Nhom 2 - Sơ̆p Hlabơar Nơ̆r 'Bok Kei-Dei

Roi tơdrong pơrăm pơlei tih Jêrusalem

¹ Yua kơ kiơ Ih hil thoi hơmơ̆l gom kon adruh Siôn? Sư klơ̆m hŭt lê̆ tơdrong ư-ang Isơrael đơ̆ng plĕnh tơ teh. Lăm năr Sư hil, Sư ưh pă đei 'blŏk boih 'long đêl Sư hơgơn jơ̆ng.

² Kră Yang pơrăm boih, ưh pă đei mơnat, đĭ-đăng anih Jakôp oei. Đơ̆ng tơdrong Sư hil teh pơchah kơđông kơjăp kon adruh Juđa; Sư teh tơjruh tơ teh, pơm kơ lu teh đak sư hăm lu kră pơgơ̆r lăm char sư mơlâu.

³ Lăm năr Sư hil, Sư ret đĭ hơke Isơrael Sư dui lê̆ ti 'ma Sư boih 'bơ̆t anăp lu ayăt.

⁴ Sư gŭt hră thoi lu ayăt, yơ̆r ti 'ma Sư pơm thoi lu bơngai wă blah; Sư pơlôch boih dôm bơngai pơhiôk kơ măt, Lăm anih kon adruh Siôn, Sư tuh tơdrong hil thoi ŭnh.

⁵ Kră Yang jing thoi bơngai ayăt, pơrăm boih Isơrael. Pơrăm đĭ hnam pơtao, pơrăm đĭ kơđông pơm ăn kơ kon adruh Juđa ơh sơ'ngon nhơ̆m hmoi.

⁶ Sư hơ'nglơh lê̆ pơk sư, thoi pơk lăm pơgar, Kŭm đei pơrăm anih lu sư juăt kơ akŭm. Tơ Siôn, Kră Yang pơm ăn kơ lu sư hiơt đĭ kơ năr akŭm tih păng năr Sa'bat.

⁷ Kră Yang hŭt lê̆ boih gơ'bang soi păng kư̆m achăng lê̆ anih rơgoh Sư. Sư jao boih hnam pơtao kơ lu ayăt, Lu sư ôr tơkĕch tơjrông tơjrang lăm hnam Kră Yang, Thoi năr đe et sa tih.

⁸ Kră Yang đei pơkă wă pơrăm dur kon adruh Siôn, Sư dăng boih tơlei hơgăt, Sư ưh tam mă đei layơ pơdơh ti pơrăm đe noh, Sư pơm dur wă pĕng păng dur pơlei nhơ̆m hmoi.

⁹ Lu 'măng jang tơkơ̆l đĭ tơ teh păng gơ̆ lê̆ chơkăl sư; Pơtao hăm lu kră pơlei oei hơdai hăm lu kon pơlei, Jing anih ưh pă đei khôi juăt! Lu 'bok khan lê̆ adrol ưh pă đei 'bôh păng pă đei kơtơ̆ng boih nơ̆r Kră Yang.

¹⁰ Lu Kră lu kon adruh Siôn tơoei tơ teh ưh pă đei pơma kiơ. Lu sư pung tơnuh tơ kơ̆l, hrŭk 'bi nai pơm hơbĕn ao; Lu kon adruh Isơrael kŭp kơ̆l truh tơ teh.

¹¹ Măt inh đĭ hrŏ yua kơ đak măt lĕch, jơhngơ̆m inh rŭng răng. Păng huŏng tơ teh, Yua kơ đơ̆ng đe pơrăm kon adruh pơlei inh. Yua kơ lu kon hơ'lơ̆p, yua kơ lu kon nge hơngơ̆t tơ rok trong lăm pơlei tih.

¹² Lu sư chă khan hăm mĕ lu sư thoi âu: Chă tơmam sa păng sik hơmu tơ yơ? Kơplah lu hơ'lơ̆p sư rơmơ̆n pơngot thoi đe rơka tơ rok trong pơlei tih, Păng 'bơ̆t lu sư kơtĕch jơhngơ̆m 'bơ̆t kơtơh mĕ lu sư kơdih.

¹³ Liơ inh gơh pơting hăm iĕm, Wă kơ gơh pơlung iĕm; Ơ kon adruh pơlei Siôn? Yua kơ rơka lu iĕm jrŭ thoi đak dơsĭ. Bu wă gơh ming klaih?

¹⁴ Lu bơngai khan lê̆ adrol iĕm 'bôh boih tơdrong hơlĕnh păng chă pơhlŭ iĕm. Lu sư ưh kơ đei tơ'bôh tơdrong yoch iĕm ôh, wă kơ lu iĕm huay kơ pơm bơnă. Tơ'bôh ăn kơ lu iĕm khan lê̆ adrol hơlĕnh păng chă pơhlŭ wă pơrăm iĕm.

¹⁵ Lu bơngai yak rok trong 'bôh iĕm lu sư tap ti, Hiĕk ăr tơtreh kơ̆l, Yua kơ 'bôh kon adruh Jêrusalem, Hăm trŏ kơ 'nâu pơlei tih mă đe khan pơlei tih pơlei 'lơ̆ng rŏ, đei chơt hiôk kơjăp kơ teh đak?

¹⁶ Dôm lu ayăt kơ iĕm ha 'bơ̆r khan kơ iĕm, Hiĕk achơ̆, kăp hơnĕnh, thoi âu: Lu bơ̆n luăn lê̆ sư boih! 'Nâu trŏ boih năr mă lu bơ̆n chang gô,

¹⁷ Kră Yang pơm boih dôm đêl sư pơkă, Pơm keh boih mă sư kơdih đei khan lê̆; thoi sư đei pơkă lê̆ đunh boih. Sư tơhuŏng lê̆ iĕm ưh pă đei mơnat boih, Đei ăn boih kơ lu ayăt chơt hiôk, yua kơ iĕm, pơm ăn hơke lu ayăt tưk kơjung.

¹⁸ Jơhngơ̆m kon pơlei ih ôr krao truh tơ Kră Yang, Ơ dur pơlei kon adruh Siôn, Ăn bĕ đak măt iĕm ro thoi đak glung. Iĕm 'nĕ pă pơhơi; măt iĕm lăng 'nĕ pă pơdơh.

¹⁹ Iung ôr krao bĕ kơmăng, thoi đe pơtơm gak kơmăng. Tuh bĕ jơhngơ̆m iĕm thoi đak 'bơ̆t anăp Kră Yang. Yơ̆r bĕ ti gah Kră Yang yua kơ tơdrong arih lu kon hơ'lơ̆p iĕm, lu sư lôch hơngơ̆t yua kơ pơngot tơ mum kơ̆l trong tih.

²⁰ Ơ Kră Yang, apinh Ih lăng lăng! Ih tam đei pơm kơ bu thoi noh? Drŏ-kăn hăm trŏ kơ sư plei đơ̆ng lăm klak sư kơdih, wă khan lu kon hơ'lơ̆p mă oei pôk lăm ti sư hă? Bơngai khan lê̆ adrol hăm 'bok soi, hăm trŏ đe pơlôch lăm anih Kră Yang?

²¹ Lu kon hơ'lơ̆p păng lu kră 'bĭch sơ̆k tơ teh rok trong lăm pơlei tih. Lu adruh 'lơ̆p păng tơdăm 'lơ̆p inh pơ̆k lôch kơ đao gưm. Lăm năr Ih hil, Ih pơlôch lu sư boih, Ih pơlôch pă đei mơnat.

²² Ih ăn tơdrong hli krưp truh tăp dăr kơ inh, Thoi Ih pơtơm bơngai wă năm sŏng sa tih. Lăm năr Kră Yang hil, ưh kơ đei bu klaih hlôi, kư̆m ưh kơ đei bu arih. Dôm lu bơngai mă inh đei pôk kơ'mĭn păng 'me rong, Linh ayăt pơlôch pơrăm đĭ boih.