Ne 1 - Sơ̆p Hlabơar Nơ̆r 'Bok Kei-Dei

Nơ̆r Nêhêmi krao khan

¹ Nơ̆ra Nêhêmi kon drŏ-nglo Hakalia Sơnăm mă 'bar-jĭt lăm khei Kisle,b kơplah inh oei lăm pơlei tih Susan.

² Hanani minh 'nu bơngai lăm lu 'nhŏng oh inh năm hơdai hăm lu bơngai Juđa, inh apinh lu sư gah lu adrĕch Juđa gơh klaih wă khan bơngai mă đe rôp pơm bơnă boih oei đei păng apinh hloi gah pơlei Jêrusalem.

³ Lu bơngai noh roi kơ inh thoi âu: Lu bơngai mă đe rôp pơm bơnă oei đei lăm pơlei, đei tơdrong truh păng mơlâu răm dêh, dur pơlei Jêrusalem pơchah răm păng lu 'măng jang sư ŭnh kư̆m sa đĭ boih.

⁴ Kơplah inh kơtơ̆ng dôm nơ̆r noh, inh hơ-oei na nhơ̆m grong lăm hơdôm năr; inh ơ̆t kơ sŏng sa păng krao khan kơ Kră Yang 'Bok Kei-Dei hơtăl plĕnh thoi âu:

⁵ Ơ Kră Yang 'Bok Kei-Dei kơ hơtăl plĕnh, wă khan Kră Yang 'Bok Kei-Dei tih hloh păng trŏ kơkuh tơ'ngla wei nơ̆r pơgơ̆p păng jơhngơ̆m 'mêm mơnat kơ lu bơngai mă kơkuh 'mêm kơ Sư păng wei răk dôm nơ̆r tơtă đơ̆ng Sư!

⁶ Inh apinh Ih lăng păng đon Ih mơ̆ng nơ̆r krao khan inh bơngai đĭch đam Ih, dang ei inh oei krao khan rim năr rim măng yua kơ adrĕch Isơrael, lu đĭch đam Ih, oei 'bơ̆t anăp Ih păng roi tơbral dôm tơdrong yoch kon pơlei Isơrael mă lu nhôn pơm glăi boih hăm Ih, inh păng hnam dơnŏ 'bok inh kư̆m pơm yoch.

⁷ Lu nhôn đei pơm yoch kơnê̆ dêh păng Ih, ưh kơ wei răk nơ̆r Ih tơtă păng tơdrong juăt Ih đei bơtho khan boih kơ 'bok Môis, đĭch đam Ih.

⁸ Apinh Ih 'blŏk bĕ kơ nơ̆r Ih bơtho khan boih kơ 'bok Môis đĭch đam Ih thoi âu: Tơdah lu iĕm pơm yoch, Inh gô tơraih lu iĕm tơ tŏk-bŏk lu adrĕch adrung, kon bơngai.

⁹ Mă-lei tơdah lu iĕm wih brŏk tơ Inh, wei răk pơm kiơ̆ dôm tơdrong Inh tơtă, mă khan lu iĕm tơklah tơklang jrok oei tôch kơ plĕnh teh, Inh kư̆m gô krao akŭm lu sư brŏk păng inh gô chông anhăk lu sư truh tơ anih Inh mă hơmet lê̆ boih wă kơ Anăn Inh kư̆m oei tơ noh mơ̆n.

¹⁰ Đơ̆ng noh lu sư jing đĭch đam păng kon pơlei Ih mă Ih yua tơdrong mơsêh ti pran kơtang Ih dŏng pơklaih.

¹¹ Ơ Kră Yang! Apinh Ih pơgling đon mơ̆ng nơ̆r lu đĭch đam Ih krao apinh păng krao chă, lu bơngai mă đĭ jơhngơ̆m hli yom kơ Anăn Ih, năr âu apinh Ih tơgŭm ăn gơh đei tơdrong pŭn hiôk păng ăn kơ lu sư gơh đei tơdrong mơnat 'bơ̆t anăp bơngai âu. Kơplah ei kơnh inh gô pôk glơng kơchŏk tơdrô ăn kơ pơtao.