kơ inh phĭ tăng hơ̆-hang.

¹⁶ Sư iŏk boih tơmo teng hơnĕnh inh, tơmôch inh lăm tơnuh.

¹⁷ Sư pơm kơ bơhngol inh ataih đơ̆ng tơdrong hiôk-hian, Inh hiơt đĭ boih tơdrong pŭn hiôk.

¹⁸ Inh khan: Đĭ jơhngơ̆m đon inh, Đĭ jơhngơ̆m chang gô Kră Yang.

¹⁹ 'Blŏk bĕ kơ tơdrong pơmat-tat inh, Hla tăng păng đak sut tăng.

²⁰ Bơhngol inh oei 'blŏk păng hach răm inh.

²¹ Inh 'blŏk kơ tơdrong noh, thoi noh đei tơdrong chang hơmĕng.

²² Noh jơ̆ tơdrong mơnat đơ̆ng Kră Yang. Na lu bơ̆n oei arih, tơdrong 'mêm Sư ưh kơ đei layơ tôch;

²³ Rim pơgê jing 'nao plơ̆ng, tơdrong pơmat Sư tih tơpă.

²⁴ Bơhngol inh khan: Kră Yang jơ̆ tơdrong jang sa inh, Na jơhngơ̆m inh gơnang kơ Sư.

²⁵ Kră Yang ăn tơdrong Sư 'mêm mơnat kơ lu bơngai mă chang gô Sư, ăn kơ lu bơhngol mă krao chă Sư.

²⁶ 'Lơ̆ng dêh bơngai bu chang gô păng kĕ ĕnh gô tơdrong dŏng pơklaih đơ̆ng Kră Yang.

²⁷ 'Lơ̆ng dêh bơngai bu tung 'long ăt đơ̆ng sư oei 'lơ̆p.

²⁸ Trŏ, sư athei ngôi minh drô̆ păng ngăn, yua kơ Kră Yang đei dan boih 'long ăt tơ sư.

²⁹ Sư athei kŭp muh măt sư lăm 'mui teh! Yua kơ đei hơmĕng.

³⁰ Sư athei ăn meng sư kơ đe tap, chu iŏk bĕ tơdrong kơdơ̆ mơlâu.

³¹ Yua kơ Kră Yang ưh kơ đei achăng hlŏng hloi.

³² Mă khan Sư đei pơm kơ inh ơh sơ'ngon gô đei tơdrong 'mêm mơnat tih 'bĕnh blai.

³³ Yua kơ noh ưh kơ sĭ đơ̆ng Kră Yang pơm ăn kơ kon bơngai pơmat-tat păng ơh sơ'ngon.

³⁴ Kơplah đe pơjuă lu bơnă lăm teh, đĭ-đăng bơnă lăm rim dêh char.

³⁵ Wă sơngah tơpăt kơ minh 'nu bơngai 'bơ̆t anăp Kră Yang tih hloh.

³⁶ Wă sek tơlang pơgâm kơ minh 'nu bơngai tơpăt, năr Kră Yang sek tơlang, na Kră Yang ưh kơ lăp ôh.

³⁷ Tơdah ưh kơ đei Kră Yang athei, bơngai bu pơ̆n pơma khan tơdrong noh gô jing?

³⁸ Hăm trŏ lĕch đơ̆ng 'bơ̆t Kră Yang tih hloh, mă đei pơmat-tat dah pŭn hiôk?

³⁹ Yua kơ kiơ mă bơngai oei arih oei jŏk roi, yua kơ pŭ phak đơ̆ng tơdrong yoch sư kơdih.

⁴⁰ Bĕ bơ̆n lăng trong bơ̆n kơdih, na wih brŏk tơ Kră Yang.

⁴¹ Lu bơ̆n athei yơ̆r ti pôk hơtŏk jơhngơ̆m truh tơ 'Bok Kei-Dei kơpal plĕnh.

⁴² Lu nhôn pơm yoch, pơđâu blah; Ih ưh pă mơnat ăn boih.

⁴³ Ih gom akâu hăm tơdrong blĕk păng druh pơlôch goh lu nhôn, ưh pă đei mơnat.

⁴⁴ Ih ôn akâu Ih lăm hơmơ̆l, dĭng mah nơ̆r nhôn krao khan pă klĕch truh tơ Ih.

⁴⁵ Ih pơm ăn kơ lu nhôn jing tơmam tŭk lê̆, thoi hla đuih đăm lăm kon pơlei.

⁴⁶ Lu bơngai ayăt ha 'bơ̆r lu sư sa, wă pơm kơnê̆ hăm lu nhôn.

⁴⁷ Lu nhôn đei hloi tơdrong hli tơrơ, Hơlŭng tơdrong pơlôch păng hư răm.

⁴⁸ Đak măt inh lĕch ro thoi đak, yua kơ kon adruh inh đe pơlôch.

⁴⁹ Măt inh đak măt lĕch ro pă pơdơh, kư̆m ưh kơ păt;

⁵⁰ Dĭng truh dang yơ Kră Yang đơ̆ng plĕnh ti nger lăng?

⁵¹ Măt inh 'bôh pơmat bơhngol inh, yua kơ tơdrong truh kơ kon pơlei inh.

⁵² Lu bơngai pơm kơ inh tơdrong ưh kơ đei, Druh prah inh thoi druh prah sem.

⁵³ Lu sư 'maih pơlôch inh tơ lăm măng mu păng klơ̆m tơmo kơ inh.

⁵⁴ Đak lơ̆p kơ̆l inh, inh khan: Inh wă lôch boih!

⁵⁵ Ơ Kră Yang, inh đơ̆ng lăm sơlŭng jrŭ anih măng mu ôr krao anăn Ih.

⁵⁶ Ih kơtơ̆ng boih nơ̆r inh, 'nĕ kơ chĭt đon Ih kơ nơ̆r inh krao apinh Ih.

⁵⁷ Năr inh krao Ih, Ih năm jê̆ inh boih, đei khan boih kơ inh: 'Nĕ kơ hli kơ kiơ!

⁵⁸ Ơ Kră Yang, Ih tơgŭm boih inh, Ih dŏng pơklaih boih tơdrong arih inh.

⁵⁹ Ơ Kră Yang Ih 'bôh boih đe pơjuă pơđep inh. Apinh Ih sek tơlang tơdrong inh.

⁶⁰ Lu sư 'mong, pơđâu wă pơm pơrăm inh, Na Ih 'bôh boih.

⁶¹ Ơ Kră Yang, Ih kơtơ̆ng boih lu sư pơm kơnê̆, chă đon lơ tơdrong wă pơm kơ inh.

⁶² Dôm lu ayăt kơ inh, pơđâu wă pơm kơnê̆ păng pơrăm inh rim năr.

⁶³ Apinh Ih lăng 'bơ̆t lu sư hơ-oei, dah iung, lu sư hơri pơjăm pơjuă inh.

⁶⁴ Ơ Kră Yang, Ih gô pơm tơwih kơ lu sư thoi tơdrong đêl lu sư pơm.

⁶⁵ Ih gô ăn jơhngơ̆m lu sư arăng, Apinh Ih hiap lu sư.

⁶⁶ Ih iŏk tơdrong hil păng druh pơrăm lu sư đơ̆ng teh ala plĕnh Ih Kră Yang.