Markôs 7 - Sơ̆p Hlabơar Nơ̆r 'Bok Kei-Dei

¹ Lu bơngai Pharisi năm akŭm tơ Yêsu. Păng đei lu 'bok thây bơtho tơdrong juăt đe Juđê đơ̆ng Pơlei Jêrusalem kư̆m năm akŭm tơ Yêsu mơ̆n.

² Lăp lu sư akŭm, na lu sư 'bôh 'bar pêng 'nu bơngai pơhrăm păng Yêsu sŏng sa ti ưh kơ rơgoh yua kơ lu sư ưh kơ ôp ti kiơ̆ thoi tơdrong juăt lu bơngai Pharisi pơkă.

³ Lu bơngai Pharisi păng lu bơngai Juđê kiơ̆ kơ tơdrong juăt lu yă 'bok sư ngăl, dah ưh kơ ôp ti kiơ̆ thoi tơdrong juăt lu sư pơkă, ưh kơ gơh sŏng sa.

⁴ Rim lu sư wih đơ̆ng kơchơ, dah ưh kơ 'nhao, kư̆m ưh kơ gơh kơ sŏng sa. Păng lu sư kư̆m kiơ̆ lơ tơdrong juăt nai mơ̆n. Lu sư ling-lang 'nhao kơchŏk, 'nhao gŏ teh, 'nhao gŏ kong, kiơ̆ kơ tơdrong juăt lu sư pơkă.

⁵ Lu bơngai khŭl Pharisi păng lu 'bok thây noh jet Yêsu: “Yua kơ kiơ lu bơngai pơhrăm păng Ih ưh kơ kiơ̆ tơdrong juăt yă 'bok bơ̆n pơkă sơ̆, lu sư sŏng sa ưh kơ ôp ti?”

⁶ Yêsu khan kơ lu sư: “Ơ bơngai 'bơ̆r đak klak ŭnh, Êsai chih nơ̆r 'Bok Kei-Dei khan lê̆ hơdrol sơ̆ thoi âu na 'blep kơ iĕm dang ei tơpă: ‘Lu bơngai âu ư-ang kơ Inh păng 'bơ̆r đĕch, jơhngơ̆m klơm klak sư ataih đơ̆ng Inh.

⁷ Lu sư kơkuh kơ Inh ưh kơ yua kiơ. Lu sư bơtho tơdrong ala teh, mă-lei khan tơdrong 'Bok Kei-Dei.’ ”

⁸ Yêsu khan dơ̆ng: “Iĕm tŭk tơdrong juăt 'Bok Kei-Dei pơkă na kiơ̆ kơ tơdrong kon bơngai.

⁹ “Iĕm athei pơwao lăng bĕ, hăm 'lơ̆ng iĕm pơm thoi noh?

¹⁰ Môis khan boih thoi âu: ‘Iĕm athei lui yom kơ lu mĕ 'bă păng dah bơngai bu pơma kơnê̆ kơ mĕ 'bă sư, athei pơlôch tŭk bơngai noh.’

¹¹ Mă gah lu iĕm khan: ‘Bơngai bu khan kơ mĕ 'bă sư khan: Mŭk tơmam inh wă 'me sa biĕm ră, mă-lei inh pơyơ̆r kơ 'Bok Kei-Dei đĭ boih,’

¹² na iĕm khan bơngai 'noh huay pă kăl kơ 'me sa mĕ 'bă sư dơ̆ng.

¹³ Iĕm pơjing tơdrong juăt bơtho đe thoi noh, na iĕm jing tŭk tơdrong juăt 'Bok Kei-Dei boih păng iĕm kư̆m pơm lơ tơdrong nai ưh kơ 'lơ̆ng thoi noh mơ̆n.”

Tơdrong yoch lĕch đơ̆ng jơhngơ̆m kon bơngai

¹⁴ Na Yêsu krao đĭ bơngai kiơ̆ ei năm tơ Sư păng khan: “Đĭ kơ iĕm mơ̆ng Inh păng pơwao kơdih.

¹⁵ Dôm lu tơmam sa kon bơngai sa, ưh kơ đei pơm kơ kon bơngai jing yoch ôh. Tơdrong pơm yoch noh lĕch đơ̆ng jơhngơ̆m kon bơngai na kon bơngai jing yoch.

¹⁶ Bu đei đon athei tơchĕng kơdih bĕ.”

¹⁷ Lăp Yêsu tơklah đơ̆ng lu đe ei mơ̆t tơ hnam boih, na lu bơngai pơhrăm păng Sư jet Sư tơdrong mă Sư pơtih gia 'noh hei.

¹⁸ Na Yêsu khan kơ lu sư: “Tơdrong pơtih gia 'noh hei iĕm kư̆m ưh kơ hlôh mơ̆n hă? Tơmam sa đơ̆ng 'ngoaih mơ̆t lăm klak kon bơngai ưh kơ gơh pơm kơ kon bơngai yoch ôh.

¹⁹ Mă tơmam sa kiơ mơ̆t lăm klak kon bơngai ưh kơ sĭ mơ̆t lăm jơhngơ̆m sư pơm kơ sư jing yoch ôh. Tơmam sa mơ̆t lăm klak klaih kơ noh lĕch đĭ.” Thoi noh bơ̆n băt tôm kơ tơmam sa kiơ̆ kơ Yêsu khan tơmam sa rơgoh 'lơ̆ng ngăl ưh kơ đei giĕng kơ sa ôh.

²⁰ Sư khan dơ̆ng: “Mă tơdrong kiơ kiơ lĕch đơ̆ng jơhngơ̆m kon bơngai pơm kơ sư jing yoch.

²¹ Yua kơ đơ̆ng jơhngơ̆m đon kon bơngai tơchĕng kơnê̆ na jing yoch: Sư pơm pơyô kư̆ kă, sư tơtông, sư pơlôch đe,

²² sư kơtrŏ păng akăn đe, sư 'nhĕng đe, sư pơm tôm tơdrong kơnê̆, sư pơma plơ̆ plĕch hơlĕnh pơdăr, sư pơma bâu roi đe, sư pơang akâu kơdih, sư pơm tôm tơdrong glăi răm.

²³ Tôm tơdrong kơnê̆ noh lĕch đơ̆ng jơhngơ̆m đon kon bơngai ngăl. Dôm tơdrong kơnê̆ noh boih pơm kơ kon bơngai jing yoch.”

Yêsu tơgŭm yă tơmoi mă ưh kơ khŭl Juđê

²⁴ Đơ̆ng noh Yêsu năm tơ tơring Pơlei Tirơ. Tơ ei Sư mơ̆t tơ hnam đe, kuă ăn tơring ei băt ră, mă-lei đe kư̆m oei băt kơ Sư.

²⁵ Tơ tơring ei đei minh 'nu bơngai drŏ-kăn đei kon adruh 'lơ̆p yang kơnê̆ mơ̆t. Na sư kơtơ̆ng ang đe khan Yêsu truh tơ tơring sư. Na sư năm 'nap 'bơ̆t anăp Yêsu.

²⁶ Bơngai drŏ-kăn ei bơngai Sirôphênis, tơring Tirơ, pơma nơ̆r Grĕk. Sư apinh Yêsu pơpuh yang kơnê̆ lĕch đơ̆ng kon sư.

²⁷ Na Yêsu khan kơ sư: “Inh athei tơgŭm lu bơngai Juđê 'mơ̆i yua kơ lu sư dang kon Inh. Dah Inh tơgŭm ih bơngai tơmoi hơdrol, lei noh dang Inh klơ̆m tơmam sa kon Inh ăn kơ kŏ sa.”

²⁸ Na bơngai drŏ-kăn ei khan kơ Yêsu: “Ơ 'Bok, trŏ boih, mă-lei inh wă kơ Ih tơgŭm inh 'biơ̆, yua kơ phŏ phŏ inh kư̆m 'bôh kŏ năm alep sa đêl kon hơ'lơ̆p sa asĭ.”

²⁹ Na Yêsu khan kơ sư: “Ơ yă, yua kơ ih pơma trŏ thoi noh, na dang ei brŏk kơ ih bĕ. Yang kơnê̆ lĕch đĭ đơ̆ng akâu kon ih boih.”

³⁰ Na sư wih tơ hnam 'bôh hloi kon sư 'bĭch tơ giơng, yang kơnê̆ lĕch đĭ đơ̆ng akâu sư boih.

Yêsu pơklaih bơngai klĭk păng pơma arăk

³¹ Klaih kơ noh Yêsu năm đơ̆ng tơring Tirơ drong tơ tơring Siđôn păng tơring Đêkapôlis na wih tơ đak dơsĭ Galilê.

³² Tơ ei đe năm ba minh 'nu bơngai klĭk păng pơma arăk. Đe apinh Yêsu chro ti pel sư wă kơ sư klaih.

³³ Yêsu anhăk bơngai klĭk ei đơ̆ng bơngai lơ tơ anih nai. Na Yêsu dan 'bơ̆t đon bơngai klĭk ei hơnglâu ti Sư kơdih păng Sư kơsoh đak hai 'bơ̆t ti Sư kơdih pik tơ hơpiĕt bơngai ei.

³⁴ Klaih kơ noh Yêsu ngoi tơ plĕnh na tơhôih hăm khan kơ bơngai ei păng nơ̆r Juđê: “Eppatha” wă khan: “Đon ih hơbăng boih.”

³⁵ Kơtă ei đon sư hơbăng hloi; păng hơpiĕt sư kư̆m rơmuăn mơ̆n na sư gơh pơma klŏ.

³⁶ Yêsu khan kơ lu sư: “'Nĕ chă roi kơ đe.” Mă-lei lăp Yêsu khă lu sư, lu sư rai ră roi kơ đe.

³⁷ Lu sư kư̆m băt chrêu kơ đon păng khan: “Yêsu gơh pơm tôm tơdrong 'lơ̆ng tơpă iih? Sư pơm kơ bơngai klĭk klot gơh kơtơ̆ng, bơngai kơmlo mah gơh pơma.”