Na 2 - Sơ̆p Hlabơar Nơ̆r 'Bok Kei-Dei

Tơdrong blah pơrăm pơlei Niniwe

¹ Lu bơngai wă blah pơrăm ih truh boih; bơwei bĕ lu kơđông, gak găn lăng lu trong tih, tơ̆n gơhret kơiĕng ih păng pơpôi dôm linh pran kơtang ih.

² Yua kơ Kră Yang gô tơiung dơ̆ng tơdrong ư-ang Jakôp, thoi tơdrong ư-ang Isơrael, đơ̆ng lu bơngai mă blah pơgŏ pơđep lu sư păng pơrăm lê̆ boih dơng hơmu sư.

³ Khêl lu bơngai kơtang tơhum đak 'brê, lu linh sư hrŭk ao đak gôh, lăm năr lu sư tơblah, bơsei gang gre aseh gô lĕch thoi pla ŭnh, đao hơlă gô pơpơ̆.

⁴ Lu gre aseh yak mơđưk mơđak rok trong tih, hrơ̆t hơlơ̆k hơle rok trong să lăm pơlei, ŭnh gre lu sư nhơk thoi đe tơ̆k ŭnh hơchô̆ păng kơdâu kuăng thoi kơmlat.

⁵ Sư 'blŏk krao lu bơngai kră nuih kơtang lu sư chĕp khêl yak hăt hot dĭng mah kơtơih pơ̆k wă kơ jah truh tơ dur pơlei sư, wă găn blah.

⁶ 'Măng jang đak krong tơpơih đĭ truh tơ hnam pơtao pơchah đĭ.

⁷ Thoi đei pơkă Niniwe đe blah iŏk đe rôp anhăk, lu bơngai drŏ-kăn jang kơ sư, lu sư ôr hmoi thoi sem kơtơp păng tŭr kơtơh.

⁸ Na, Niniwe sơ̆ thoi đak dơnâu. Mă-lei dang ei lu sư hrơ̆ đĭ boih. Đei đe krao ôr thoi âu: Dơ̆ng bĕ, dơ̆ng bĕ Mă-lei ưh kơ đei bu wih tơ rŏng.

⁹ Tơgar iŏk hu, tơgar iŏk maih bĕ; yua kơ tơmam gĭt lu sư lơlap, tơmam kăp lu sư lơ dêh.

¹⁰ Lu sư đe pơrăm lê̆ boih, pă đei kiơ păng pơrăm iŏk tơgar đĭ; jơhngơ̆m lu sư ơh sơ'ngon; kŭl-tăng lu sư pơpơ̆ hơtŭt băl kơiĕng lu sư jĭ ngăl, đĭ-đăng muh măt lu sư dreng hơ'blă.

¹¹ Tơ yơ trôm sơlŭng dăm-brang oei păng anih mă sư rong kon sư, anih dăm-brang tơno, dăm-brang akăn păng lu kon sư, mơ̆t lĕch mă ưh pă đei hli kơ bu,

¹² dăm-brang tơno châu lơ lu kon sem bri ăn kơ lu kon sư sa păng châu rôp ăn kơ lu dăm-brang akăn, trôm lu sư oei 'bĕnh kơ sem bri đêl sư châu, tơpu lu sư 'bĕnh kơ 'nhĕm sem bri mă đêl lu sư đei rôp sa.

¹³ Kră Yang khan: 'Nâu, Inh tơblah hăm ih. Inh gô soh lu gre aseh ih lăm ŭnh. Đao gưm gô luăn sa kon dăm-brang ih; Inh gô pơlôch lê̆ dôm kon sem ih châu sa đơ̆ng teh âu; păng lu bơngai ih wơh nơ̆r ih ưh pă kơtơ̆ng boih.