Ne 6 - Sơ̆p Hlabơar Nơ̆r 'Bok Kei-Dei

Khŭl nai ayăt kơ Nêhêmi

¹ Tơdah đe roi Sanbalat, Tôbia, Gêsem, bơngai Arâp păng lu ayăt kơ lu nhôn nai, băt kơ inh man hơmet ming dur boih, ưh pă đei bơlôh ayơ dơ̆ng, mă khan inh tam mă pơm lu 'măng iĕ tơ 'măng jang.

² Na Sanbalat păng Gêsem, wơh bơngai năm truh tơ inh khan: Năm bĕ bơ̆n gô tơ'bơ̆p băl lăm minh pôm pơlei ayơ tơ thŭng Ônô,a mă-lei lu sư chă đon wă pơrăm inh.

³ Inh wơh bơngai jang năm truh khan kơ lu sư thoi âu: Inh đei tơdrong jang kăl ưh kơ wăn năm, liơ mă inh gơh lê̆ tơdrong jang na jur năm tơ lu iĕm?

⁴ Lu sư wơh bơngai năm truh tơ inh puăn 'măng hloi, mă-lei inh khan lei-lăi ưh kơ wăn năm.

⁵ 'Măng mă pơđăm, Sanbalat wơh minh 'nu bơngai đĭch sư kư̆m năm thoi adrol, đei chĕp kơthơ mă ưh kơ 'blir lê̆ kơthơ noh.

⁶ Lăm kơthơ đei chih thoi âu: Lăm lu adrĕch adrung ih đei kơtơ̆ng ang păng Gêsem khan thoi âu: Ih hăm lu bơngai Juđa chă đon wă blơ̆ teh đak; yua kơ thoi noh na ih oei man hơmet ming dur; đei kơtơ̆ng nơ̆r khan ih 'maih wă pơm pơtao lu sư.

⁷ Ih kư̆m đei pơjing lu bơngai khan lê̆ adrol wă bơtho ră roi gah ih tơ lăm pơlei Jêrusalem khan: Đei minh 'nu pơtao lăm dêh char Juđa, đe gô pơtruh dôm nơ̆r âu kơ pơtao, 'lơ̆ng hloh năm bĕ wă kơ lu bơ̆n đei pơma dơnuh.

⁸ Inh wơh bơngai năm khan kơ sư thoi âu: “Dôm tơdrong ih khan noh, ưh kơ đei bơngai bu pơm ôh; noh đơ̆ng lăm jơhngơ̆m ih chă pơm đĕch.”

⁹ Yua kơ lu sư wă tơhli lu nhôn; inh păng đĭ-đăng nhôn hli; lu sư khan: Ti lu sư gô gleh lap, ưh pă gơh jang dơ̆ng, na dang ei hloi, ơ Kră Yang pơm bĕ kơ ti inh jing pran.

¹⁰ Đơ̆ng noh, inh mơ̆t lăm hnam Sêmaia kon drŏ-nglo Đêlaia, sâu Mêhatabêl bơngai đe chĭt sư boih khan: Lu bơ̆n athei tơ'bơ̆p băl lăm hnam Kră Yang 'Bok Kei-Dei, lăm tŏk-bŏk hnam akŭm, đơ̆ng noh lu bơ̆n gô tang lê̆ 'măng hnam akŭm, yua kơ lu sư wă năm pơlôch ih; lu sư chă đon truh wă pơlôch ih kơmăng.

¹¹ Inh khan: Minh 'nu bơngai thoi inh âu wă kơdâu ôn hă? Bơngai bu thoi inh âu mơ̆t lăm hnam akŭm na mă gơh arih hă? Inh ưh kơ mơ̆t ôh.

¹² Inh lăng băt ưh kơ trŏ Kră Yang 'Bok Kei-Dei wơh sư năm ôh, mă-lei sư pơma nơ̆r khan lê̆ adrol noh ayăt kơ inh. Yua kơ Tôbia păng Sanbalat đei yua sư noh.

¹³ Yua kơ tơ noh. Đe apah jên wă pơm kơ inh hli, wă pơhlŭ inh pơm yoch, wă gơh roi tơdrong kơnê̆ păng wă pơm kơnê̆ kơ inh.

¹⁴ Ơ! Kră Yang 'Bok Kei-Dei inh! Apinh Ih 'blŏk kơ bre Tôbia păng Sanbalat kiơ̆ thoi tơdrong 'nâu mă bre sư đei pơm boih; kư̆m apinh Ih 'blŏk kơ Nôđia, bơngai drŏ-kăn khan lê̆ adrol păng lu bơngai khan lê̆ adrol nai kư̆m 'maih wă pơm kơ inh hli tơrơ!

¹⁵ Thoi noh, năr 'bar-jĭt pơđăm khei Êlun dur pơlei man hơmet keh, đĭ pơđăm-jĭt 'bar năr.

¹⁶ Tơdah lu bơngai ayăt kơ lu nhôn băt dôm tơdrong noh, na lu kon pơlei oei tăp dăr kơ lu nhôn kư̆m hli tơrơ păng jơhngơ̆m ưh kơ hiôk; yua kơ lu sư băt tơdrong jang âu gơh keh jing đơ̆ng Kră Yang 'Bok Kei-Dei lu nhôn.

¹⁷ Kŭm lăm năr noh, đei lu bơngai mơdrŏng dêh char Juđa pơtruh chih kơthơ lơ ăn kơ Tôbia păng Tôbia kư̆m tơl nơ̆r chih tơwih kơthơ ăn kơ lu sư.

¹⁸ Yua kơ tơ lăm dêh Juđa đei lơ bơngai drơ̆ng pơkă wă pơgơ̆p hăm sư, sư ŏng Sêkania, kon drŏ-nglo Arah; păng Jêhôhanan, kon drŏ-nglo sư, iŏk akăn kon Mêsulam, kon drŏ-nglo Bêrekia.

¹⁹ Lu sư kư̆m pơma roi 'bơ̆t anăp inh dôm lu tơdrong jang 'lơ̆ng păng lu đe noh roi dơ̆ng kơ sư đêl dôm nơ̆r inh pơma. Gah Tôbia chih tơwih kơthơ wă pơm ăn kơ inh hli tơrơ.