Markôs 12 - Sơ̆p Hlabơar Nơ̆r 'Bok Kei-Dei

¹ 'Blă kơ noh Yêsu bơtho pơtih gia kơ lu sư thoi âu: “Đei minh 'nu bơngai pơm mir wă pơtăm 'long hơmu. Sư war dur tăp dăr boih, lăm mir noh sư pơm minh pôm tơpăl tơmo wă peh plei hơmu chơpĕt iŏk đak sư. Păng sư pơm minh pôm hnam tông wă gak plei hơmu. Sư pơm tôm tơdrong noh boih na sư ăn kơ đe jang mơng, tơ'ngla sư năm oei tơ dêh nai.

² Lăp trŏ kơ bơyan plei hơmu đum boih, na sư wơh minh 'nu đĭch sư năm tơ lu bơngai jang mơng mir hơmu noh wă chĕng iŏk minh pah mir hơmu.

³ Mă-lei lu bơngai jang mơng mir hơmu noh rôp tôn teh tơbrŏk sư hoh hoh đĕch.

⁴ Na 'bok tơ'ngla mir noh wơh dơ̆ng minh 'nu đĭch sư, mă-lei lu bơngai jang mơng mir hơmu noh pơma kơnê̆ kơ sư, tôn teh kơ̆l sư.

⁵ 'Bok tơ'ngla mir hơmu noh wơh dơ̆ng minh 'nu. Lu bơngai jang mơng ei pơlôch hloi. 'Bok tơ'ngla mir noh sư kư̆m wơh lơ dơ̆ng ră, mă-lei mơ'nah lu sư teh pơjĭ, mơ'nah lu sư pơlôch.

⁶ 'Bok tơ'ngla mir hơmu noh sư oei đei pă minh 'nu bơngai, kon pôm sư 'mêm kơdih ră. Tơpo hơtuch sư wơh kon sư năm tơ lu đe ei. Sư chă pơma khan: ‘Lu đe noh gô chu yom kơ kon inh thâu.’

⁷ Mă-lei lu bơngai jang mơng mir hơmu noh pơđâu dih băl khan: ‘Bơngai 'noh boih kon 'bok tơ'ngla mir âu, na dang ei bĕ bơ̆n pơlôch sư na mă mir âu jing mir bơ̆n.’

⁸ Lu sư rôp hloi kon 'bok tơ'ngla mir ei, pơlôch hŭt akâu sư tơ jih mir.

⁹ “Thoi noh boih na 'bok tơ'ngla mir gô pơm kiơ kơ lu bơngai noh? Sư gô năm pơlôch pơđĭ lu bơngai noh, na sư pơjao ăn kơ lu bơngai nai jang dơ̆ng.

¹⁰ Mă tơdrong 'noh kư̆m thoi iĕm đŏk boih đe chih lăm sơ̆p hla bơar tơdrong 'Bok Kei-Dei thoi âu: ‘Tơmo lu bơngai man hnam tŭk boih, tơmo noh 'Bok Kei-Dei lăng gĭt tơpă man pơklop sư 'bơ̆t mum hnam.

¹¹ Sư pơm thoi noh trŏ tơpă mă măt bơ̆n lăng kư̆m 'lơ̆ng mơ̆n.’ ”

¹² Na lu 'bok soi tih, lu thây bơtho tơdrong juăt đe Juđê, hăm lu đe kră sek tơlang chă tơdrong wă rôp hloi Yêsu yua kơ lu sư băt dôm tơdrong Yêsu pơma pơjuang noh hei trŏ hloi kơ lu sư tơpă. Mă-lei lu sư hli kơ lu kon pơlei pơla 'bơ̆t ei, na lu sư weh đơ̆ng Yêsu 'noh năm tơ nai.

Tơdrong ăn jên thuê̆

¹³ Lu sư athei 'bar pêng 'nu bơngai khŭl Pharisi păng 'bar pêng 'nu bơngai khŭl pơtao Hêrôt năm tơ Yêsu wă chă tơdrong gơh rôp Sư dah Sư pơma khă gah tơdrong ăn jên thuê̆.

¹⁴ Lu sư roi kơ Yêsu: “Ơ 'Bok Thây, nhôn băt kơ Ih bơngai tơpăt, Ih ưh kơ hli kơ bu ôh. Ih lăng lu bơngai pơm tih, lu bơngai iĕ lei-lăi ngăl păng bơtho tơdrong 'Bok Kei-Dei tơpăt ling-lang. Na nhôn apinh Ih khan kơ nhôn, kiơ̆ kơ tơdrong juăt bơ̆n bơngai Juđê, bơ̆n hăm gơh ăn jên thuê̆ kơ Sêsar pơtao đe Rôm dah ưh?”

¹⁵ Bơ̆n wă chu ăn dah ưh? Lu sư pơma thoi noh, Yêsu băt kơ lu sư wă plơ̆ plĕch kơ Sư na Sư khan kơ lu sư: “Yua kơ kiơ iĕm wă jet pơlong lăng Inh? Iĕm ăn kơ Inh minh hlak jên iĕm tơ âu wă kơ Inh lăng.”

¹⁶ Lu sư ăn kơ Sư lăng minh hlak jên na Yêsu khan kơ lu sư: “Rup bu âu? Anăn bu âu?” Lu sư khan: “'Noh rup Sêsar păng anăn Sêsar mơ̆n.”

¹⁷ Thoi noh na Yêsu khan: “Jên âu rup Sêsar tơpă, na bơ̆n athei thuê̆ kơ sư yua kơ sư pơgơ̆r. Tơmam 'Bok Kei-Dei bơ̆n athei pơyơ̆r kơ 'Bok Kei-Dei yua kơ Sư tơgŭm ăn kơ bơ̆n.” Lu sư mơ̆ng Yêsu tơl lu sư trŏ tơpă.

Tơdrong kon bơngai iung arih

¹⁸ Lu bơngai Juđê mơ'nah lui kơ 'Bok Kei-Dei kiơ̆ kơ tơdrong Sađusê. Lu sư khan kon bơngai lôch ưh kơ iung arih dơ̆ng ôh. Lu sư mơ'nah năm pơjah pơjăng păng Yêsu na lu sư jet Yêsu thoi âu:

¹⁹ “Ơ 'Bok Thây, tơdrong juăt Môis chih ată kơ bơ̆n sơ̆ thoi âu: ‘'Nhŏng bu lôch, mi sư adro ưh kơ đei kon, oh sư athei iŏk mi sư pơm akăn na pơjing kon kơ 'nhŏng sư.’

²⁰ Na sơ̆ đei minh pôm hnam dơnŏ đei tơpơh 'nu 'nhŏng oh. 'Nhŏng kơdră lu sư iŏk akăn. Lăp 'nhŏng lu sư lôch ưh tam mă đei kon,

²¹ na oh sư mă 'bar iŏk mi sư pơm akăn dơ̆ng, ưh tam mă đei kon kư̆m lôch. Oh sư mă pêng iŏk mi sư pơm akăn dơ̆ng ưh kơ đei kon kư̆m lôch.

²² Tơpơh 'nu 'nhŏng oh sư noh iŏk minh 'nu akăn. Tơpo hơtuch akăn lu sư noh kư̆m lôch kiơ̆ lu sư mơ̆n.

²³ Ih khan kon bơngai gô iung arih, na mưh lu sư iung arih đơ̆ng lôch ning-mônh, akăn lu sư noh jing akăn bu kơ lu sư mă tơpă, yua kơ tơpơh 'nu drŏ-nglo iŏk minh 'nu drŏ-kăn?”

²⁴ Yêsu khan kơ lu sư: “Iĕm ưh kơ hlôh tơdrong noh yua kơ iĕm ưh kơ pơwao sơ̆p hla bơar 'Bok Kei-Dei, na iĕm ưh kơ băt Sư gơh pơm tôm tơdrong.

²⁵ Ning-mônh đĭ-đăng kon bơngai iung arih đơ̆ng lôch, đe ưh pă đei tơiŏk băl klo kăn dơ̆ng ôh, lu sư thoi lu linh jang 'lơ̆ng 'Bok Kei-Dei tơ plĕnh ti.

²⁶ Tơdrong kon bơngai iung arih đơ̆ng lôch, iĕm kư̆m đŏk lăng boih lăm sơ̆p hla bơar tơdrong juăt Môis chih, sư roi tơdrong 'Bok Kei-Dei pơma kơ sư tơ tơm 'long ŭnh sa. 'Bok Kei-Dei khan kơ sư: ‘Inh boih Kră Yang Abraham, Kră Yang wei-lăng Isăk, Kră Yang wei-lăng Jakôp.’ ”

²⁷ Yêsu khan dơ̆ng: “Lu bơngai âu lôch đĭ boih kơplah noh sơ̆, mă-lei lu sư gô iung arih đĭ tôm lu sư yua kơ 'Bok Kei-Dei Kră Yang wei-lăng gah tơdrong arih, ưh kơ sĭ Sư wei-lăng gah tơdrong lôch ôh. Lu iĕm ưh kơ hlôh ôh.”

Tơdrong juăt ayơ kăl hloh?

²⁸ Klaih kơ noh đei minh 'nu 'bok thây bơtho tơdrong juăt đe Juđê năm tơ lu sư. 'Bok thây ei kơtơ̆ng lu sư pơjah pơjăng dih băl, sư băt Yêsu tơl trŏ, na sư jet Yêsu: “Dôm tơdrong juăt 'Bok Kei-Dei pơkă, tơdrong juăt ayơ kăl hloh?”

²⁹ Yêsu khan kơ sư thoi âu: “Đĭ-đăng tơdrong juăt, tơdrong juăt âu kăl hloh: ‘Ơ bơngai Isơrael, pôm Kră Yang bơ̆n 'Bok Kei-Dei đĕch Kră Yang tih hloh.

³⁰ Bơ̆n athei 'mêm kơ 'Bok Kei-Dei Kră Yang bơ̆n hăm đĭ jơhngơ̆m klơm klak bơ̆n păng đĭ dôm tơdrong đon bơ̆n tơchĕng.’

³¹ Na tơdrong juăt mă 'bar thoi âu: ‘Bơ̆n athei 'mêm kơ bôl buăl thoi bơ̆n 'mêm akâu kơdih.’ Ưh kơ đei tơdrong juăt ayơ mă kăl hloh kơ 'bar tơdrong juăt âu.”

³² 'Bok thây ei khan kơ Yêsu: “Ơ 'Bok Thây, Ih roi kơ nhôn tơdrong juăt âu trŏ boih. Ih roi trŏ tơpă Ih khan 'Bok Kei-Dei đĕch Kră Yang tih hloh ưh kơ đei yang nai tih hloh kơ Sư.

³³ Dah bơ̆n 'mêm kơ Sư hăm đĭ jơhngơ̆m klơm klak bơ̆n, hăm đĭ đon bơ̆n tơchĕng păng băt 'mêm kơ bôl buăl thoi bơ̆n 'mêm akâu kơdih, dah bơ̆n răk 'bar tơdrong juăt 'noh lei 'lơ̆ng hloh kơ đĭ-đăng tơdrong bơ̆n soi sơmah kơ 'Bok Kei-Dei.”

³⁴ Yêsu 'bôh 'bok thây noh tơl hơgei na Yêsu khan kơ sư: “Ih wă jê̆ pơyơ̆r akâu ih kơ 'Bok Kei-Dei boih.” Klaih kơ noh ưh kơ đei bu pơ̆n jet Yêsu dơ̆ng.

Yêsu jet tơdrong 'Bok Krist

³⁵ Kơplah Yêsu oei bơtho lăm hnam akŭm 'Bok Kei-Dei tơm Sư khan: “Liơ lu 'bok thây bơtho tơdrong juăt đe Juđê khan 'Bok Krist mă 'Bok Kei-Dei wơh pơm Pơtao, Sư kon sâu pơtao Đawit đĕch?

³⁶ Yang Bơhngol 'Lơ̆ng athei Đawit khan thoi âu: ‘Kră Yang 'Bok Kei-Dei khan kơ Yŏng Kơdră inh thoi âu: Ih kư̆ kơ oei gah 'ma kơ Inh pơgơ̆r tơ̆p Inh blah rôp lu bơngai mă ayăt kơ Ih thuơ tơ kơnơl jơ̆ng Ih.’

³⁷ Đawit krao kơ 'Bok Krist Yŏng Kơdră sư, na lơliơ dang ei khan 'Bok Krist jing kon sâu Đawit lĕ?” Lu bơngai tơpôl mơ̆ng kiơ̆ ei lăp đon tơpă tôm tơdrong Sư bơtho.

Kơchăng kơ lu 'bok thây bơtho tơdrong juăt đe Juđê

³⁸ Kơplah Yêsu oei bơtho lăm hnam akŭm 'Bok Kei-Dei tơm, Sư khan: “Iĕm athei kơchăng kơ lu 'bok thây bơtho tơdrong juăt đe Juđê. Lu sư lăp đon kơ hrŭk ao tai wă kơ pơrŏ na chă ngôi. Păng lu sư lăp đon wă kơ đe kơkuh kơ sư tơ kơchơ.

³⁹ Lu sư lăp đon kơ oei tang-dŏ 'lơ̆ng hloh kơ bôl buăl lăm hnam akŭm 'Bok Kei-Dei păng lăm năr et sa tih.

⁴⁰ Lu sư chă pơjĭp iŏk mŭk tơmam lu drŏ-kăn adro, na lu sư kư̆m pơm pơrŏ krao khan kơ 'Bok Kei-Dei đunh wă kơ đe jô̆ kơ sư khan bơngai 'lơ̆ng. Mă-lei 'Bok Kei-Dei gô phak lu sư hloh kơ đe ning-mônh.”

Yă adro pơyơ̆r jên

⁴¹ Yêsu oei jê̆ kơthŭng tah jên pơyơ̆r lăm hnam akŭm 'Bok Kei-Dei tơm. Sư lăng đe tah jên lăm noh. Đei lơ bơngai mơdrŏng tah jên lơ.

⁴² Đei minh 'nu yă adro dơnuh năm tơ noh tah lăp 'bar hlak jên ngang.

⁴³ Na Yêsu krao lu bơngai pơhrăm păng Sư păng khan: “Inh khan kơ iĕm tơpă, yă adro dơnuh âu tah lơ hloh kơ đĭ-đăng lu bôl nai,

⁴⁴ kơlih kơ lu bôl nai pơyơ̆r tơmam rơkah sư đĕch; yă adro âu dơnuh tơpă mă-lei sư pơyơ̆r đĭ hloi jên sa sư.”