Ne 10 - Sơ̆p Hlabơar Nơ̆r 'Bok Kei-Dei

Tơdrong pơgơ̆p dơ̆ng hnam 'Bok Kei-Dei

¹ 'Nâu anăn lu bơngai chơ̆m tơdra pơsĭt lăm pơgơ̆p ei: Nêhêmi pơm kră pơgơ̆r, kon drŏ-nglo Hakalia păng Sêđekia,

² Sêraia, Asaria, Jêrêmi,

³ Pasur, Amaria, Malkija,

⁴ Hatus, Sêbania, Malŭk.

⁵ Harim, Mêrêmôt, Abađia,

⁶ Đaniel, Ginêthôn, Baruk,

⁷ Mêsulam, Abija, Mijamin,

⁸ Maasia, Bilgai, Sêmaia; noh lu 'bok soi.

⁹ Lu bơngai Lêwi, đei Jêsua, kon drŏ-nglo Asania; Binnui, lăm kon drŏ-nglo Hênadat; Katmiêh.

¹⁰ Păng lu 'nhŏng oh sư, Sêbania, Hôđia, Kêlita, Pêlaia, Hanan,

¹¹ Mika, Rêhôp, Hasabia,

¹² Sakur, Sêrebia, Sêbania,

¹³ Hôđia, Bani păng Baninu.

¹⁴ Lu pơm yŏng wei-lăng kon pơlei: Parôs, Phahat Môap, Êlam, Satu, Bani.

¹⁵ Buni, Agat, Bêbai.

¹⁶ Adonija, Bikwai, Adin,

¹⁷ Ater, Hesekia, Asur,

¹⁸ Hôđia, Hasum, Bêsai,

¹⁹ Harip, Anathôt, Nêbai,

²⁰ Mapias, Mêsulam, Hêsir,

²¹ Mêsesabel, Sađôk, Jađua,

²² Pêlatia, Hanan, Anaia,

²³ Hôsêa, Hanania, Hasup,

²⁴ Halôhes, Pilha, Sôbek,

²⁵ Rêhum, Hasapna, Maasêia,

²⁶ Ahia, Hanan, Anan,

²⁷ Malŭk, Harim păng Baanah.

²⁸ Lu kon pơlei oei đei, lu 'bok soi, lu bơngai Lêwi, lu bơngai gak 'măng jang lu bơngai hơri, lu bơngai kră hnam yang (Nêthinim) păng lu sư tơklah kơdih đơ̆ng kon pơlei lăm char đe wă kiơ̆ khôi juăt Kră Yang 'Bok Kei-Dei, akăn lu sư lu kon drŏ-nglo, kon drŏ-kăn lu sư wă khan lu bơngai đei tơdrong gơh hơgei păng hlôh wao.

²⁹ Pơgơ̆p hơdai hăm 'nhŏng oh lu sư păng lu bơngai mơdrŏng, na hiap akâu kơdih pơkă yak kiơ̆ khôi juăt đơ̆ng Kră Yang 'Bok Kei-Dei yua 'bok Môis, đĭch đam sư ăn boih păng wă kơ wei răk pơm kiơ̆ dôm tơdrong tơtă đơ̆ng Kră Yang bơ̆n, tơjur lăm khôi juăt Sư.

³⁰ Lu nhôn pơkă ưh kơ ăn ôh kon drŏ-kăn lu nhôn iŏk klo đơ̆ng adrĕch char âu păng kư̆m ưh kơ gơh iŏk oei kon drŏ-kăn lu sư oei kơ kon drŏ-nglo lu nhôn.

³¹ Lu nhôn pơkă lăm năr Sa'bat dah năr đei pơm giĕng tih ưh kơ răt phe 'ba dah tơmam kiơ đơ̆ng lu adrĕch char âu, lăm sơnăm mă tơpơh ưh kơ choh jang sa, kư̆m ưh kơ iŏk boih đơ̆ng bơngai bu oei hre.

³² Lu nhôn pơkă kơdih pơyơ̆r minh lăm pêng sêikơl rim sơnăm wă yua lăm tơdrong jang hnam akŭm 'Bok Kei-Dei lu nhôn.

³³ Gah tơpŭng 'lơ̆ng rơgoh, gah tơmam pơyơ̆r phe 'ba, hơ'bo 'bum, gah tơmam soi pơyơ̆r 'buh juăt kơ pơyơ̆r, gah tơmam soi pơyơ̆r lăm năr Sa'bat, năr blŭng-a lăm rim khei, gah năr kơ̆m giĕng nai, tơmam soi pơyơ̆r huai tơdrong yoch kơ lu kon pơlei Isơrael păng dôm lu adrĕch nai lăm hnam akŭm 'Bok Kei-Dei lu nhôn.

³⁴ Lu nhôn, lu bơngai 'bok soi, bơngai Lêwi păng lu kon pơlei nai hlang lăng gah tơdrong jang pơyơ̆r 'long ŭnh, rim sơnăm trŏ thoi năr pơkă, na kiơ̆ thoi 'bok lu nhôn chĕp ba 'long ŭnh noh tơ hnam akŭm 'Bok Kei-Dei lu nhôn, wă tơkuh tơ kơpal chơnang soi Kră Yang 'Bok Kei-Dei lu nhôn, thoi đei chih lăm sơ̆p hla bơar khôi juăt noh.

³⁵ Rim sơnăm truh kơ bơyan plei blŭng-a lu nhôn chĕp ba pơyơ̆r păng dôm lu plei 'long plei blŭng-a lu nhôn chĕp ba pơyơ̆r tơ hnam akŭm 'Bok Kei-Dei.

³⁶ Pơm kiơ̆ tơdrong juăt, ba hloi kon drŏ-nglo kơdră păng kon sem dơrong tuh blŭng-a, triu dah rơmo tơ hnam akŭm 'Bok Kei-Dei lu nhôn, na pơjao ăn kơ lu 'bok soi wă kơ bơ̆jang lăm hnam akŭm 'Bok Kei-Dei lu nhôn.

³⁷ Lu nhôn pơkă chĕp ba tơpŭng 'ba hle lu nhôn, dôm lu tơmam plei 'long, sik hơmu 'nao păng đak rơmă ôliwơ, na pơjao ăn kơ 'bok soi tah lăm hnam mong hnam akŭm 'Bok Kei-Dei lu nhôn; gah minh lăm mơjĭt lu nhôn chĕp ba ăn kơ bơngai Lêwi; yua kơ lu bơngai Lêwi boih gơh iŏk tơmam noh đơ̆ng kon pơlei pơla lăm đĭ pơlei iĕ lu nhôn.

³⁸ 'Bok soi kon sâu Arôn, gô năm hơdai bơngai Lêwi, lu sư iŏk ra minh lăm mơjĭt noh; đơ̆ng noh lu sư chĕp ba minh lăm mơjĭt noh truh tơ hnam akŭm 'Bok Kei-Dei lu nhôn, na tah lê̆ lăm hnam mong tơmam.

³⁹ Yua kơ lu kon pơlei Isơrael păng lu bơngai Lêwi gô chĕp ba, 'ba mi, sik hơmu păng đak rơmă ôliwơ 'nao mơ̆t tơ anih 'măn tơmam, tơ anih lu pơnhan kơchŏk tơmam 'lơ̆ng rơgoh, kơ lu 'bok soi bơ̆jang awih awăn, lu bơngai gak 'măng jang păng lu bơngai hơri. “Thoi noh lu nhôn ưh kơ achăng lê̆ ôh hnam akŭm 'Bok Kei-Dei lu nhôn.”