Mathiơ 20 - Sơ̆p Hlabơar Nơ̆r 'Bok Kei-Dei

¹ “Pơtih gia 'Bok Kei-Dei wă pơgơ̆r bơ̆n thoi âu: Thoi minh 'nu tơ'ngla mir đơ̆ng pơgê hrôih chă bơngai jang tơ mir hơmu sư.

² Sư chă đei boih na sư pơma tơdrong jên kơ lu bơngai wă jang kơ sư, minh năr minh hlak jên so sơ̆. Đơ̆ng noh na lu đe ei năm jang tơ mir hơmu sư.

³ Truh tơsĭn jơ 'bok ei lĕch tơ 'ngoaih, sư 'bôh đe ngôi 'bơ̆t anih đe mơdro, lu sư ngôi đĕch.

⁴ Na 'bok tơ'ngla mir hơmu ei khan: ‘Iĕm hăm wă năm jang kơ inh, inh apah trŏ?’

⁵ Lu đe ei năm jang hloi. Truh 'năr dơ̆ng, glơh, 'bok ei lĕch lăng anih đe mơdro, 'bôh đe ngôi kiơ̆ ei na sư khan lei-lăi thoi lu bơngai hơdrol hei.

⁶ Truh 'năr pơđăm jơ kơsơ̆, 'bok ei lĕch lăng dơ̆ng tơ anih đe mơdro oei 'bôh bơngai nai ngôi đĕch lei-lăi, na 'bok ei khan kơ lu sư: ‘Lơliơ iĕm ngôi đĕch prăt năr ưh kơ wă jang?’

⁷ Lu đe ei khan: ‘Yua kơ ưh kơ đei bơngai chă nhôn jang.’ 'Bok ei khan: ‘Lei iĕm năm jang tơ mir inh bĕ.’ Lu đe noh năm jang hloi.

⁸ “Lăp truh 'năr mơ̆t boih, 'bok tơ'ngla mir ei khan kơ bơngai kai wei-lăng đe jang khan: ‘Krao lu sư bĕ, jah apah jên. Ih apah lu bơngai jang đơ̆ng rŏng hơdrol, lu bơngai jang hơdrol đơ̆ng rŏng.’

⁹ Bơngai kai apah lu bơngai jang đơ̆ng pơđăm jơ, rim 'nu kơ lu sư minh hlak jên.

¹⁰ Na lu bơngai jang hơdrol ngêh kơ 'bok tơ'ngla mir apah lu sư hloh 'biơ̆, plă kơ hơnơ̆ng lu bơngai 'nao jang mơ̆n.

¹¹ Mă-lei lu sư iŏk iăi mơ̆n. Na lu sư pơma kơ 'bok tơ'ngla mir khan:

¹² ‘Lơliơ ih apah lu đe noh jang đơ̆ng rŏng nhôn mơ'nah lăp minh jơ đĕch mă hơnơ̆ng kơ nhôn jang lap tŏ prăt năr?’

¹³ Na 'bok tơ'ngla mir ei khan kơ minh 'nu lăm lu sư: ‘Ơ ma, inh ưh kơ pơma hơlĕnh kơ ih ôh, inh apah lu iĕm minh hlak jên noh, kiơ̆ kơ nơ̆r ba pơma băl pơgê hei. Jên âu ưh kơ đei jên bu ôh jên inh kơdih.

¹⁴ Iŏk jên noh brŏk kơ ih bĕ, inh apah lu bơngai jang đơ̆ng rŏng ih dôm ăi kơ ih kư̆m bưh.

¹⁵ Tơdrong noh inh hơlăng kơ sư đĕch, ih 'nĕ pă 'nhĕng.’ ”

¹⁶ Tơdrong âu Yêsu pơma pơtih gia kơ 'Bok Kei-Dei wă pơgơ̆r bơ̆n: “Mă dôm tơdrong kiơ lu bơngai mă pơm iĕ kơ đe dang ei, ning-mônh sư gô tih; dôm lu bơngai pơm tih kơ đe dang ei ning-mônh sư jing iĕ.”

Yêsu roi pơnhên dơ̆ng gah tơdrong Sư wă lôch

¹⁷ Kơplah lu sư oei rok trong năm tơ Pơlei Jêrusalem na Yêsu krao mơjĭt-'bar 'nu bơngai pơhrăm păng Sư weh ataih 'biơ̆ kơ trong, na Sư khan:

¹⁸ “Iĕm mơ̆ng bĕ, bơ̆n năm tơ Pơlei Jêrusalem. Tơ ei kơnh đe wă rôp Inh Kon Bơngai, jao kơ lu 'bok soi tih păng lu thây bơtho tơdrong juăt đe Juđê. Lu sư gô sek tơlang tơdrong Inh,

¹⁹ păng jao Inh kơ lu bơngai dêh đe pơlôch. Lu dêh đe ei gô hiĕk achơ̆ kơ Inh păng teh tach pơjĭ Inh, klaih kơ noh sư pơ̆ng pơlôch hloi tơ 'long pơglang. Mă-lei kơtĕch pêng năr đơ̆ng rŏng Inh gô iung arih dơ̆ng.”

Yakơ hăm Yôhan 'maih pơm tih ning-mônh

²⁰ Hơtai ei akăn Sêbêđê năm tơ Yêsu yak hơdai kon sư bre Yakơ hăm Yôhan. Na sư sơtơ̆p kŭl-tăng kơkuh kơ Yêsu apinh Yêsu tơgŭm sư.

²¹ Yêsu jet sư: “Ih wă kơ kiơ?” Akăn Sêbêđê khan: “Inh wă kơ Ih ăn kơ 'bar 'nu kon inh âu oei minh 'nu gah 'ma, minh 'nu gah 'ngiĕo, kơplah Ih pơm pơtao nhôn ning-mônh.”

²² Yêsu khan kơ bre kon sư: “Lơliơ biĕm ưh kơ pơwao tơdrong biĕm wă noh? Biĕm hăm kĕ iŏk tơdrong anat thoi Inh iŏk?” Bre sư khan: “Nhi kĕ iŏk.”

²³ Yêsu khan dơ̆ng: “Biĕm gô iŏk tơdrong anat thoi Inh, mă-lei tơdrong pơm tih oei gah 'ma gah 'ngiĕo kơ Inh noh, ưh kơ trŏ kơ Inh ăn ôh, tơdrong noh gô mơ̆ng kơ 'Bă Inh đĕch băt.”

²⁴ Na lu mơjĭt 'nu lu bôl sư kơtơ̆ng bre sư pơma thoi noh, na lu sư hil kơ bre noh.

²⁵ Thoi noh na Yêsu krao akŭm pơđĭ lu sư păng khan: “Iĕm băt mơ̆n, lu bơngai ala teh âu mơ'nah pơm yŏng pơgơ̆r, sư chă pơgŏ pơđep lu teh đak sư pơgơ̆r.

^26-27 Mă-lei iĕm 'nĕ kơ rok lu 'bok pơgơ̆r noh hŏ. Dah bu lăm lu iĕm 'maih pơm yŏng pơgơ̆r lu iĕm, bơngai noh athei pơm thoi lĕ đĭch đam iĕm.

²⁸ Kư̆m thoi Inh Kon Bơngai mơ̆n, Inh jur tơ ala teh âu ưh kơ sĭ Inh wă chă pơgŏ pơđep đe awih awăn kơ Inh ôh; Inh wă kơ tơ'ngla Inh kơdih awih awăn kơ đe păng Inh wă kơ tơ'ngla Inh kơdih lôch tang huai iŏk lơ bơngai.”

Yêsu pơklaih 'bar 'nu bơngai măt tol

²⁹ Lăp lu đe Yêsu lĕch đơ̆ng Pơlei Jêrikô đei lơ bơngai kiơ̆ Sư.

³⁰ Tơ anăp lu sư đei 'bar 'nu bơngai măt tol oei ngôi 'bơ̆t cheng trong. Lăp bre sư kơtơ̆ng đe khan Yêsu wă yak trong bre sư, na bre sư krao 'bơ̆r re khan: “Ơ Yêsu, ơ 'Bok Krist Kon Sâu pơtao Đawit, apinh Ih mơnat kơ nhi 'biơ̆ bĕ.”

³¹ Lu bơngai tơpôl ei khă bre sư kuă ăn krao dơ̆ng ră, mă-lei bre sư rai krao 'bơ̆r re: “Ơ 'Bok Krist Kon Sâu pơtao Đawit, apinh Ih mơnat kơ nhi 'biơ̆ bĕ.”

³² Na Yêsu dơ̆ng jet bre sư: “Biĕm wă kơ kiơ?”

³³ Bre sư khan: “Ơ 'Bok, nhi wă kơ Ih pơklaih măt nhi gơh 'bôh hơdah.”

³⁴ Yêsu lăng mơnat kơ bre sư dêh, na Sư pel măt bre sư, măt bre sư 'bôh hơdah hloi na bre sư kiơ̆ hloi Yêsu.