Na 3 - Sơ̆p Hlabơar Nơ̆r 'Bok Kei-Dei

Tơdrong pơrăm pơlei Niniwe

¹ Răm-'băm tơpă kơ pơlei mă ngăl pơlôch đe! Sư 'bĕnh-'bang kơ tơdrong hơlĕnh hơleo păng blah tơgar iŏk, tơtông ưh pă pơdơh.

² Đe kơtơ̆ng re sơnguĕt, jơwa đơ̆ng jơ̆ng gre; aseh hrơ̆t kơdâu dơhrông, gre kơdâu hrĕnh kuăng.

³ Lu linh hao aseh drong tơ anăp; đao rang chơchêr chơchar, hơlă tơju tơjrê tơjra. Đei lơ bơngai lôch, akâu bơngai lôch hơdrom băl hơlôk thoi pôi, akâu bơngai lôch kĕt keng. Đei lơ bơngai pơ̆k hơtat kơpal akâu bơngai lôch.

⁴ Noh yua kơ đơ̆ng bơngai đi pơm kư̆ kă pă kĕ jô̆, pơrŏ akâu chă pơhlŭ đe thoi noh. Chă hơlĕnh lu adrĕch kon bơngai hăm tơdrong pơm đi lu sư păng tĕch kon pơlei pơla hăm đi păng adrĕch adrung 'nhŏng oh sư hăm tơdrong pơm pơjâu tơwir hơlĕnh.

⁵ Kră Yang Tih Hloh khan: 'Nâu, dang ei Inh wă blah ih; Inh gô plôh lê̆ ao tai ih, gô tơ'bôh pơdah ih akâu hoh ăn kơ kon pơlei pơla lăng păng roi dôm tơdrong mơlâu ih kơ rim teh đak.

⁶ Inh gô klơ̆m lê̆ tơdrong kơnê̆ 'mê̆-'mach krưp dêh tơ ih, ăn kơ đe pơjăm pơjuă ih, ăn kơ đe lăng hiĕk achơ̆ kơ ih.

⁷ Truh tơ đe lăng 'bôh ih na weh tơ nai păng khan: Niniwe đĭ juơ. Bu wă đei jơhngơ̆m mơnat kơ Sư? Inh chă bơngai đơ̆ng yơ wă kơ pơlung ih?

⁸ Ih hăm hloh kơ pơlei Nôamôn oei tŏk-bŏk krong Nil, đei đak tăp dăr? Iŏk đak krong pơm jing kơđông kơjăp, iŏk đak krong pơm dur war pơlei tih?

⁹ Char Êthiôpi, char Êyiptơ jing tơdrong pran kơtang sư. Char Phut păng char Libi jing buăl tơgŭm dŏng sư,

¹⁰ Mă-lei ră sư noh đe chông tơlĕch đơ̆ng dêh char sư, đe rôp pơm bơnă; lu kon sâu sư đe teh pơhĕch tơ rok mum trong tơklah pêng lăm pơlei tih. Đe hlang lăng lu bơngai mă sư gĭt pơyom klah asong băl wă pơm đĭch lu kuan tih sư đe chô̆ păng glang.

¹¹ Ih kư̆m lei-lăi, gô ưh pă băt thoi bơngai suai, gô chă ôn păng chă anih kơjăp wă ôn kơ lu ayăt.

¹² Đĭ-đăng lu kơđông kơjăp ih hiong thoi 'long hơra, đei plei đum blŭng-a lăm bơyan, tơdah đe gơgŭ sư gô hơlŭng huŏng tơ lăm 'bơ̆r lu bơngai 'maih sa.

¹³ 'Nâu kon pơlei ih, lu linh ih rơdu thoi bơngai drŏ-kăn oei tŏk-bŏk ih. Lu 'măng jang char ih pơih boih rai să ăn kơ lu linh ayăt mơ̆t ŭnh sa đĭ boih lu mam chơkăl sư.

¹⁴ Iĕm athei chhŏ mong hiă đak wă găn đe wang, pơm mă kơjăp kơđông ih. Pơjuă bĕ trôk, jrâu hăm teh lơ̆n păng pơm hơmet ming hnam pơm găch mă kơjăp.

¹⁵ Tơ noh ŭnh gô sa ih, đao gưm gô pơlôch ih, luăn sa ih thoi lep, ih athei akŭm băl mă kơdrâ̆m thoi lep păng lơ thoi lep 'ba.

¹⁶ Ih đei lơ bơngai tĕch mơdro rai lơ thoi sơnglŏng kơpal plĕnh; mă-lei lep sa đĭ boih dêh char na kơdâu tơ nai.

¹⁷ Lu 'bok yŏng pơgơ̆r ih thoi lep 'ba, lu yŏng linh ih lơ thoi lep tung-nut kôp kơpal dur lăm năr tơngiĕt, dĭng truh tơ măt 'năr lĕch, lu sư păr weh đĭ, đe ưh kơ băt lu sư oei tơ yơ.

¹⁸ Ơ pơtao Asiri, lu bơngai wei triu ih tep đĭ. Lu bơngai hơgei pơm yŏng lu sư pơdơh hiôk đĭ boih; kon pơlei ih kơdâu tơklah tơklang tơ jơ̆p kông ưh kơ đei bu krao akŭm lu sư dơ̆ng.

¹⁹ Rơka ih ưh kơ đei pơgang ming klaih, rơka ih jrŭ dêh truh kơ lôch na lu bơngai bu kơtơ̆ng đe roi gah ih lu sư tap ti kơ ih yua ưh kơ đei bơngai bu mă ih ưh kơ đei pơm kơnê̆ thoi ih ngăl juăt kơ pơm ling-lang.