Mathiơ 28 - Sơ̆p Hlabơar Nơ̆r 'Bok Kei-Dei

¹ Đơ̆ng rŏng kơ năr pơdơh Sa'bat boih, lăp 'brưch hơdah til pơgê hrôih năr mônh, na Mari đơ̆ng Pơlei Mađơla hăm Mari nai bre sư năm lăng bơsat Yêsu.

² Na teh adrŏ mơ'nưt mơ'nat hloi, yua kơ linh jang 'lơ̆ng Kră Yang jur đơ̆ng plĕnh pơih ăn 'măng bơsat Yêsu. Linh jang ei tơoei kơpal tơnglơ̆p tơmo noh.

³ Lăng sư nhen lĕ kơmlat, ao sư rang kok dêh.

⁴ Lu linh gak bơsat hli tơrơ mah lôch hơngơ̆t.

⁵ Linh jang 'lơ̆ng khan kơ bre drŏ-kăn noh khan: “Biĕm 'nĕ kơ hli, inh băt kơ biĕm năm tơ âu chă Yêsu mă đe pơ̆ng pơlôch tơ 'long pơglang.

⁶ Dang ei Sư ưh pă oei tơ âu boih yua kơ Sư iung arih thoi Sư khan hmă. Tơ̆ng biĕm ưh kơ lui apinh biĕm năm lăng anih đêl đe tơ'bĭch Sư âu.

⁷ Na dang ei biĕm năm hloi tơ lu bơngai pơhrăm păng Sư, khan kơ lu sư thoi âu: ‘'Bok Kei-Dei tơiung arih Sư đơ̆ng lôch boih, Sư wă năm tơ dêh Galilê hơdrol kơ iĕm, iĕm gô tơ'bơ̆p Sư tơ noh.’ Biĕm 'nĕ hiơt tơdrong Inh khan kơ biĕm âu hŏ.”

⁸ Đơ̆ng noh bre sư kơdâu năm roi kơ lu bơngai pơhrăm păng Yêsu tơdrong mă bre sư 'bôh noh hei. Kơplah bre sư kơdâu rok trong, jơhngơ̆m bre sư hiôk dêh na minh pah đon bre sư tơchĕng hli rah dai.

⁹ Kơplah bre sư kơdâu rok trong Yêsu tơ'bơ̆p bre sư păng khan: “Liĕm akâu hiôk-hian kơ bơ̆n.” Bre sư năm jê̆ Yêsu rôp jơ̆ng Sư na kơkuh kơ Sư.

¹⁰ Yêsu khan: “Biĕm 'nĕ pă hli, biĕm jah năm khan kơ lu 'nhŏng oh Inh athei lu sư năm tơ dêh Galilê, lu sư gô tơ'bơ̆p Inh tơ noh hloi.”

Lu linh gak bơsat Yêsu năm roi kơ 'bok soi

¹¹ Kơplah bre drŏ-kăn noh kơdâu năm roi kơ lu bơngai pơhrăm păng Yêsu, lu linh gak 'măng bơsat, lu sư mơ'nah wih tơ Pơlei Jêrusalem roi kơ lu 'bok soi tih dôm tơdrong lu sư 'bôh.

¹² Na lu 'bok soi tih pơđâu băl păng lu đe kră sek tơlang wă apah lu linh gak jên lơ,

¹³ wă kơ lu sư chă roi kơ đe khan lu bơngai pơhrăm păng Yêsu tơtông iŏk akâu Yêsu boih kơplah lu linh oei tep kơmăng.

¹⁴ Lu 'bok soi tih khan kơ lu linh dơ̆ng: “Dah 'bok tih Pilat kơtơ̆ng tơdrong âu, hli kơ sư hil kơ iĕm, lê̆ nhôn pơlung sư wă kơ iĕm huay kơ hli.”

¹⁵ Thoi noh na lu linh ei iŏk jên noh pơm kiơ̆ thoi lu 'bok soi khan. Lu sư hơlĕnh kơ lu bơngai Juđê. Na lu bơngai Juđê đơ̆ng sơ̆ khơ̆ dang ei, lu sư khan lu bơngai pơhrăm păng Yêsu tơtông iŏk akâu Yêsu tơpă.

Năm bơtho bĕ

¹⁶ Mơjĭt-mônh 'nu lu bơngai pơhrăm păng Yêsu, lu sư năm tơ dêh Galilê. Lu sư tŏk tơ kông mă đêl Yêsu pơkă kơ lu sư.

¹⁷ Lăp lu sư 'bôh Yêsu boih, lu sư kơkuh bơnê kơ Yêsu. Mă-lei đei lu mơ'nah ưh tam gan lui kơ to 'noh Yêsu.

¹⁸ Yêsu năm jê̆ lu sư păng khan: “'Bă Inh ăn kơ Inh gơh pơgơ̆r đĭ-đăng plĕnh hăm teh.

¹⁹ Thoi noh năm bĕ lu iĕm, bơtho kơ đĭ-đăng lu khŭl bơngai jơ̆p kơ teh đak, athei lu sư lui kiơ̆ kơ Inh, pơm 'batem kơ lu sư krao anăn Yang 'Bă, Yang Kon, hăm Yang Bơhngol 'Lơ̆ng wă kơ đe nai băt kơ lu sư lui boih.

²⁰ Bơtho kơ lu sư pơm kiơ̆ tôm tơdrong Inh đei pơkă kơ lu iĕm. Inh oei hơdai hăm lu iĕm ling-lang truh năr tôch ning-mônh.”