Na 1 - Sơ̆p Hlabơar Nơ̆r 'Bok Kei-Dei

Nơ̆r khan lê̆ adrol ayăt hăm pơlei Niniwe

¹ Niniwe pŭ trăp sơ̆p hla bơar Nahum, bơngai pơlei Elkôs chih roi tơdrong sư 'bôh gah tơdrong wă phak Niniwe trăp tơpă.

² Kră Yang jơ̆ 'Bok Kei-Dei gar păng pơm 'mong; Kră Yang pơm tơwih păng 'bĕnh kơ tơdrong hil mĭl. Kră Yang pơm 'mong kơ bu mă blah Sư păng hil kơ lu đe bu mă ayăt kơ Sư.

³ Kră Yang hiơ̆ kơ hil păng đei mơsêh pran kơtang tih; mă-lei Sư kư̆m ưh kơ lê̆ phak lu bơngai pơm yoch. Kră Yang yak năm lăm kial phŭt păng hơbŭt hơbang, lu hơmơ̆l păng 'mui tơ ala jơ̆ng Sư.

⁴ Sư chrih kơ đak dơsĭ, đak dơsĭ hrĕng kro hloi; păng pơhrơ̆ đĭ-đăng lu đak krong. Mir chŭn pơgar tơring Basan păng Karmel hrĕng kro, pơkao char Liban jô hơlŭng.

⁵ Lu kông pơpơ̆ 'bơ̆t anăp Sư, lu groi gô hach hiong; teh đak păng lu kon bơngai oei kơpal teh đak, đĭ-đăng kon bơngai jơ̆p kơ teh đak rŭng răng.

⁶ Bơngai bu kĕ dơ̆ng 'bơ̆t anăp Sư hil? Bu kĕ chơ̆n jơhngơ̆m kơ tơdrong Sư hil mĭl? Tơdrong blĕk Sư tuh thoi pla ŭnh, lu tơmo tih pơchah yua kơ đơ̆ng Sư.

⁷ Kră Yang 'lơ̆ng rŏ, jing kơđông kơ'nơp kơjăp lăm năr đei tơdrong gleh truh păng Sư băt kơ dôm lu bơngai kơ'nơp lăm Sư.

⁸ Gah lu bơngai ayăt kơ Kră Yang đak lơ̆p pơrăm anih lu sư păng druh lu ayăt kơ Sư kơdâu mơ̆t lăm tơdrong măng mu.

⁹ Lu sư chă đon liơ dơ̆ng wă ayăt hăm Kră Yang Sư gô pơrăm đĭ-đăng minh 'măng tăm ưh pă đei ăn tơdrong truh mă 'bar dơ̆ng.

¹⁰ Yua kơ lu sư tơkuăr băl hơpunh thoi jơla suĕng păng hơleng thoi suai kơ sik, thoi noh gô soh lu sư sa đĭ thoi hơnong 'ba kro.

¹¹ Gô đei minh 'nu lĕch đơ̆ng lăm lu iĕm chă đon wă pơm kơnê̆ ayăt kơ Kră Yang.

¹² Kră Yang khan thoi âu: Mă khan lu sư pran kơtang dêh păng kơdrâ̆m lơ kư̆m gô pơrăm pơtôch lê̆ đĭ ưh pă đei kiơ. Mă khan Inh đei pơmat lu iĕm dang ei na ning-mônh ưh kơ đei pơmat iĕm dơ̆ng boih.

¹³ Dang ei Inh gô gơ̆ 'long ăt pơm đĭch sư đơ̆ng lu iĕm păng hrĕch lê̆ tơlei glang đơ̆ng iĕm.

¹⁴ Kră Yang ăn boih tơdrong pơtă trŏ kơ ih, ih ưh pă đei kon hơ'lơ̆p wă pơtrơp iŏk anăn ih. Inh gô tơhiong pơrăm lê̆ lu rup yang iĕm man păng lu rup yang iĕm hling đơ̆ng lu hnam yang ih. Inh gô sir sơlŭng bơsat 'bŭ ih yua kơ ih yoch kơnê̆ dêh.

¹⁵ To, tơ kơpal kông đei đêl jơ̆ng lu bơngai năm ba tơdrong 'nao 'lơ̆ng păng roi tơdrong hiôk-hian. Ơ Juđa, ih athei bơwei bĕ năr kơ̆m giĕng ih păng pơsĭt bĕ tơdrong ih đêl pơkă; yua kơ lu bơngai kơnê̆ ưh pă pơm kơnê̆ ayăt kơ iĕm dơ̆ng boih lu sư lôch đĭ-đăng boih.