Markôs 11 - Sơ̆p Hlabơar Nơ̆r 'Bok Kei-Dei1 Lu sư wă jê̆ truh tơ Pơlei Jêrusalem boih, truh 'bơ̆t Pơlei Betphagê păng Pơlei Bethani kơpal kông Ôliwơ. 'Bơ̆t ei Yêsu wơh 'bar 'nu bơngai pơhrăm păng Sư khan: 2 “Biĕm mơ̆t tơ pơlei tơpăt anăp biĕm to. Lăp biĕm truh tơ noh biĕm 'bôh minh pôm aseh iĕ đe chô̆ 'bơ̆t noh. Aseh iĕ noh ưh tam đei bu hao ôh đơ̆ng sơ̆. Biĕm yaih dui anhăk aseh iĕ noh tơ âu. 3 Dah đe khan: ‘Biĕm iŏk pơm kiơ?’ Biĕm khan kơ sư thoi âu: ‘Kră Yang wă yua 'biơ̆, kơnh Sư tơwih tơ âu dơ̆ng.’ ” 4 Bre sư năm tơ ei, lăp truh na 'bôh tơpă aseh iĕ dăm noh, oei chô̆ 'bơ̆t 'măng hnam. Aseh iĕ noh dơ̆ng 'bơ̆t trong na bre sư yaih iŏk. 5 Đei 'bar pêng 'nu bơngai oei kiơ̆ ei na khan kơ bre sư: “Biĕm iŏk pơm kiơ kơ aseh iĕ noh?” 6 Bre sư khan kơ lu đe ei thoi Yêsu pơkă kơ bre sư hei. Na lu tơmoi ei ăn kơ bre sư iŏk. 7 Bre sư dui anhăk aseh iĕ noh tơ Yêsu. Lu bơngai pơhrăm păng Sư lơ̆k ao lu sư kơdih kơpal rŏng aseh iĕ ei, na Yêsu hao. 8 Đei lơ bơngai nai lơ̆k ao lu sư kơdih kiơ̆ trong wă kơ 'lơ̆ng rŏ. Đei lu mơ'nah koh hơmŭl 'long đơ̆ng jih mir lơ̆k săp kơpal trong mơ̆n. 9 Lu bơngai mă yak hơdrol kơ Yêsu păng lu bơngai yak đơ̆ng rŏng kơ Sư chhôk na pơma re 'bơ̆r khan: “Hôsana, bơnê kơ 'Bok Kei-Dei. Bơnê kơ Yêsu truh tơ âu yua kơ Kră Yang wơh. 10 Bơnê kơ Yêsu truh tơ âu Sư wă pơgơ̆r thoi 'bok bơ̆n Đawit sơ̆, păng bơnê kơ 'Bok Kei-Dei kơpal plĕnh ti.” 11 Yêsu mơ̆t lăm Pơlei Jêrusalem boih, na Sư mơ̆t tơ lăm hnam akŭm 'Bok Kei-Dei tơm. Sư chă lăng lăm hnam akŭm ei jơ̆p boih, na Sư păng lu bơngai pơhrăm păng Sư wih tơ Pơlei Bethani kơlih kơ 'năr kơsơ̆ boih. Yêsu sơkat kơ 'long hơra lôch 12 Lăp pơgê dơning dơ̆ng lu sư yak đơ̆ng Pơlei Bethani năm tơ Pơlei Jêrusalem na Yêsu pơngot. 13 Sư tơmang 'bôh minh tơnơm 'long hơra đơ̆ng ataih đei hla. Na Sư năm lăng 'long hơra noh ngêh kơ đei plei tă kơ ưh, 'bôh pôm hla hoh kơlih kơ tam mă trŏ bơyan hơra plei. 14 Na Yêsu sơkat kơ tơnơm 'long hơra 'noh khan: “Đơ̆ng âu tơ anăp e 'nĕ pă plei dơ̆ng. Lu bơngai pơhrăm păng Sư kơtơ̆ng mơ̆n sư sơkat kơ 'long hơra.” Yêsu pơpuh đe mơdro lăm hnam akŭm 'Bok Kei-Dei tơm 15 Lu sư truh tơ Pơlei Jêrusalem. Na Yêsu mơ̆t dơ̆ng tơ hnam akŭm 'Bok Kei-Dei tơm. Sư pơpuh đe mơdro lăm hnam 'noh. Sư tơlơ̆ tơpơ̆k lu gơ'bang lu đe tơplih băl jên. Lu tang-dŏ lu đe mă tĕch sem kơtơp Sư tơlơ̆ tơpơ̆k đĭ-đăng. 16 Păng Sư kư̆m khă đe ưh kơ ăn chĕp mă tơmam kiơ kiơ brih nhah rok trong cham hnam akŭm ei. 17 Na Sư bơtho khan kơ lu bơngai ei thoi âu: “Đe chih roi nơ̆r 'Bok Kei-Dei lăm sơ̆p hla bơar Sư thoi âu: ‘Hnam akŭm kơkuh kơ Inh wă lê̆ kơ đĭ-đăng bơngai jơ̆p kơ teh đak akŭm krao khan lăm noh.’ Mă-lei iĕm mơdro lăm noh, pơgŏ athei đe răt kăp jên, iĕm pơm kơ hnam akŭm âu thoi lĕ kơ anih hnam đe tơtông klĕ.” 18 Lu 'bok soi tih păng lu 'bok thây bơtho tơdrong juăt đe Juđê kơtơ̆ng tơdrong 'noh, na lu sư chă tơdrong wă rôp pơlôch Sư. Lu sư hli kơ Yêsu kơlih kơ đĭ-đăng bơngai 'maih mơ̆ng tơdrong Sư bơtho, yua kơ lu sư mơ̆ng hlĭch tơpă. 19 'Năr kơsơ̆ boih na lu đe Yêsu lĕch đơ̆ng Pơlei Jêrusalem. 'Long hơra păng tơdrong lui bơ̆n 20 Lăp pơgê năr đơ̆ng rŏng dơ̆ng lu sư yak rok trong lu sư krô đêl năm tơ Pơlei Jêrusalem, lu sư 'bôh tơm 'long hơra đĭ kro boih. 21 Na Pêtrôs 'blŏk kơ tơdrong 'noh na sư khan kơ Yêsu: “Ơ 'Bok Thây, Ih lăng tơm 'long hơra đêl Ih sơkat brei kro lôch boih.” 22 Yêsu khan kơ lu sư: “Kơlih kơ thoi noh na bơ̆n athei lui kơ 'Bok Kei-Dei mă kơjăp. 23 Inh roi kơ iĕm tơpăt, dah bơ̆n wă sơkat kơ kông âu gơh mơ̆n. Bơ̆n khan thoi âu: ‘Weh bĕ e, hiŏng kơtah kơdih tơ đak dơsĭ to.’ Dah bơ̆n lui kơ kông âu gô hiŏng kơtah kơdih tơpă 'nĕ kơ ngĭl ngŭl, lei bơ̆n gô 'bôh tơpă. 24 Kơlih kơ thoi noh na Inh khan kơ iĕm, mă tơdrong kiơ kiơ iĕm krao khan apinh 'Bok Kei-Dei dah iĕm lui tơpă kơ Sư gô ăn tơdrong iĕm apinh 'noh, lei iĕm gô đei tơpă. 25 Kơplah iĕm krao khan, iĕm 'nĕ kơ jô̆ yo mă iĕm đei tơdrong ơh păng bu bu ră, na mă 'Bă tơm bơ̆n kơpal plĕnh ti huay kơ jô̆ yo tôm tơdrong yoch iĕm. 26 Dah iĕm oei jô̆ yo kơ đe pơm yoch kơ iĕm, lei 'Bă tơm bơ̆n kơpal plĕnh ti kư̆m jô̆ yo kơ tơdrong yoch iĕm mơ̆n.” Bu ăn kơ Yêsu pơpuh đe mơdro đơ̆ng hnam akŭm? 27 Lăp lu sư truh tơ Pơlei Jêrusalem, Yêsu chă nơnăm lăm hnam akŭm tơm, na lu 'bok soi tih, lu thây bơtho tơdrong juăt đe Juđê, hăm lu kră sek tơlang năm tơ Sư. 28 Lu sư jet Yêsu: “Bu ăn kơ Ih pơpuh đe mơdro đơ̆ng hnam akŭm âu păng chă bơtho đe lăm hnam akŭm âu mơ̆n?” 29 Yêsu khan kơ lu sư: “Lei Inh kư̆m wă jet iĕm minh tơdrong mơ̆n. Dah iĕm tơl Inh, lei Inh kư̆m tơl tơwih kơ iĕm băt bu ăn kơ Inh pơpuh đe păng bơtho đe tơ lăm hnam akŭm. 30 Bĭ tơdrong Yôhan pơm kơ đe 'batem noh sơ̆ đơ̆ng bu ăn, đơ̆ng 'Bok Kei-Dei dah đơ̆ng kon bơngai? Iĕm tơl lăng Inh wăi.” 31 Lu sư pơđâu băl khan: “Bơ̆n wă khan kơ Sư thoi yơ? Dah bơ̆n khan đơ̆ng 'Bok Kei-Dei lei Sư khan: ‘Iĕm kuă kơ kiơ lui kơ Yôhan bơtho?’ 32 Na dang ei bơ̆n hăm wă khan đơ̆ng kon bơngai?” Mă-lei lu sư kư̆m ưh kơ wă khan đơ̆ng kon bơngai mơ̆n yua kơ lu sư hli kơ kon pơlei pơla, yua kơ đĭ-đăng lu kon pơlei pơla lu sư khan băt kơ Yôhan bơngai pơtruh nơ̆r 'Bok Kei-Dei. 33 Thoi noh na lu sư khan: “Nhôn ưh kơ băt ôh.” Na Yêsu khan kơ lu sư: “Lei Inh kư̆m ưh kơ roi ăn kơ iĕm bu ăn kơ Inh pơpuh đe păng bơtho đe tơ lăm hnam akŭm âu mơ̆n.” |
©Bahnar Bible Association. All rights reserved.