Markôs 6 - Sơ̆p Hlabơar Nơ̆r 'Bok Kei-Dei

¹ Yêsu đơ̆ng noh brŏk tơ pơlei Sư kơdih, lu bơngai pơhrăm păng Sư kiơ̆ Sư mơ̆n.

² Lăm năr pơdơh Sa'bat Sư bơtho đe tơ hnam akŭm 'Bok Kei-Dei. Đei lơ bơngai năm mơ̆ng. Lu sư mơ̆ng hlĭch kơ đon păng khan: “Sư gơh dôm tơdrong âu đơ̆ng yơ kih? Lơliơ Sư băt tôm dôm tơdrong âu păng Sư gơh pơm tơdrong mơsêh?

³ Bơngai âu Sư jang ot 'long đĕch lah. Sư kon Mari, 'nhŏng đe Yakơ, Jôsê, Jut, Simôn. Lu oh Sư drŏ-kăn oei tơ âu mơ̆n. Na lơliơ Sư gơh pơm dôm tơdrong noh?” Lu đe ei klai kơ Sư hơgei na jing kuă lui kơ Sư.

⁴ Yêsu khan kơ lu đe ei: “Lu bơngai pơtruh nơ̆r 'Bok Kei-Dei sơ̆, mưh tơ pơlei đe, đei lơ bơngai lăp đon 'maih mơ̆ng dôm nơ̆r sư bơtho dêh. Mă-lei lu bơngai oei pôm pơlei hăm lu sư, kơtum lu sư, hnam dơnŏ lu sư, ưh kơ 'maih wă mơ̆ng tơdrong sư bơtho ôh. Na truh tơ Inh dang ei kư̆m lei-lăi.”

⁵ Kơlih kơ thoi noh na Yêsu ưh kơ wă pơm tơdrong mơsêh tơ pơlei Sư. Sư pôm chro ti chă pơklaih 'bar pêng 'nu bơngai jĭ đĕch.

⁶ Yêsu lăng hlĭch yua kơ đe ưh kơ wă lui kơ Sư. Na Sư năm chă bơtho tơ lu pơlei jơjê̆ kiơ̆ pơlei Sư ei.

Yêsu wơh mơjĭt-'bar 'nu bơngai pơhrăm păng Sư năm bơtho đe

⁷ Yêsu krao mơjĭt-'bar 'nu bơngai pơhrăm păng Sư năm tơ Sư; Sư athei năm chă bơtho đe 'bơ'bar 'nu. Sư ăn kơ lu sư gơh pơpuh tơlĕch yang kơnê̆ đơ̆ng akâu bơngai.

^8-9 Na Sư athei lu sư năm 'nĕ kơ anhăk tơmam sa, 'nĕ kơ anhăk kơdŭng tah tơmam, 'nĕ kơ chĕp ba jên. Sư ăn chĕp tŏ 'long jra đĕch păng trô̆ chơkhŏ, hrŭk ao minh blah đĕch.

¹⁰ Sư khan kơ lu đe ei thoi âu: “Dah iĕm mơ̆t oei tơ hnam ayơ, iĕm oei hloi tơ hnam 'noh đĕch truh tơ năr iĕm wă năm tơ pơlei nai.

¹¹ Dah anih tơ yơ yơ ưh kơ sơng iŏk iĕm păng ưh kơ mơ̆ng nơ̆r iĕm bơtho, thoi noh na lăp iĕm brŏk đơ̆ng pơlei noh iĕm sơpuih 'bruih tơ jơ̆ng iĕm tơbăt kơ lu sư 'Bok Kei-Dei wă phak lu sư ning-mônh.”

¹² Thoi noh boih na lu sư năm bơtho athei đe tơbral kơdih tơdrong yoch.

¹³ Păng lu sư pơpuh lơ yang kơnê̆ lĕch đơ̆ng akâu đe hăm pik kơ lu bơngai jĭ jăn đak pơgang. Na 'Bok Kei-Dei ăn kơ lu bơngai jĭ jăn noh klaih.

Pơtao Hêrôt pơlôch Yôhan bơngai mă pơm 'batem kơ đe

¹⁴ Pơtao Hêrôt kơtơ̆ng ang tơdrong Yêsu, yua kơ đe ư-ang anăn Yêsu. Na lu mơ'nah khan Yôhan bơngai mă pơm 'batem kơ đe, sư lôch boih na dang ei sư iung arih dơ̆ng. Thoi noh na sư gơh pơm tôm tơdrong mơsêh âu.

¹⁵ Lu mơ'nah dơ̆ng khan Yêsu Êli mă pơtruh nơ̆r 'Bok Kei-Dei sơ̆. Lu mơ'nah khan Sư minh 'nu bơngai pơtruh nơ̆r 'Bok Kei-Dei nai sơ̆.

¹⁶ Mă-lei lăp Hêrôt kơtơ̆ng tơdrong 'noh sư khan: “'Noh Yôhan tơpă, bơngai mă pơm 'batem kơ đe, 'bơ̆t mă inh pơlôch chơ̆ng ako sư sơ̆. Na dang ei sư iung arih đơ̆ng lôch.”

¹⁷ Sơ̆ pơtao Hêrôt wơh đe năm rôp Yôhan tah lăm hnam phak tơpă, yua kơ minh 'nu duch anăn sư Hêrôđia wă kơ thoi noh. Duch Hêrôđia ei akăn oh Hêrôt, anăn sư Philip. Mă-lei 'nhŏng sư Hêrôt tơgar iŏk akăn oh sư.

¹⁸ Na Yôhan khan kơ Hêrôt: “Ih tơgar iŏk akăn oh ih ưh kơ trŏ ôh.”

¹⁹ Kơlih kơ Yôhan khan thoi noh na duch Hêrôđia hil kơ Yôhan, athei đe pơlôch sư, mă-lei ưh kơ gơh,

²⁰ kơlih kơ pơtao Hêrôt hli kơ Yôhan. Hêrôt băt kơ Yôhan bơngai tơpăt păng bơngai đon 'lơ̆ng ling-lang. Thoi noh na sư ưh kơ ăn pơlôch, kơplah sư mơ̆ng Yôhan bơtho jơhngơ̆m sư wơ̆l wang ră mă-lei sư 'maih mơ̆ng mơ̆n.

²¹ Lăm minh năr ei lăp kơ jơhngơ̆m duch Hêrôđia wă pơlôch Yôhan, năr ei sa et trŏ kơ năr Hêrôt tơpŭ. Na pơtao Hêrôt krao wơ̆n lu 'bok kuan tih, lu 'bok tih linh păng lu kră mơdrŏng.

²² Na kon adruh duch Hêrôđia mơ̆t suang lăm hnam ei, pơtao Hêrôt păng lu 'bok mă năm hơpong kơ sư ei lăp đon tơpă. Na pơtao Hêrôt mah khan kơ adruh ei: “Apinh bĕ, ih wă kơ kiơ, inh kư̆m ăn.”

²³ 'Bok pơtao khan kơ sư tơpă: “Tơmam kiơ ih wă apinh, roi bĕ, inh gô ăn kơ ih tơpă. Dah inh hơlĕnh mă 'Bok Kei-Dei phak inh, mă ih apinh iŏk minh puăt teh đak inh, kư̆m bưh mơ̆n.”

²⁴ Na adruh ei lĕch năm jet mĕ sư: “Ơ mĕ, ih wă kơ inh apinh kiơ đơ̆ng 'bok pơtao?” Na mĕ sư khan: “E apinh chơ̆ng iŏk kơ̆l Yôhan bơngai mă pơm 'batem kơ đe.”

²⁵ Na adruh ei mơ̆t dơ̆ng tơ anih 'bok pơtao păng apinh sư khan: “Inh wă kơ ih chơ̆ng ăn kơ inh kơ̆l Yôhan 'măn 'bơ̆t pơnhan chhĕr dang ei hloi; bơngai mă pơm 'batem kơ đe, 'noh boih inh wă.”

²⁶ Lăp pơtao Hêrôt kơtơ̆ng thoi noh sư sơ'ngon dêh. Mă-lei đêl nơ̆r sư pơkă hơdrol mah hiap akâu sư kơdih 'bơ̆t anăp lu bơngai et sa, sư ưh pă gơh lê̆ yua kơ sư pơkă kơ adruh ei boih.

²⁷ 'Bok pơtao wơh hloi minh 'nu linh năm chơ̆ng ako Yôhan. Na linh ei năm chơ̆ng hloi ako Yôhan lăm hnam phak,

²⁸ chĕp ba kơ̆l Yôhan ei kơpal pơnhan chhĕr na ăn kơ adruh ei. Adruh ei iŏk năm ăn kơ mĕ sư.

²⁹ Lăp lu bơngai pơhrăm păng Yôhan kơtơ̆ng thoi noh, lu sư năm iŏk akâu sư tung 'bŭ tơ bơsat.

Yêsu 'me pơđăm-rơbâu 'nu bơngai

³⁰ Lu bơngai mă Yêsu wơh năm chă bơtho đe ki, lu sư brŏk akŭm tơ Sư boih, na roi kơ Sư dôm tơdrong lu sư pơm păng bơtho.

³¹ Klaih kơ noh Yêsu khan kơ lu sư: “Dang ei đĭ kơ bơ̆n năm kiơ̆ Inh tơ anih kueng kơdrô̆ wă kơ bơ̆n pơdơh 'biơ̆.” Sư khan thoi noh yua kơ lơ bơngai wih wơ̆t tơ lu sư 'nhŏ mă gơh sŏng sa.

³² Đang kơ pơma thoi noh lu sư tŏk thŏng-nan năm tơ anih kueng kơdrô̆.

³³ Mă-lei kư̆m đei lơ bơngai 'bôh Sư mơ̆n. Đe kơnăl kơ Sư boih na jơ̆p kơ tơring kiơ̆ ei năm kơdâu hơdrol gô tơ anih kueng 'noh.

³⁴ Lăp Yêsu jur đơ̆ng thŏng-nan, Sư 'bôh lơ bơngai tơpă gô Sư tơ anih 'noh. Na Sư mơnat dêh kơ lu bơngai tơpôl 'noh yua kơ lu bơngai tơpôl 'noh thoi lĕ triu ưh kơ đei bơngai wei-lăng. Na Sư bơtho lu đe ei lơ tơdrong.

³⁵ Lăp hiưp kơsơ̆ boih lu bơngai pơhrăm păng Sư khan kơ Sư thoi âu: “Anih âu kueng chơngue dêh păng kơsơ̆ boih tăm.

³⁶ Ih kuă kơ kiơ athei lu đe âu năm chă răt kơdih tơmam sa kiơ̆ pơlei jơjê̆ âu?”

³⁷ Mă-lei Yêsu khan kơ lu bơngai pơhrăm păng Sư: “Iĕm 'me lu sư wăi.” Na lu sư khan kơ Sư thoi âu: “Liơ nhôn kĕ răt truh 'bar-hrĕng hlak jên hu wă kơ gơh asong kơ lu sư tơmam sa?”

³⁸ Na Yêsu khan kơ lu sư: “Iĕm đei hơdôm tŏ 'bĕng mi? Iĕm năm lăng.” Lu sư lăng 'bôh boih, na lu sư khan: “Lăp pơđăm tŏ 'bĕng mi păng 'bar hlak ka.”

³⁹ Sư athei đĭ-đăng lu đe ei tơoei lơ jơ'bôt kơpal 'nhĕt adrih.

⁴⁰ Lu đe ei tơoei minh jơ'bôt minh-hrĕng, minh jơ'bôt phŏ pơđăm-jĭt.

⁴¹ Sư iŏk pơđăm tŏ 'bĕng mi păng 'bar hlak ka ei, ngoi tơ plĕnh krao khan bơnê kơ 'Bă Sư 'Bok Kei-Dei, na phĕ hloi 'bĕng mi ei ăn kơ lu bơngai pơhrăm păng Sư chă asong kơ lu bôl buăl. Sư kư̆m phĕ asong 'bar hlak ka ei wă kơ bôl buăl sa.

⁴² Đĭ-đăng lu sư sa phĭ mah rơkah rơkai boih.

⁴³ Na lu sư dônh tah 'bĕnh mơjĭt-'bar tŏ bai 'bĕng mi păng ka mă đơ̆ng đêl lu sư sa rơkah.

⁴⁴ Lu bơngai mă sŏng sa ei pơđăm-rơbâu 'nu jô̆ gah bơngai drŏ-nglo đĕch.

Yêsu yak kơpal đak

⁴⁵ Klaih kơ noh Yêsu athei lu bơngai pơhrăm păng Sư hao thŏng-nan rai tŏk gô pah to đak dơsĭ tơ Pơlei 'Betsaiđa păng Sư athei hloi lu bơngai tơpôl brŏk tơ anih hnam lu sư kơdih kơdih.

⁴⁶ Đơ̆ng noh na Yêsu tơklah đơ̆ng lu đe ei tŏk tơ kông kơdrô̆ Sư wă krao khan kơ 'Bă Sư.

⁴⁷ Lăp 'năr mơ̆t măng mơt boih thŏng-nan lu sư oei tŏk-bŏk đak dơsĭ. Gah Yêsu Sư oei minh 'nu Sư tơ kông.

⁴⁸ Sư 'bôh lu bơngai pơhrăm păng Sư wơ̆r thŏng-nan anat anot dêh yua kơ kial tơhlu sơdrơ̆k. Na lăp tŏk-bŏk leng gong Yêsu jur đơ̆ng kông yak kơpal đak dơsĭ năm tơ lu sư. Sư wă năm brih ploi kơ lu sư.

⁴⁹ Lăp lu sư 'bôh Sư yak kơpal đak dơsĭ, lu sư ngêh kơ atâu, lu sư hli dêh na ôr tơkĕch.

⁵⁰ Đĭ dôm lu sư 'bôh tôm, na lu sư hli tơrơ tơpă. Mă-lei Yêsu khan hloi kơ lu sư: “Iĕm 'nĕ pă hli âu, Inh lah.”

⁵¹ Klaih kơ noh Yêsu tŏk thŏng-nan hơdai păng lu sư, na kial thĕng hloi jua ưh pă đei tơhlu dơ̆ng. Lu sư sơleng kơ đon.

⁵² Lu sư ưh kơ pơwao Yêsu gơh pơm tôm tơdrong thoi lĕ kơ 'bĕng mi Sư pơm mă hơdrol hei. Lu sư ưh kơ pơwao kơlih kơ lu sư kơhlôh.

Yêsu pơklaih lu jĭ jăn tơring Gênêsaret

⁵³ Lăp lu sư tŏk hlôi kơ đak dơsĭ ei boih lu sư truh tơ tơring Gênêsaret, na 'măn lê̆ thŏng-nan lu sư tơ jih đak dơsĭ.

⁵⁴ Lăp lu sư jur đơ̆ng thŏng-nan, đe kơnăl hloi kơ Yêsu.

⁵⁵ Na lu đe ei kơdâu jơ̆p tơring ei chă roi kơ đe păng tung lu bơngai jĭ jăn păng anhŭn năm ba tơ Yêsu. Lu sư kơtơ̆ng Yêsu tơ yơ, lu sư kư̆m tung anhăk tơ ei mơ̆n.

⁵⁶ Yêsu năm tơ yơ yơ, mă pơlei tih iĕ, na đe tơ'bĭch lê̆ lu bơngai jĭ jăn tơ kơchơ. Na đe apinh Sư asong pel tơdrơi ao Sư đĕch. Bu pel 'bơm tơdrơi ao Sư, klaih hloi kơ jĭ.