Mathiơ 21 - Sơ̆p Hlabơar Nơ̆r 'Bok Kei-Dei

¹ Lu đe Yêsu wă jê̆ truh tơ Pơlei Jêrusalem boih, truh tơ Pơlei Betphagê 'bơ̆t kông Ôliwơ. 'Bơ̆t ei Yêsu wơh 'bar 'nu bơngai pơhrăm păng Sư khan:

² “Biĕm năm tơ pơlei tơpăt anăp biĕm to. Lăp biĕm truh tơ noh, biĕm 'bôh minh pôm aseh iĕ yŏng đe chô̆ hơdai hăm kon sư, na biĕm yaih dui anhăk kơ Inh tơ âu.

³ Dah đe khan: ‘Biĕm iŏk pơm kiơ?’ Biĕm khan kơ sư thoi âu: ‘Kră Yang wă yua 'biơ̆.’ Thoi noh na sư ăn kơ biĕm dui anhăk aseh iĕ noh tơ âu.”

⁴ Tơdrong âu 'blep trŏ thoi minh 'nu 'bok chih khan lê̆ hơdrol sơ̆ thoi âu:

⁵ “Khan kơ kon pơlei pơla Jêrusalem hŏ: Pơtao iĕm wă mơ̆t tơ pơlei iĕm năr âu. Sư bơngai iơ̆m dim, Sư ưh kơ băt pơang akâu kơdih ôh; Sư hao minh pôm aseh iĕ, Sư oei kơpal kơdŭ aseh iĕ đĕch.”

⁶ Thoi noh na 'bar 'nu bơngai pơhrăm păng Sư năm kiơ̆ kơ nơ̆r Sư pơkă.

⁷ Bre sư dui anhăk aseh iĕ yŏng hăm kon sư tơ Yêsu. Lu bơngai pơhrăm păng Sư lơ̆k ao lu sư kơdih tơ kơpal kơdŭ aseh iĕ ăn kơ Yêsu hao.

⁸ Đei bơngai lơlap lơlang lơ̆k ao lu sư kơdih kiơ̆ trong wă kơ 'lơ̆ng rŏ. Đei lu mơ'nah koh hơmŭl 'long, proh kơpal trong.

⁹ Yêsu hao aseh iĕ yak rok trong ei na lu bơngai tơpôl ei mơ'nah yak hơdrol kơ Sư, mơ'nah đơ̆ng rŏng kơ Sư. Lu sư chhôk na pơma 'bơ̆r re khan: “Hôsana, bơnê kơ 'Bok Krist Kon Sâu pơtao Đawit. Bơnê kơ Sư truh tơ bơ̆n năr âu yua kơ Kră Yang wơh. Păng bơnê kơ 'Bok Kei-Dei kơpal plĕnh ti.”

¹⁰ Truh Yêsu mơ̆t tơ Pơlei Jêrusalem na đĭ-đăng kon bơngai yơyông yơyang mang, lu sư hli, na jet lu bơngai mă kiơ̆ jơ̆ng Yêsu khan: “Bu noh?”

¹¹ Lu bơngai tơpôl kiơ̆ jơ̆ng Yêsu ei khan: “Sư 'noh Yêsu, Sư bơngai pơtruh nơ̆r 'Bok Kei-Dei, Sư đơ̆ng Pơlei Nasaret, dêh Galilê.”

Yêsu pơpuh đe mơdro lăm hnam akŭm 'Bok Kei-Dei tơm

¹² Yêsu mơ̆t tơ hnam akŭm 'Bok Kei-Dei tơm, Sư 'bôh đe mơdro lăm hnam noh, na Sư pơpuh tơlĕch lu đe mă mơdro noh, tơlơ̆ tơpơ̆k lu gơ'bang lu đe tơplih băl jên. Lu tang-dŏ lu đe mă tĕch sem kơtơp Sư tơlơ̆ tơpơ̆k đĭ-đăng.

¹³ Sư khan kơ lu bơngai ei thoi âu: “Đe chih roi nơ̆r 'Bok Kei-Dei lăm sơ̆p hla bơar Sư thoi âu: ‘Hnam akŭm kơkuh kơ Inh wă lê̆ kơ đe krao khan kơ Inh lăm noh,’ Mă-lei iĕm mơdro lăm noh, pơgŏ athei đe răt kăp jên, iĕm pơm kơ hnam âu thoi lĕ kơ anih hnam đe tơtông klĕ.”

¹⁴ Kơplah noh đei lu bơngai măt tol, lu bơngai jơ̆ng kue năm tơ Sư, na Sư pơklaih hloi.

¹⁵ Lu 'bok soi tih, lu thây bơtho đe Juđê 'bôh tơdrong mơsêh Sư pơm noh păng kơtơ̆ng lu đe hơ'lơ̆p wang hô pơma ư-ang kơ Sư khan: “Hôsana, bơnê kơ 'Bok Krist Kon Sâu pơtao Đawit.” Lu sư 'bôh thoi noh, lu sư blĕk dêh.

¹⁶ Na lu sư năm khan kơ Yêsu: “Ih hăm kơtơ̆ng lu đe hơ'lơ̆p pơma ei?” Yêsu khan: “Kơtơ̆ng. Bĭ iĕm tam mă đŏk lăng ôh hă đe chih roi tơdrong 'Bok Kei-Dei thoi âu: Ơ Kră Yang, Ih ăn kơ lu hơ'lơ̆p păng lu bơngai nge băt pơma bơnê ư-ang kơ Ih?”

¹⁷ Klaih kơ noh Sư sơlah đơ̆ng lu đe noh năm tơ Pơlei Bethani 'bĭch tơ ei.

Yêsu sơkat kơ 'long hơra lôch

¹⁸ Lăp pơgê dơning Yêsu hăm lu bơngai pơhrăm păng Sư năm dơ̆ng tơ Pơlei Jêrusalem na Yêsu pơngot.

¹⁹ Na Sư 'bôh minh tơnơm 'long hơra 'bơ̆t cheng trong. Na Sư thar năm lăng 'long hơra noh ngêh kơ đei plei, plă kơ ưh, 'bôh pôm hla đĕch. Na Yêsu sơkat kơ 'long hơra noh khan: “Đơ̆ng âu tơ anăp e 'nĕ pă plei dơ̆ng.” Sĭt tơpă tơnơm 'long hơra noh kro lôch hloi.

²⁰ Lu bơngai pơhrăm păng Sư 'bôh tơdrong noh mah hlĭch kơ đon păng khan: “Thoi yơ, bơ̆n 'nao 'bôh 'long hơra âu oei arih, mă dang ei khan kro lôch boih?”

²¹ Yêsu khan kơ lu sư: “Inh khan kơ iĕm tơpă, dah iĕm đei đon lui kơjăp, 'nĕ kơ pơngiĕl, lei ưh kơ sĭ kơ pôm 'long hơra âu đĕch ôh iĕm gơh sơkat. Dah iĕm wă sơkat kơ kông âu gơh mơ̆n. Iĕm khan thoi âu: ‘Weh bĕ e, hiŏng kơtah kơdih tơ đak dơsĭ to.’ Tơdrong iĕm pơma noh gô 'bôh hloi tơpă.

²² Mă tơdrong kiơ kiơ iĕm krao khan apinh 'Bok Kei-Dei, dah iĕm lui kơ Sư gô ăn tơdrong iĕm apinh noh, lei iĕm gô đei tơpă.”

Bu ăn kơ Yêsu pơpuh đe mơdro đơ̆ng hnam akŭm?

²³ Yêsu năm dơ̆ng tơ hnam akŭm 'Bok Kei-Dei tơm wă bơtho đe tơ noh. Kơplah Sư oei bơtho đei lu 'bok soi tih păng lu đe kră sek tơlang năm jet Yêsu thoi âu: “Bu ăn kơ Ih pơpuh đe mơdro đơ̆ng hnam akŭm âu păng chă bơtho đe lăm hnam akŭm âu mơ̆n?”

²⁴ Na Yêsu khan kơ lu sư: “Lei Inh kư̆m wă jet iĕm minh tơdrong mơ̆n. Dah iĕm tơl Inh, lei Inh kư̆m tơl tơwih kơ iĕm băt bu ăn kơ Inh pơpuh đe păng bơtho đe tơ lăm hnam akŭm.

²⁵ Bĭ tơdrong Yôhan pơm kơ đe 'batem noh sơ̆ đơ̆ng bu ăn, đơ̆ng 'Bok Kei-Dei dah đơ̆ng kon bơngai?” Na lu sư pơđâu băl khan: “Bơ̆n wă khan kơ Sư thoi yơ? ‘Dah bơ̆n khan đơ̆ng 'Bok Kei-Dei,’ lei Sư khan: ‘Iĕm kuă kơ kiơ lui kơ Yôhan bơtho?’

²⁶ Dah bơ̆n khan đơ̆ng kon bơngai, lei hli kơ lu kon pơlei klơ̆m bơ̆n păng tơmo, yua kơ đĭ-đăng jơ̆p-jang kơ lu kon pơlei pơla lu sư khan băt kơ Yôhan bơngai pơtruh nơ̆r 'Bok Kei-Dei.”

²⁷ Thoi noh na lu sư khan: “Nhôn ưh kơ băt ôh.” Na Yêsu khan kơ lu sư: “Lei Inh kư̆m ưh kơ roi ăn kơ iĕm bu ăn kơ Inh pơpuh đe păng bơtho đe tơ lăm hnam akŭm âu mơ̆n.”

'Bă sư wơh 'bar 'nu kon sư năm jang

²⁸ Yêsu khan dơ̆ng kơ lu sư: “Minh 'nu bơngai đei 'bar 'nu kon. Sư wơh kon kơdră sư năm jang: ‘Ơ dăm, năr âu e năm jang tơ mir hơmu bơ̆n ho.’

²⁹ Kon sư khan: ‘Hăt lah, inh ưh kơ wăn.’ Mă-lei pă 'biơ̆ kơ noh kon sư tơchĕng mơnat kơ 'bă sư, na sư năm jang hloi.

³⁰ 'Bă sư wơh dơ̆ng kon sư mă 'bar kư̆m thoi sư khan kơ kon kơdră sư hei. Kon sư drơ̆ng: ‘Ŏ, inh năm jang 'bă.’ Mă-lei sư ưh kơ năm jang tơpă ôh, sư hơlĕnh kơ 'bă sư đĕch.

³¹ Thoi noh boih na iĕm tơchĕng lăng, 'bar 'nu kon noh, kon ayơ chu kơ nơ̆r 'bă sư?” Lu sư khan: “Kon kơdră chu.” Na Yêsu khan: “Inh khan kơ iĕm tơpă, lu bơngai iŏk jên thuê̆, lu drŏ-kăn pơm đi, lu sư chu thoi kon kơdră noh boih. Lu sư băt ăn kơ 'Bok Kei-Dei pơgơ̆r lu sư boih mă-lei gah lu iĕm tam mă chu 'mơ̆i.

³² Yôhan, sư bơngai bơtho tơdrong 'lơ̆ng tơpăt, sư bơtho truh tơ iĕm tơ âu boih wă kơ iĕm pơm đon 'lơ̆ng tơpăt păng 'Bok Kei-Dei ră, mă-lei iĕm ưh kơ wă chu lui kơ nơ̆r sư bơtho. Lu bơngai iŏk jên thuê̆ păng lu drŏ-kăn pơm đi wih lui hơdrol kơ iĕm dơ̆ng. Iĕm 'bôh lu sư đĭ lui boih lĕ mă-lei iĕm ưh tam chu tơbral 'mơ̆i.”

Kră bơngai Juđê wă pơlôch Yêsu thoi bơngai jang mơng mir 'long hơmu pơlôch kon tơ'ngla mir

³³ Yêsu khan dơ̆ng kơ lu sư: “Apinh iĕm mơ̆ng tơdrong pơtih gia âu dơ̆ng: Đei minh 'nu bơngai pơm mir wă pơtăm plei hơmu. Sư war mir tăp dăr boih, lăm mir noh sư pơm minh pôm tơpăl tơmo wă peh plei hơmu chơpĕt iŏk đak sư. Păng sư pơm minh pôm hnam tông wă gak plei hơmu. Sư pơm tôm tơdrong noh boih na sư ăn kơ đe jang mơng, tơ'ngla sư năm oei tơ dêh nai.

³⁴ Lăp trŏ kơ bơyan plei hơmu đum boih, na sư wơh lu đĭch đam sư năm tơ lu bơngai jang mơng noh wă iŏk plei hơmu mă 'măn kơ tơ'ngla sư.

³⁵ Mă-lei lu bơngai jang mơng rôp lu đĭch đam sư, mơ'nah sư tôn teh, mơ'nah sư pơlôch, mơ'nah sư klơ̆m păng tơmo.

³⁶ Na 'bok tơ'ngla mir noh wơh dơ̆ng lu đĭch đam sư năm lơ hloh kơ lu bơngai năm hơdrol, lu bơngai jang mơng pơm oei lei-lăi.

³⁷ Tơpo hơtuch 'bok tơ'ngla mir wơh kon sư khan: ‘Lu đe noh gô chu yom kơ kon inh thâu.’

³⁸ Lăp lu bơngai jang mơng 'bôh kon 'bok tơ'ngla mir truh tơ lu sư, lu sư pơđâu dih băl khan: ‘Bơngai âu boih kon 'bok tơ'ngla mir âu, na dang ei bĕ bơ̆n pơlôch sư na mă mir âu jing mir bơ̆n.’

³⁹ Lu đe noh rôp hloi kon 'bok tơ'ngla mir hiŏng hơtat tơ jih mir pơlôch hloi.

⁴⁰ “Lu đe noh pơm thoi noh boih na 'bok tơ'ngla mir năm tơ lu bơngai noh, sư gô pơm kiơ kơ lu bơngai noh?”

⁴¹ Na đe khan: “Sư gô pơlôch đĭ lu bơngai pơm kơnê̆ noh, na ăn kơ bơngai nai jang dơ̆ng, na lu bơngai jang mơng đơ̆ng rŏng noh gô klah asong sư plei hơmu tơpă.”

⁴² Yêsu jet lu sư: “Tơdrong 'Bok Kei-Dei âu iĕm tam mă đŏk lăng tơpă hă? ‘Tơmo lu bơngai man hnam tŭk boih, tơmo noh 'Bok Kei-Dei lăng gĭt tơpă man sư 'bơ̆t mum hnam. Sư pơm thoi noh trŏ tơpă, mă măt bơ̆n lăng kư̆m 'lơ̆ng mơ̆n.’

⁴³ Tơdrong noh gô trŏ kơ lu iĕm na Inh khan kơ iĕm: Iĕm pơm kuă kơ Inh thoi noh, na 'Bok Kei-Dei ưh kơ wă pơm pơtao iĕm ôh. Sư pơm pơtao lu bơngai nai đĕch, lu bơngai nai gô pơm kiơ̆ kơ Sư.

⁴⁴ Tơmo mă iĕm kuă noh, dah bơngai bu huŏng hơtat 'bơ̆t tơmo noh, bơngai noh gô tơgơ̆ jơ̆ng ti sư păng pơchah kơ̆l sư. Dah tơmo noh huŏng 'bơm bơngai bu, akâu bơngai noh gô pơchah hĕch hoch thoi 'mui teh.”

^45-46 Lu đe Pharisi păng 'bok soi tih kơtơ̆ng dôm tơdrong Yêsu pơma pơjuang noh hei, lu sư băt kơ tơdrong noh trŏ kơ lu sư tơpă, na lu sư wă rôp hloi Yêsu kơplah noh ră, mă-lei lu sư hli kơ lu kon pơlei pơla 'bơ̆t ei, yua kơ lu kon pơlei pơla băt kơ Yêsu bơngai pơtruh nơ̆r 'Bok Kei-Dei tơpă.