Mathiơ 13 - Sơ̆p Hlabơar Nơ̆r 'Bok Kei-Dei

¹ Năr noh mơ̆n, Yêsu lĕch đơ̆ng hnam năm tơ jih đak dơsĭ tơoei bơtho đe.

² Đei lơ bơngai akŭm tăp dăr kơ Sư, na Sư tŏk oei kơpal thŏng-nan tơ đak, lu bơngai tơpôl oei tơ jih đak.

³ Yêsu bơtho lơ tơdrong hăm nơ̆r pơtih gia kơ lu sư thoi âu: “Đei minh 'nu bơngai năm rei adrĕch 'ba.

⁴ Lăp sư rei, đei găr mơ'nah huŏng tơ trong, na sem jur sa.

⁵ Kư̆m đei mơ'nah huŏng kơpal tơmo trêl ưh kơ gan đei teh lơ. Ưh kơ đunh sư kư̆m chăt mơ̆n, mă teh ưh kơ mah.

⁶ Lăp 'năr tŏ boih sư jô na lôch hloi, yua kơ rơh sư chăt ưh kơ jrŭ.

⁷ Kư̆m đei mơ'nah huŏng tơ 'nhĕt jơla. Lăp 'nhĕt jơla kơjung boih jơla krênh 'ba noh.

⁸ Kư̆m đei mơ'nah huŏng tơ teh 'lơ̆ng, na đei hloi plei trem mơ'nah minh-hrĕng, mơ'nah tơdrâu-jĭt, mơ'nah pêng-jĭt.

⁹ Bu đei đon athei tơchĕng kơdih bĕ.”

Yua kơ kiơ Yêsu bơtho pơjuang?

¹⁰ Klaih kơ noh lu bơngai pơhrăm păng Sư năm jet Sư: “Yua kơ kiơ Ih wă bơtho pơjuang ngăl?”

¹¹ Yêsu khan: “'Bok Kei-Dei ăn kơ iĕm băt gah tơdrong Sư wă pơgơ̆r kon bơngai thoi yơ, mă-lei Sư ưh kơ ăn kơ lu bơngai tơpôl noh băt ôh.

¹² Bơngai bu hlôh, 'Bok Kei-Dei gô pơthim ăn kơ sư hlôh hloh kơ noh na sư gô hlôh tơpă. Bơngai bu ưh kơ wă mơ̆ng, bơngai noh rai hiong dôm tơdrong sư hlôh.

¹³ Inh bơtho pơjuang yua kơ lu sư lăng khŏm khŏm, mă lu sư ưh kơ 'bôh; lu sư mơ̆ng Inh bơtho tơhlôh ră, mă lu sư ưh kơ wao.

¹⁴ Thoi noh na 'blep trŏ thoi Êsai chih khan lê̆ hơdrol sơ̆ thoi âu: ‘Lu sư mơ̆ng Inh bơtho khŏm khŏm ră mă-lei lu sư ưh kơ hlôh, Măt lu sư lăng khŏm khŏm ră mă ưh kơ 'bôh tơdrong kiơ.

¹⁵ Yua kơ đon lu sư kơtul dêh, Mă-lei lu sư oei wă pơchĭt đon sư kơdih khŏm khŏm 'mơ̆i, Păng măt lu sư wă kơ tep ling-lang. Dah lu sư 'nĕ kơ pơm đon thoi noh, lei măt lu sư gơh 'bôh, Đon lu sư gơh kơtơ̆ng nhên, lu sư gơh tơchĕng kơdih băt wih tơ 'Bok Kei-Dei, Na Sư gô pơklaih đĭ dôm tơdrong yoch lu sư.’

¹⁶ Yêsu oei pơma kơ lu bơngai pơhrăm păng Sư khan: “Mă-lei gah lu iĕm âu, iĕm hiôk yua kơ măt iĕm 'bôh, đon iĕm gơh hlôh.

¹⁷ Inh khan kơ iĕm tơpă, đei lơ bơngai pơtruh nơ̆r 'Bok Kei-Dei păng lơ bơngai lui kơ 'Bok Kei-Dei sơ̆ sơdơ̆r kơ 'bôh tơdrong iĕm 'bôh dang ei ră mă-lei lu sư ưh kơ tam 'bôh ôh; lu sư 'maih mơ̆ng dôm tơdrong iĕm kơtơ̆ng dang ei ră, mă-lei lu sư ưh kơ tam kơtơ̆ng ôh.

Yêsu tơblang tơdrong bơngai rei 'ba

¹⁸ “Iĕm mơ̆ng bĕ wă kơ hlôh tơdrong bơngai rei 'ba 'noh hei wă khan kiơ.

¹⁹ Lu bơngai mơ̆ng đe bơtho tơdrong 'Bok Kei-Dei wă pơgơ̆r bơ̆n, lu mơ'nah ưh kơ hlôh, lu sư thoi lĕ găr 'ba đe rei huŏng 'bơ̆t trong. Na yang kơnê̆ Satan năm tơbeh lê̆ kuă ăn iŏk nơ̆r đe bơtho 'noh.

²⁰ Lu bơngai mă thoi lĕ găr 'ba huŏng 'bơ̆t tơmo trêl, lu sư kơtơ̆ng đe bơtho tơdrong 'Bok Kei-Dei, lu sư hưch hanh păng iŏk hloi mơ̆n.

²¹ Kư̆m đei ră tơnơm 'ba mă-lei rơh sư chăt ưh kơ jrŭ sư jing jô lôch hloi, 'noh wă khan lu sư đei ră đon lui mă-lei ưh kơ đunh lu sư jing achăng lê̆ yua kơ đe areh kơ lu sư lui kơ 'Bok Kei-Dei.

²² Lu mơ'nah thoi lĕ kơ găr 'ba huŏng 'bơ̆t 'nhĕt jơla. Lu sư kơtơ̆ng đe bơtho tơdrong 'Bok Kei-Dei ră mă-lei lu sư wă tơchĕng tơdrong arih sư kăl hloh, sư wă kơ mơdrŏng; thoi noh na tơdrong 'Bok Kei-Dei ưh kơ gơh wơ̆ păng ưh kơ đei plei.

²³ Gah lu bơngai mă thoi lĕ kơ găr 'ba huŏng 'bơ̆t teh 'lơ̆ng, lu bơngai noh boih kơtơ̆ng tơdrong 'Bok Kei-Dei păng hlôh wao, kiơ̆ hloi kơjăp, na đei plei tơpă, mơ'nah minh-hrĕng, mơ'nah tơdrâu-jĭt, mơ'nah pêng-jĭt.”

Pơtih gia 'nhĕt păng 'ba chăt hơdai

²⁴ Yêsu pơma pơtih gia dơ̆ng kơ đe tơdrong 'Bok Kei-Dei wă pơgơ̆r bơ̆n thoi âu: “Đei minh 'nu bơngai năm rei adrĕch 'ba 'lơ̆ng tơ mir sư.

²⁵ Na đei minh 'nu bơngai nai areh kơ sư, tơ kơmăng kơplah hnam dơnŏ sư oei tep minh 'nu bơngai mă areh kơ sư noh năm rei găr 'nhĕt tơ mir sư na weh tơ nai.

²⁶ 'Ba păng 'nhĕt wơ̆ hơdai hơnơ̆ng truh huăt, na bơngai mă rei 'ba noh kơnăl kơ 'ba noh 'nhĕt krênh dêh.

²⁷ Na lu đĭch sư năm jet sư khan: ‘Ơ 'bok, sơnăm sơ̆ ih rei adrĕch 'lơ̆ng kư̆m thoi sơnăm âu, mă-lei 'nhĕt dă 'biơ̆, na liơ sơnăm âu 'nhĕt krênh kranh hloh kơ sơnăm sơ̆?’

²⁸ Yŏng sư khan: ‘Đei bơngai nai areh kơ inh na sư năm rei găr 'nhĕt tơ mir bơ̆n.’ Lu đĭch sư khan: ‘Ih hăm wă kơ nhôn buch pơđĭ 'nhĕt noh?’

²⁹ Yŏng sư khan: ‘Ưh ôh, hli kơ iĕm buch 'bơm 'ba.

³⁰ Lê̆ 'ba hăm 'nhĕt wơ̆ hơdai truh đum kư̆m bưh na inh gô khan kơ iĕm bơngai mă kĕch 'ba noh ning-mônh thoi âu: Hơdrol kơ iĕm wă kĕch, iĕm buch pơđĭ 'nhĕt noh 'mơ̆i chô̆ akŭm tung tŭk tơ ŭnh, đơ̆ng noh na iĕm kĕch tuh 'ba bơ̆n tơ kŭ.’ ”

Pơtih gia kơ găr sơ'bei

³¹ Yêsu pơma pơtih gia dơ̆ng kơ lu bơngai tơpôl noh thoi âu: “Lu bơngai 'Bok Kei-Dei pơgơ̆r, lu sư thoi lĕ kơ găr sơ'bei, găr noh iĕ hloh kơ đĭ-đăng găr nai.

³² Mă-lei lăp đe rei boih sư chăt kơjung hloh kơ đĭ-đăng lu hla 'nhot nai. Sư chăt kơjung atŏ kơ 'long nai mơ̆n na sem gơh pơm tơpu tơ dơng sư.”

Pơtih gia kơ 'buih pông

³³ Yêsu oei bơtho pơtih gia kơ lu sư dơ̆ng: “Tơdrong 'Bok Kei-Dei pơgơ̆r kon bơngai thoi lĕ kơ 'buih pông. Minh 'nu drŏ-kăn iŏk 'buih pông tŏ sĕt bơlŭ păng tơpŭng mi minh kơthŭng na tơpŭng noh kư̆m pông pơđĭ kơ minh kơthŭng noh mơ̆n.”

³⁴ Yêsu bơtho dôm tơdrong noh kơ lu bơngai tơpôl, Sư bơtho pơtih gia ngăl,

³⁵ wă kơ trŏ thoi minh 'nu bơngai pơtruh nơ̆r 'Bok Kei-Dei khan lê̆ hơdrol sơ̆ thoi âu: “Inh iŏk tơdrong mă đe ưh tam kơtơ̆ng đơ̆ng 'Bok Kei-Dei pơjing plĕnh teh sơ̆, Wă bơtho pơtih gia kơ lu sư dang ei.”

Yêsu tơblang tơdrong 'ba păng 'nhĕt chăt hơdai

³⁶ Yêsu bơtho kơ lu bơngai tơpôl đang boih, na Sư mơ̆t tơ hnam. Lu bơngai pơhrăm năm jet Sư thoi âu: “Apinh Ih tơblang kơ nhôn tơdrong pơtih gia 'ba păng 'nhĕt chăt hơdai noh hei wă khan kiơ.”

³⁷ Na Yêsu tơblang ăn kơ lu sư: “Bơngai mă rei adrĕch 'ba 'lơ̆ng noh wă khan Inh Kon Bơngai.

³⁸ Mir noh wă khan jơ̆p-jang kơ teh đak. Adrĕch 'ba 'lơ̆ng noh wă khan lu bơngai mă ăn kơ 'Bok Kei-Dei pơgơ̆r sư. 'Nhĕt noh wă khan bơngai kiơ̆ yang kơnê̆.

³⁹ Bơngai mă rei găr 'nhĕt noh wă khan yŏng pơgơ̆r yang kơnê̆. Bơyan 'ba noh wă khan năr tôch ning-mônh. Lu bơngai kĕch noh wă khan lu linh jang 'lơ̆ng.

^40-41 Lu bơngai mă chô̆ akŭm 'nhĕt mă tung tŭk tơ ŭnh noh wă khan gô truh năr tôch ning-mônh Inh Kon Bơngai gô wơh lu linh jang kơ Inh năm rôp dôm lu bơngai mă pơtuah lu bơngai mă lui kơ Inh păng dôm lu bơngai mă pơm kơnê̆ đơ̆ng lăm dêh char Inh pơgơ̆r,

⁴² na klơ̆m tŭk lu sư tơ dơnâu ŭnh, lê̆ lu sư nhơ̆m hmoi tơkăp sơnĕnh tơ noh.

⁴³ Gah lu bơngai mă 'lơ̆ng tơpăt, năr noh kơnh lu sư oei hiôk hơđơ̆ng tơ dêh char 'Bă bơ̆n, dang lu sư pơchrang hơdah thoi lĕ kơ măt 'năr. Bu đei đon athei tơchĕng kơdih bĕ.

Pơtih gia tơmam đe gĭt 'bŭ lăm teh

⁴⁴ “Tơdrong 'Bok Kei-Dei pơgơ̆r bơ̆n kư̆m thoi tơmam đe gĭt 'bŭ ôn lăm teh. Đei minh 'nu bơngai nai 'bôh tơmam đe 'bŭ tơ mir noh na sư gơlơ̆p tơmam noh păng teh wă kơ hrĕp. Jơhngơ̆m sư hiôk dêh. Sư brŏk tơ hnam tĕch đĭ dôm mŭk tơmam sư na răt mir đe 'noh.

Pơtih gia tơmam hu đe gĭt

⁴⁵ “Pơtih gia thoi âu dơ̆ng: Lu bơngai mă ăn 'Bok Kei-Dei pơgơ̆r sư, noh kư̆m thoi bơngai adrin răt tơmam hu đe gĭt dêh.

⁴⁶ Lăp sư 'bôh đe tĕch tơmam hu rang hloh kơ hu nai na sư brŏk tơ hnam tĕch đĭ mŭk tơmam sư na răt tơmam hu mă đe gĭt noh.

Pơtih gia kơ lu bơngai traih jal

⁴⁷ “'Bok Kei-Dei pơgơ̆r bơ̆n thoi âu: Pơtih gia thoi lu bơngai juăt kơ traih jal tơ đak dơsĭ sư đei ka lơ, ka đe gĭt, ka đe ưh,

⁴⁸ 'bĕnh kơ jal sư. Na sư hiot atŏk tơ kông tơoei rơih iŏk dôm lu ka đe gĭt tah lăm bai. Ka đe ưh sư tŭk.

⁴⁹ Na mưh truh năr tôch ning-mônh kư̆m thoi noh mơ̆n. Lu linh jang kơ Inh năm rơih iŏk dôm lu bơngai kơnê̆ đơ̆ng lu bơngai 'lơ̆ng,

⁵⁰ tơlơ̆ tŭk lu sư tơ dơnâu ŭnh, lê̆ lu sư nhơ̆m hmoi kăp sơnĕnh tơ noh.”

⁵¹ Yêsu jet lu bơngai pơhrăm păng Sư: “Dôm tơdrong pơtih gia noh hei iĕm tam hlôh?” Lu sư khan: “Nhôn hlôh boih.”

⁵² Yêsu khan: “Thoi noh na lu iĕm bơngai mă pơhrăm păng Inh, iĕm gô jing thây bơtho đe tơdrong 'Bok Kei-Dei pơgơ̆r kon bơngai, na iĕm bơtho đe tơdrong 'nao tơdrong so kư̆m thoi 'bok tơ'ngla hnam chă asong kơ đe tơmam 'nao păng tơmam so sư, gô mơ̆ng kơ sư wă.”

Kon pơlei Nasaret ưh kơ lui kơ Yêsu

^53-54 Yêsu bơtho dôm tơdrong pơtih gia noh đang boih, na Sư brŏk tơ pơlei Sư kơdih. Sư bơtho đe tơ hnam akŭm 'Bok Kei-Dei. Lu sư mơ̆ng hlĭch kơ đon păng khan: “Lơliơ Sư băt dôm tơdrong noh? Păng Sư gơh pơm tơdrong mơsêh tăm.

⁵⁵ Sư kon 'bok ot 'long đĕch lah, mĕ Sư Mari păng lu oh Sư Yakơ, Yôsep, Simôn, Jut.

⁵⁶ Lu oh Sư drŏ-kăn oei tơ âu mơ̆n. Na liơ Sư gơh pơm dôm tơdrong noh?”

⁵⁷ Lu đe noh 'nhĕng Sư hơgei na jing kuă lui kơ Sư. Yêsu khan kơ lu sư: “Lu bơngai pơtruh nơ̆r 'Bok Kei-Dei sơ̆, mưh tơ pơlei đe, lơ bơngai lăp đon 'maih mơ̆ng dêh dôm nơ̆r lu sư bơtho. Mă-lei lu bơngai oei pôm pơlei hăm lu sư, hnam dơnŏ lu sư, ưh kơ 'maih wă mơ̆ng tơdrong bơtho ôh. Na truh tơ Inh dang ei kư̆m lei-lăi.”

⁵⁸ Yêsu ưh kơ wă pơm tơ'bôh tơdrong mơsêh tơ pơlei Sư lơ ôh, yua kơ pơlei pơla Sư kuă lui kơ Sư.