Mi 2 - Sơ̆p Hlabơar Nơ̆r 'Bok Kei-Dei

Tơdrong pơm yoch păng tơdrong phak bơtho tơdrong pơjing ming đơ̆ng rŏng

¹ Răm-'băm tơpă kơ bơngai bu chă đon kơnê̆ 'maih pơm tơdrong yoch tơ kơpal giơng sư kơdih, truh pơgê hrôih lu sư pơm tơdrong lu sư tơchĕng lê̆ boih. Yua kơ lu sư gơh pơm tơdrong thoi noh!

² Lu sư 'ngeng kơ mir chŭn na tơgar iŏk. 'Ngeng kơ hnam đe păng tơgar iŏk hloi mŭk tơmam sư.

³ Thoi noh na, Kră Yang khan thoi âu: “'Nâu Inh gô pơm tơwih kơ lu adrĕch adrung âu. Minh tơdrong truh pơmat-tat mă lu iĕm kư̆m ưh kơ gơh klaih ôh, lu iĕm ưh pă gơh yak ngơk kơ̆l chhôk hal, yua kơ 'noh jơ̆ năr pơmat-tat.

⁴ Lăm năr noh kơnh, đe gô hơri minh tơdrong pơjăm pơjuă iĕm, đe gô nhơ̆m hmoi ơh sơ'ngon dêh păng khan: Lu bơ̆n âu đe pơlôch pơrăm đĭ boih! Sư iŏk lê̆ teh inh jang sa. Lu sư iŏk đơ̆ng inh, iŏk teh chŭn mir bơ̆n klaih asong ăn kơ bơngai ayăt.

⁵ Thoi noh lăm khŭl Kră Yang, ưh kơ đei minh 'nu gơh hlang lăng dăng tơlei plaih song băl teh choh sa”

⁶ “'Nĕ pă bơtho dơ̆ng,” lu sư bơtho. Lu sư ưh kơ bơtho tơdrong noh, Tơdrong mơlâu ưh kơ weh đơ̆ng lu sư.

⁷ Ơ hnam Jakôp! Hăm trŏ đe khan tơdrong 'nâu Yang Bơhngol 'Lơ̆ng Kră Yang ưh kơ gơh pơm tôm tơdrong hă? 'Nâu hăm trŏ tơdrong Sư pơm? Hăm trŏ kơ nơ̆r Inh pơma pơyua kơ lu bơngai mă kiơ̆ tơdrong tơpăt.

⁸ Mă-lei 'nao brei mơsơ̆ lu kon pơlei Inh blah plơ̆ thoi ayăt, lu bơngai mă yak rok trong 'nâu hiôk-hian, ưh kơ wă tơblah ôh, lu iĕm athei plôh iŏk ao tai 'nguaih đơ̆ng lu sư, lê̆ lăi kơ lu sư ao lăm đĕch.

⁹ Lu iĕm pơpuh lu bơngai drŏ-kăn, kon pơlei ih lĕch đơ̆ng hnam chơt hiôk lu sư; păng iŏk tơdrong ư-ang Inh đơ̆ng lu kon hơ'lơ̆p sư ling-lang hlŏng hloi.

¹⁰ Lu iĕm iung bĕ! Weh bĕ! Yua kơ 'nâu ưh kơ sĭ ăn kơ iĕm pơdơh hiôk ôh, yua kơ tơdrong kơnê̆ 'mê̆-'mach pơrăm boih, tơnat pat dêh tơpă.

¹¹ Tơdah đei bơngai bu kiơ̆ tơdrong hiong răm păng pơma hơlĕnh khan: Inh gô pơma khan lê̆ adrol kơ lu iĕm gah đak sik hơmu păng đak hơmu păng đak tơdrô, bơngai noh jing trŏ bơngai khan lê̆ adrol kơ kon pơlei 'nâu!

¹² Ơ Jakôp sĭt Inh gô akŭm pơpôi lu iĕm, tơpă Inh gô akŭm lu bơngai Isơrael mă oei oei, akŭm pơpôi lu sư hơdai hơbĭ hăm triu Bôira minh pôm hơdrong, thoi lu triu lơ lăm tơmăn 'nhĕt lu sư, gô đei nơ̆r hmoi lơ ô-ôs ơ-as thoi đei bơngai lơ.

¹³ Đei bơngai pơih trong adrol kơ lu sư, lu sư tơkan lĕch truh tơ 'măng jang pơlei, pơtao lu sư rok yak adrol kơ lu sư păng Kră Yang boih Tơ'ngla ba trong lu sư.