Ne 4 - Sơ̆p Hlabơar Nơ̆r 'Bok Kei-Dei

Lu bơngai ayăt pơrăm adrĕch Juđa

¹ Tơdah Sanbalat băt kơ nhôn man hơmet ming dur pơlei dơ̆ng, na sư hil blĕk dêh păng hiĕk ăr kơ bơngai Juđa.

² Sư khan 'bơ̆t anăp lu 'nhŏng oh sư păng lu linh char Samari; lu bơngai Juđa rơdu tơrăn ei pơm kiơ? Lu sư tơchĕng khan kĕ man ming dur pơlei ei hă? Lu sư khan wă pơyơ̆r tơmam soi hă? Lăm minh năr lu sư gô pơm keh hă? Tơmo đêl ŭnh sa đĭ boih, lu sư hăm wă gơh iŏk đĭ jing 'mui teh pơm pơjing thoi tơmo dơ̆ng hă?

³ Tôbia, bơngai Ammôn, oei dơ̆ng 'bơ̆t cheng sư khan: Dur mă lu sư man păng tơmo thoi noh tơdah đei mơja tŏk hao kư̆m păk pơchah đĭ.

⁴ Ơ Kră Yang 'Bok Kei-Dei lu nhôn ơi! Mơ̆ng bĕ; yua kơ lu nhôn đe pơjăm, apinh Ih tuh bĕ tơdrong ưh kơ hiôk lu sư tơ kơpal kơ̆l lu sư; păng jao ăn bĕ kơ lu sư pơm bơnă kơ teh đak đe.

⁵ 'Nĕ kơ đơ̆p lê̆ tơdrong kơnê̆ lu sư, 'nĕ kơ sŭt lê̆ tơdrong yoch lu sư 'bơ̆t anăp Ih; yua kơ 'bơ̆t anăp Ih lu bơngai man dur, lu sư tơblĕk Ih.

⁶ Thoi noh lu nhôn man hơmet dur pơlei dơ̆ng, lu dur tơklep tơlir băl kơjung truh kơ minh puăt, yua kơ kon pơlei adrin 'maih jang.

⁷ Mă-lei tơdah Sanbalat, Tôbia lu bơngai Arâp, kon pơlei Ammôn păng kon pơlei Asdôt băt kơ tơdrong jang pơm hơmet ming dur pơlei Jêrusalem rai tŏk 'net 'net, lu bơlôh pơchah man hơmet ming 'lơ̆ng na lu sư blĕk păng hil dêh.

⁸ Na krao akŭm băl đĭ-đăng wă năm blah pơlei Jêrusalem păng wă pơrŭng lu nhôn hơwơ̆l hơwang.

⁹ Mă-lei lu nhôn krao khan apinh Kră Yang 'Bok Kei-Dei lu nhôn păng rơih chă bơngai kral gak kơmăng kơ'năr wă găn lu sư.

¹⁰ Bơngai Juđa khan: Đei lơ tơmo gŏch pơchah na jơhngơ̆m lu bơngai tung hơnong pơdŭ đĭ gleh lap boih; lu nhôn ưh pă kĕ gơh man dur pơlei dơ̆ng.

¹¹ Lu bơngai areh kơ lu nhôn khan thoi âu: Lu sư gô ưh kơ băt ưh kơ 'bôh dôm tơdrong noh, gô dĭng lu bơ̆n truh tơ lăm lu sư, pơlôch đĭ lu sư păng pơm kơ lu sư pơdơh kơ tơdrong jang.

¹² Mă-lei kon pơlei Juđa oei hơdai hăm lu sư, truh tơ mơjĭt wơ̆t đei roi tơbăt ăn kơ lu nhôn thoi âu: Đei lu ayăt đơ̆ng puăn pah mum gô truh wă blah lu bơ̆n.

¹³ Inh pơm pơjing lu kơđông tơ ala pah rŏng kơ dur pơlei păng tơ lu anih rơhơi; inh dan kon pơlei kiơ̆ kơ adrĕch adrung tơ noh đei chĕp đao hơlă păng hră.

¹⁴ Inh iung chă lăng păng pơma dơnuh hăm lu bơngai mơdrŏng, lu bơngai pơm kuan tih păng lu kon pơlei thoi âu: 'Nĕ kơ hli kơ lu sư; athei 'blŏk kơ Kră Yang Tih Hloh păng trŏ kơ pơyom kơkuh, adrin tơblah dŏng lu 'nhŏng oh, dŏng kon tơdăm kon adruh lu bơ̆n, dŏng akăn păng hnam dơnŏ lu bơ̆n.

¹⁵ Tơdah lu ayăt kơ lu nhôn băt kơ lu nhôn băt kơ tơdrong noh păng Kră Yang 'Bok Kei-Dei pơrăm lê̆ boih tơdrong tơchĕng lu sư, thoi noh lu nhôn wơ̆t bơ̆jang man dur dơ̆ng rim 'nu kư̆m wơ̆t bơ̆jang tơdrong jang sư kơdih.

¹⁶ Đơ̆ng năr noh minh puăt lu đĭch đam inh bơ̆jang man pơdơ̆ng oei minh puăt lu sư chĕp hơlă khêl đao hră, hrŭk ao bơsei gak; lu kră wei-lăng mơ̆t dơ̆ng tơgŭm gah rŏng lu adrĕch Juđa.

¹⁷ Lu bơngai mơ'nah man hơmet ming dur, lu bơngai mơ'nah tung hơnong pơdŭ păng lu bơngai hơtŏk tơ kơpal, minh pah ti bơ̆jang minh pah ti chĕp tơmam tơblah.

¹⁸ Lu bơngai man hơmet, rim 'nu kư̆m đei đao lu sư kơdih tơ̆n tơ kơiĕng, đơ̆ng noh man hơmet; bĕ lu bơngai hlôm keng ngôi 'bơ̆t jê̆ inh.

¹⁹ Inh khan kơ lu bơngai mơdrŏng, lu pơm kuan tih păng kon pơlei pơla mă oei đei, thoi âu: Tơdrong jang tih să păng kơjung lu bơ̆n jang ataih băl bu tơ âu, bu tơ to.

²⁰ Tơ anih ayơ lu iĕm kơtơ̆ng đe hlôm keng, na akŭm pơpôi băl tơduă lu iĕm tơ noh; Kră Yang 'Bok Kei-Dei lu bơ̆n gô blah dŏng lu bơ̆n.

²¹ Lu nhôn bơ̆jang thoi noh; minh puăt lu sư chĕp đao hơlă đơ̆ng hrôih truh tơ rang khei kơmăng.

²² Lăm kơplah noh, inh kư̆m pơma hăm kon pơlei thoi âu: Rim 'nu hơdai hăm lu bơngai đĭch sư kơdih tep kơmăng lăm pơlei Jêrusalem, kơmăng athei gak kơchăng, păng kơ'năr bơ̆jang.

²³ Inh, lu 'nhŏng oh inh, dôm lu bơngai đĭch đam inh, hăm lu linh wei gak kiơ̆ inh hai, ưh kơ đei bơngai bu mă gơh plôh ao lu sư, rim 'nu 'băk khêl đao, hơlă tơmam tơblah sư kơdih.