Mathiơ 1 - Sơ̆p Hlabơar Nơ̆r 'Bok Kei-Dei

Anăn lu 'bok kơdră Yêsu sơ̆

¹ Yêsu Krist kon sâu pơtao Đawit, mă 'bok kơdră lu sư Abraham. Na tơ ala âu jô̆ tôm lu anăn 'bok kơdră Yêsu Krist sơ̆:

² Abraham pơjing Isăk, Isăk pơjing Jakôp, Jakôp pơjing Juđa hăm lu 'nhŏng oh sư.

³ Juđa pơjing Pêres hăm Sêra, mĕ bre sư Tamar, Pêres sư pơjing Hêsrôn, Hêsrôn pơjing Ram,

⁴ Ram pơjing Amminađap, Amminađap pơjing Nasôn, Nasôn pơjing Salmôn.

⁵ Salmôn hăm akăn sư Rahap pơjing đei kon drŏ-nglo, anăn sư Bôas. Bôas hăm akăn sư Rut kư̆m pơjing đei kon drŏ-nglo anăn sư Ôbêt, Ôbêt pơjing Jesê.

⁶ Jesê âu boih pơjing pơtao Đawit. Akăn Đawit đơ̆ng akăn Uri sơ̆ bre sư Đawit pơjing Sôlômôn.

⁷ Sôlômôn pơjing Rôbôam, Rôbôam pơjing Abijah, Abijah pơjing Asa,

⁸ Asa pơjing Jêhôsaphat, Jêhôsaphat pơjing Jôhôram, Jôhôram pơjing Ussia,

⁹ Ussia pơjing Jôtham, Jôtham pơjing Ahas, Ahas pơjing Hesekia,

¹⁰ Hesekia pơjing Manase, Manase pơjing Amôn, Amôn pơjing Jôsia,

¹¹ Jôsia pơjing Jekonia hăm lu 'nhŏng oh sư. Đơ̆ng noh boih lu bơngai Babilôn rôp anhăk lu bơngai Isơrael tơ dêh lu sư.

¹² Kơplah lu sư oei tơ dêh Babilôn na Jekonia pơjing Sealtien, Sealtien pơjing Serupbabel,

¹³ Serupbabel pơjing Abiut, Abiut pơjing Êliakim, Êliakim pơjing Asôr,

¹⁴ Asôr pơjing Satôk, Satôk pơjing Achim, Achim pơjing Êliut,

¹⁵ Êliut pơjing Êlêasar, Êlêasar pơjing Mathan, Mathan pơjing Jakôp,

¹⁶ Jakôp pơjing Yôsep, Yôsep klo Mari. Mari pơjing Yêsu, mă đe anăn Krist. Yêsu Krist âu boih bơngai mă 'Bok Kei-Dei ăn wă pơm pơtao bơ̆n.

¹⁷ Đơ̆ng Abraham truh tơ Đawit đei mơjĭt-puăn jơhnơr, đơ̆ng Đawit truh tơ đe rôp anhăk lu bơngai Isơrael tơ dêh Babilôn đei mơjĭt-puăn jơhnơr, đơ̆ng đe rôp bơngai Isơrael truh tơ đe đei tơpŭ kơ nge Yêsu Krist đei mơjĭt-puăn jơhnơr mơ̆n.

Mari tơpŭ kơ Yêsu Krist

¹⁸ Đe tơpŭ kơ Yêsu sơ̆ thoi âu: Mari sơkơ̆t hăm Yôsep. Adrol kơ bre sư tơoei băl Mari băt akâu sư anăp boih, yua kơ Yang Bơhngol 'Lơ̆ng đơ̆ng 'Bok Kei-Dei ăn kơ sư thoi noh.

¹⁹ Klo sư Yôsep bơngai 'lơ̆ng tơpăt, sư ưh kơ pơjăm Mari ngôi kư̆ kă hăm đe wă kơ sư mơlâu kơ đe ôh. Sư tơchĕng wă achăng Mari ră, mă-lei sư ưh kơ đei roi kơ đe ôh.

²⁰ Kơplah sư oei tơchĕng tơdrong 'noh, na măng noh sư apo 'bôh linh jang 'lơ̆ng 'Bok Kei-Dei jur khan kơ sư thoi âu: “Ơ Yôsep, kon sâu Đawit, ih 'nĕ kơ hli iŏk Mari pơm akăn ih, mă sư oei anăp dang ei noh đơ̆ng Yang Bơhngol 'Lơ̆ng ăn kơ sư.

²¹ Sư gô tơpŭ kơ minh 'nu kon drŏ-nglo, ih anăn Sư Yêsu, yua kơ Sư wă dŏng pơklaih bơngai bu mă lui kơ Sư đơ̆ng tơdrong yoch.”

²² Dôm tơdrong 'noh 'blep trŏ thoi 'Bok Kei-Dei ăn kơ minh 'nu bơngai khan lê̆ hơdrol sơ̆ thoi âu:

²³ “Đei minh 'nu adruh gô anăp wă tơpŭ kon drŏ-nglo, Đe anăn kon Sư noh Êmanuel,” Êmanuel wă khan: 'Bok Kei-Dei oei hơdai hăm bơ̆n.

²⁴ Yôsep iung đơ̆ng tep, sư pơm kiơ̆ dôm tơdrong thoi linh jang 'lơ̆ng 'Bok Kei-Dei khan kơ sư păng sư oei hloi kơ Mari pơm akăn sư.

²⁵ Mă-lei sư ưh kơ đei ngôi hơdai hăm Mari truh tơ năr Mari tơpŭ kơ kon nge 'noh. Na Yôsep anăn kon nge 'noh Yêsu.