Ne 13 - Sơ̆p Hlabơar Nơ̆r 'Bok Kei-Dei

Nêhêmi hơmet tơplih ming

¹ Lăm năr noh, đe đŏk lăng lăm sơ̆p hla bơar Môis đei ăn kơ kon pơlei mơ̆ng; lăm noh đei chih roi kơ bơngai Ammôn păng bơngai Môap ưh kơ gơh mơ̆t akŭm ôh lăm hnam akŭm Kră Yang 'Bok Kei-Dei.

² Yua kơ lu sư ưh kơ đei sơng păng glơng ăn 'bĕng păng đak nhă kơ kon pơlei Isơrael, mă-lei mơng apah Balaam hiap pơtê̆ kon pơlei Isơrael, mă-lei Kră Yang 'Bok Kei-Dei lu nhôn tơplih tơdrong hiap pơtê̆ noh jing tơdrong hơpơi ăn pŭn hiôk.

³ Tơdah lu kon pơlei đei kơtơ̆ng tơdrong khôi juăt noh, na klah lê̆ lu adrĕch tơmoi đơ̆ng kon pơlei Isơrael.

⁴ Adrol kơ tơdrong noh, 'bok soi Êliasip, đei rơih iŏk wă bơwei anih lăm hnam Kră Yang 'Bok Kei-Dei lu nhôn, bơngai mă pơgơ̆p boih hăm Tôbia,

⁵ Păng hơmet boih kơ Tôbia, đei minh anih să, tơ anih đêl sư yua tah tơmam pơyơ̆r phe 'ba păng tơmam 'bâu phu, lu pơnhan kơchŏk, ra minh lăm mơjĭt gah lu 'ba mi, sik hơmu 'nao păng đak rơmă ôliwơ, wă khan tơmam đe ăn tơgŭm kơ lu bơngai Lêwi, lu bơngai hơri păng lu bơngai gak 'măng jang; hăm tơmam pơyơ̆r kơ 'bok soi.

⁶ Kơplah dôm tơdrong noh đei truh inh ưh kơ đei oei lăm pơlei Jêrusalem; yua kơ trŏ lăm sơnăm pêng-jĭt 'bar chăl Artaserses pơm pơtao đe Babilôn, inh athei wih brŏk tơ pơtao, đơ̆ng rŏng kơ noh inh apinh phep pơtao gơh yak năm.

⁷ Inh năm dơ̆ng tơ pơlei Jêrusalem, na inh 'bôh tơdrong kơnê̆ mă Êliasip pơm 'bơ̆t kơplah sư đei hơmet ăn kơ Tôbia minh anih lăm kơđeng hnam Kră Yang 'Bok Kei-Dei.

⁸ Inh 'bôh tơdrong noh pơm kơ inh blĕk dêh, na inh iŏk klơ̆m hŭt pơđĭ lê̆ lu tơmam, giơng, tang-dŏ Tôbia đơ̆ng lăm anih ei.

⁹ Đơ̆ng noh inh athei lu đe hơmet anih ei mă rơgoh, đơ̆ng noh inh tah lu pơnhan kơchŏk tơmam kăl yua lăm hnam Kră Yang 'Bok Kei-Dei hăm lu tơmam pơyơ̆r phe 'ba păng 'long 'bâu phu.

¹⁰ Inh băt đe ưh kơ song tơmam sa kơ lu bơngai Lêwi; yua kơ thoi noh lu bơngai hơri păng bơngai Lêwi achăng lê̆ tơdrong jang na brŏk tơ hnam kơdih jang mir chŭn.

¹¹ Na inh chrih kơ lu kră pơgơ̆r khan: Yua kơ kiơ đe achăng hŭt Kră Yang 'Bok Kei-Dei hŭt lê̆ thoi noh? Đơ̆ng noh inh krao akŭm pơpôi lu sư bơ̆jang dơ̆ng.

¹² Bơngai Juđa chĕp ba minh lăm mơjĭt 'ba mi, sik hơmu 'nao păng đak rơmă ôliwơ tah lăm hnam mong tơmam.

¹³ Inh pôk ăn Sêlêmia, pơm 'bok soi, Sađôk bơngai chih hla bơar păng Pêđaia minh 'nu lăm lu bơngai Lêwi, wei-lăng hnam mong; gah bơngai tơgŭm đei Hanan kon drŏ-nglo Sakur, sâu Matania, pơm kơiĕng; yua kơ đe jô̆ lu bơngai tơnăp; păng tơdrong jang lu sư klah asong tơmam kơ lu 'nhŏng oh lu sư.

¹⁴ 'Blŏk bĕ kơ inh ơ! Kră Yang 'Bok Kei-Dei inh, yua kơ tơdrong 'nâu apinh Ih 'nĕ kơ sŭt lê̆ dôm tơdrong jang 'lơ̆ng mă inh đei bơ̆jang yua kơ hnam Kră Yang 'Bok Kei-Dei inh păng kơ tơdrong jang Sư.

¹⁵ Kơplah chăl noh, inh 'bôh lăm char Juđa lu bơngai hmĕt đak hơmu, lăm năr Sa'bat chĕp hơchô̆ 'ba chơ tơ kơdŭ aseh păng kư̆m chơ sik plei hơmu, plei hơra păng chơ dôm lu tơmam trăp, na chơ chĕp ba mơ̆t lăm pơlei Jêrusalem lăm năr Sa'bat. Inh khă lu sư mơdro tơmam sŏng sa lăm năr noh.

¹⁶ Kŭm đei bơngai Tir oei tơ noh, chĕp ba ka păng dôm lu tơmam nai tĕch mơdro kơ lu bơngai Juđa păng tơ lăm pơlei Jêrusalem lăm năr Sa'bat.

¹⁷ Kơplah ei inh khă lu bơngai mơdrŏng lăm Juđa, khan kơ lu sư: Lu iĕm pơm tơdrong kơnê̆ kiơ âu? Mă pơm pơ'mê̆ kơ lăm năr Sa'bat.

¹⁸ Sơ̆ 'bok yă lu iĕm đei pơm thoi noh boih, hăm trŏ lăm năr 'nâu Kră Yang 'Bok Kei-Dei ăn tơdrong răm truh kơ lu bơ̆n păng pơlei âu, lu iĕm pơm pơ'mê̆ kơ năr Sa'bat na pơthim ăn dơ̆ng tơdrong răm truh kơ lu bơngai Isơrael!

¹⁹ Tơdah wă măng mu boih 'bơ̆t 'măng jang pơlei Jêrusalem adrol kơ năr Sa'bat, inh athei đe tang lê̆ 'măng păng pơkă kơ lu sư pơih 'măng jang noh adrol kơ tôch đĭ năr Sa'bat hlôi boih; inh ăn kơ lu buăl inh mơ'nah wei 'măng ưh kơ ăn bơngai bu tung dah hơnong chơ tơmam trăp mơ̆t lăm pơlei lăm năr Sa'bat.

²⁰ Thoi noh bơngai mơdro, bơngai tĕch dôm lu tơmam minh 'bar 'măng boih 'bĭch tep kơmăng tơ 'nguaih kơ pơlei Jêrusalem.

²¹ Mă-lei inh khan kơ lu sư iĕm athei kơchăng, yua kơ kiơ lu iĕm 'bĭch tep tơ 'nguaih kơ dur pơlei? Tơdah lu iĕm oei pơm dơ̆ng thoi noh inh gô rôp lu iĕm, đơ̆ng năr noh lu sư ưh pă năm boih lăm năr Sa'bat.

²² Inh athei bơngai Lêwi hơmet kơdih mă 'lơ̆ng rơgoh păng bơwei gak lu 'măng jang, wă 'măn 'năr Sa'bat jing năr 'lơ̆ng rơgoh, ơ! Kră Yang 'Bok Kei-Dei inh, apinh Ih 'blŏk kơ inh yua kơ tơdrong noh păng apinh Ih mơnat kơ inh kiơ̆ tơdrong 'mêm tih đơ̆ng Ih.

²³ Kŭm lăm chăl noh, inh 'bôh lu bơngai Juđa iŏk akăn bơngai Asdôt, Ammôn păng Môap;

²⁴ minh puăt kon hơ'lơ̆p lu sư pơma nơ̆r Asdôt, ưh kơ gơh pơma nơ̆r Juđa, mă-lei pơma kiơ̆ kơ nơ̆r adrĕch 'nâu dah kiơ̆ kơ adrĕch nai.

²⁵ Inh chrih khă, hiap pơtê̆ lu sư păng teh minh 'bar 'nu lăm lu sư, hrŭi sŏk lu sư, inh athei lu sư pơkă pơkăm hăm Kră Yang 'Bok Kei-Dei thoi âu: 'Nĕ ăn kon drŏ-kăn iĕm oei kơ kon drŏ-nglo lu sư, dah 'nĕ kơ rôp ăn kon drŏ-kăn lu sư kơ kon drŏ-nglo lu iĕm, dah wă iŏk oei kơ iĕm kơdih.

²⁶ Ưh kơ trŏ kơ Sôlômôn, pơtao Isơrael, đei pơm yoch kơ tơdrong noh hă? Đei lơ adrĕch adrung kon bơngai ưh kơ đei minh 'nu pơtao ayơ nhen thoi sư; sư bơngai mă Kră Yang 'Bok Kei-Dei 'mêm, na Kră Yang 'Bok Kei-Dei pôk ăn kơ sư jing pơm pơtao kơ bơngai Isơrael. Mă-lei lu drŏ-kăn tơmoi adrĕch nai pơdrŭt pơhlŭ sư pơm yoch!

²⁷ Lu iĕm tơchĕng lu nhôn wă mơ̆ng kiơ̆ nơ̆r lu iĕm âu păng pơm yoch kơnê̆ tih, iŏk drŏ-kăn adrĕch nai na pơm yoch hăm Kră Yang 'Bok Kei-Dei lu bơ̆n hă?

²⁸ Đei minh 'nu lăm kon drŏ-nglo Jôiada, sâu Êliasip 'bok soi tơm, ŏng Sanbalat, bơngai Hôrôn; yua kơ thoi noh inh puh tơweh lê̆ sư.

²⁹ Ơ 'Bok Kei-Dei inh! Apinh Ih 'blŏk bĕ kơ lu sư, yua kơ lu sư pơm pơ'mê̆ kơ tơdrong jang jing 'bok soi păng tơdrong pơm glăi kơ nơ̆r pơkă pơkăm pơgơ̆p hăm lu bơngai Lêwi mă jing 'bok soi.

³⁰ Thoi noh inh hơmet rơgoh lu sư đơ̆ng dôm tơdrong đơ̆ng lu bơngai tơmoi adrĕch đe nai păng pơjao ăn kơ lu pơm 'bok soi hăm bơngai Lêwi rim 'nu lăm tơdrong jang sư kơdih;

³¹ kư̆m athei kon pơlei pơyơ̆r 'long ŭnh kiơ̆ thoi đei pơkă păng lu plei 'long blŭng-a lăm bơyan. Ơ! Kră Yang 'Bok Kei-Dei inh apinh Ih 'blŏk bĕ kơ inh păng ăn tơdrong 'lơ̆ng rŏ kơ inh! 25-Nov-2005@13:33, Backup Description=25-Nov-2005@13:30, Billy - 29-Nov-2005@10:12, Backup Description=25-Nov-2005@16:45, David Le vp - 29-Nov-2005@10:23, Backup Description=29-Nov-2005@10:21, Billy -