Ne 3 - Sơ̆p Hlabơar Nơ̆r 'Bok Kei-Dei

Man hơmet ming dur pơlei Jêrusalem

¹ Êliasip 'bok soi tơm hăm lu 'nhŏng oh sư 'bok soi nai iung man pơdơ̆ng ming 'măng jang Triu. Lu sư 'măn anih noh 'lơ̆ng rơgoh păng pơm 'bar pah tơnang 'măng lu sư 'măn anih noh 'lơ̆ng rơgoh truh tơ hnam Thôt Mêa păng truh tơ hnam Thôt Hananêl.

² Tơtil Êliasip bơngai pơlei Jêrikô man; tơtil lu đe noh Saku, kon drŏ-nglo Imri man:

³ Kon sâu Hasêna man 'măng jang Ka, lu sư pơm jrăng păng tơnang 'măng păng chơkăl.

⁴ Tơtil lu đe noh Mêrêmôt, kon drŏ-nglo Uri, sâu kơ Hakkôs man hơmet, tơtil lu đe noh, Mêsulam kon drŏ-nglo Bêrekia, sâu Mêsêsabeh man hơmet, tơtil lu đe noh Sađôk, kon drŏ-nglo Baana man hơmet.

⁵ Tơtil lu đe noh, lu bơngai pơlei Têkôa man, mă-lei gah lu bơngai mơdrŏng lu sư kuă kơ bơ̆jang tơgŭm ôh kơ lu yŏng sư kơdih.

⁶ Jôiađa kon drŏ-nglo Pasêa păng Mêsulam, kon drŏ-nglo Bôsôđeia man hơmet ming lu 'măng jang So; lu sư pơdơ̆ng jrăng, đei tơnang 'măng jang păng chơkăl.

⁷ Tơtil lu đe noh Mêlatia bơngai Gibeôn păng Jađôn bơngai Mêrônôt, lu bơngai Gibeôn păng lu bơngai Mispa man hơmet, lu đe noh lu sư kon pơlei oei gah Pah To Đak Krong pơgơ̆r.

⁸ Tơtil lu đe noh Usiêl kon drŏ-nglo Harhaia đơ̆ng lăm lu bơngai hling maih pơm hơmet; tơtil bơngai noh Hanania, lu bơngai pơm pơgang 'bâu phu pơm hơmet ming Lu sư hơmet ming pơlei tih Jêrusalem truh tơ Dur Să.

⁹ Tơtil lu sư, Rêphaia kon drŏ-nglo Hur bơngai pơgơ̆r minh puăt pơlei Jêrusalem man pơdơ̆ng ming;

¹⁰ Tơtil lu sư Jêđaia kon drŏ-nglo Hurumap pơm hơmet ming tơklă anăp hnam sư, tơtil bơngai noh Hatus kon drŏ-nglo Hasapneia pơm hơmet.

¹¹ Malkija, kon drŏ-nglo Harim păng Hasup kon drŏ-nglo Pahat Môap pơm hơmet minh puăt nai păng hnam thôt Tơnuh ŭnh.

¹² Tơtil lu đe noh Sallum kon drŏ-nglo Halôhes pơgơ̆r minh puăt pơlei Jêrusalem păng lu kon drŏ-kăn sư pơm hơmet.

¹³ Hanun păng kon pơlei Sanôa hơmet 'măng jang Thŭng. Lu sư man đei tơnang 'măng păng chơkăl păng man minh-rơbâu hloka dur truh tơ 'măng jang Râm.

¹⁴ Malkija kon drŏ-nglo Rêkap pơgơ̆r tơring char Bêt Hakarem hơmet 'măng jang Râm; lu sư man, đei tơnang 'măng păng chơkăl.

¹⁵ Sallum kon drŏ-nglo Kôlhôse pơgơ̆r tơring Mispa, hơmet 'măng jang đak Hơlŭng sư man bơbŭng đei tơnang 'măng păng chơkăl kư̆m man dur dơnâu Sêlô jê̆ pơgar pơkao pơtao păng truh tơ jơ̆ng kung jur đơ̆ng pơlei Đawit.

¹⁶ Tơtil bơngai noh Nêhêmi, kon drŏ-nglo Asbuk pơgơ̆r minh puăt tơring Bêt Sur, man hơmet dur truh tơ bơsat Đawit, truh tơ đak dơnâu đe pơm păng truh tơ hnam lu bơngai nuih kơtang.

¹⁷ Tơtil bơngai noh bơngai Lêwi Rêhum kon drŏ-nglo Bani pơm yŏng đei pơm hơmet, tơtil bơngai noh Hasabia pơgơ̆r minh puăt tơring Keila pơm hơmet ăn kơ tơring char sư kơdih.

¹⁸ Tơtil bơngai noh, đei lu 'nhŏng oh lu sư pơm hơmet, Binnui kon drŏ-nglo Hênadat pơgơ̆r minh puăt tơring Keila pơm hơmet.

¹⁹ Tơtil bơngai noh Êser kon drŏ-nglo Jêsua pơgơ̆r Mispa pơm hơmet minh puăt tơklă tơngơ̆ năm tŏk tơ hnam Mong Tơmam Tơblah, tơ mum pơlei.

²⁰ Đơ̆ng rŏng bơngai noh đei Baruk, kon drŏ-nglo Sabai pơm hơmet, minh puăt nai đơ̆ng mum Pơlei truh tơ 'măng mơ̆t tơ hnam Êliasip 'bok soi tơm pơm.

²¹ Đơ̆ng rŏng bơngai noh đei Mêsêmôt, kon drŏ-nglo Uri sâu Hakkôs pơm hơmet minh puăt nai đơ̆ng 'măng mơ̆t tơ hnam Êliasip truh tơ tôch hnam sư.

²² Pơtrơp đơ̆ng sư đei lu 'bok soi, lu bơngai oei lăm thŭng glă Jôrđăn pơm hơmet.

²³ Tơtil lu đe noh Bênjamin păng Hasup pơm hơmet tơklă hnam sư kơdih, Tơtil lu đe noh Asaria kon drŏ-nglo Mêsaia, sâu Anania pơm hơmet tơtil hnam sư kơdih.

²⁴ Tơtil bơngai noh Binnui kon drŏ-nglo Hênadat pơm hơmet minh puăt nai, đơ̆ng hnam Asaria truh tơ mum Pơlei.

²⁵ Palal kon drŏ-nglo Usai pơm hơmet tơklă kuĕl mum Pơlei truh kơpal kơ hnam pơtao, anih Thôt kơjung tơklă cham linh gak, 'blă kơ bơngai noh đei Pêdaia kon drŏ-nglo Parôs pơm hơmet.

²⁶ Đơ̆ng noh bơngai Nêthiniam awih awăn lăm hnam Kră Yang oei tơ hnam thôt Ôphêl man hơmet truh tơ anih tơklă 'măng jang Đak tơ gah hơlĕch, truh tơ hnam Thôt kơjung.

²⁷ 'Blă kơ bơngai noh đei lu bơngai pơlei Thêkô pơm hơmet minh pah nai tơklă hnam thôt kơjung păng truh tơ dur Ôphêl.

²⁸ Lu 'bok soi tơm hơmet gah kơpal kơ 'măng jang Aseh rim 'nu pơm hơmet tơklă hnam lu sư kơdih.

²⁹ Pơtrơp đơ̆ng đe noh, Sađơ̆k kon drŏ-nglo Immer pơm hơmet tơklă hnam lu sư kơdih, 'blă kơ đe noh đei Sêmaia, kon drŏ-nglo Sêkania bơngai wei-lăng 'măng dur pơm hơmet.

³⁰ Tơtil bơngai noh, Hanania kon drŏ-nglo Sêlêmaia păng Hanun, kon mă pơđăm Salap, pơm hơmet păng pah nai, tơtil lu đe noh Mêsulam, kon drŏ-nglo Bêrekia pơm hơmet tơklă hnam sư kơdih.

³¹ Tơtil bơngai noh Malkija lu bơngai hling maih pơm hơmet truh tơ hnam bơngai Nêhinim awih awăn lăm hnam Kră Yang păng lu bơngai mơdro sa, tơklă 'măng jang Jô Miphơkat păng truh tơ anih kơjung mum pơlei tơngơ̆ kơjung.

³² Lu khŭl bơ̆jang hling maih păng lu bơngai mơdro sa kư̆m wang pơm hơmet dur pơlei tih, đơ̆ng tơngơ̆ kơjung truh tơ 'măng jang Triu.