Malachi 3 - Sơ̆p Hlabơar Nơ̆r 'Bok Kei-Dei

Năr Kră Yang. Athei bơ̆jang kơ Kră Yang 'Bok Kei-Dei mă tơnăp

¹ “'Nâu, Inh đei wơh bơngai pơtruh nơ̆r Inh, sư gô pơih trong adrol kơ Inh; păng Kră Yang mă lu iĕm chơchă Sư gô blư truh mơ̆t tơ lăm hnam akŭm 'Bok Kei-Dei, wă khan linh jang khan nơ̆r Sư pơgơ̆p hăm iĕm mă lu iĕm oei chang gô. 'Nâu, Sư truh!” Kră Yang khan thoi noh.

² Mă-lei 'bơ̆t năr Kră Yang truh bu kĕ dơ̆ng? Păng bơngai bu kĕ dơ̆ng 'bơ̆t năr tơ'bơ̆p Sư? Yua kơ Sư thoi pla ŭnh lu bơngai thơ̆ hơjơ̆m, thoi gơmơ̆k đak 'bŏng lu bơngai pih.

³ Sư gô hơ-oei thoi lu bơngai jôr hu pơm rơgoh đĭ, sư gô chhut lu kon drŏ-nglo Lêwi, pơm ăn kơ lu sư rơgoh thoi maih păng hu, lu sư gô pơyơ̆r tơmam soi kơ Kră Yang lăm tơdrong tơpăt.

⁴ Dang ei tơmam soi đơ̆ng bơngai Juđa hăm pơlei Jêrusalem gô gơh pơm ăn jơhngơ̆m Kră Yang lăp đon, kư̆m thoi lu ki sơ̆ păng thoi lu sơnăm chăl kră sơ̆.

⁵ “Inh gô năm jê̆ lu iĕm wă kơ sek tơlang păng Inh gô pơm tơ'bôh wă blơ̆ lu bơngai pơm kơnê̆, lu bơngai pơm pơyô kư̆ kă, lu bơngai hơlĕnh pơdăr, lu bơngai pơgâm sa jên lu bơngai jang mưng, pơjuă lu bơngai hơdro-po păng lu bơngai mơti, lu bơngai mă pơrăm lu bơngai tơmoi păng lu bơngai mă kuă kơkuh păng hli yom kơ Inh,” mă Kră Yang Tih Hloh khan thoi noh.

⁶ “Yua kơ Inh jơ̆ Kră Yang, Inh ưh kơ đei layơ tơplih, yua kơ thoi noh, lu iĕm jơ̆ kon drŏ-nglo Jakôp, huay kơ lôch hiong.

⁷ Iŏk đơ̆ng năr lu 'bok yă iĕm, lu iĕm ưh pă chu yom wei răk păng achăng khôi juăt Inh. Wih tơ Inh bĕ, na Inh kư̆m gô wih tơ lu iĕm,” Kră Yang Tih Hloh khan thoi noh. Mă-lei lu iĕm khan: “Lu nhôn gô wih liơ?

⁸ Kon bơngai gơh tơtông iŏk Kră Yang 'Bok Kei-Dei hă? Na iĕm tơtông Inh. Lu iĕm khan: ‘Tơ yơ khan lu nhôn tơtông Ih?’ Lu iĕm đei tơtông boih minh lăm mơjĭt đơ̆ng lăm lu tơmam iĕm pơyơ̆r.

⁹ Lu iĕm păng đĭ-đăng teh đak đei pŭ hơngiap, yua kơ đơ̆ng lu iĕm tơtông boih đơ̆ng Inh.

¹⁰ Lu iĕm athei pơyơ̆r iŏk minh lăm mơjĭt tah tơ lăm pơk Inh, wă kơ đei tơmam sa lăm hnam Inh; păng đơ̆ng năr âu lu iĕm athei pơlong lăng Inh, Kră Yang Tih Hloh khan, lăng Inh hăm pơih lu 'măng-'mŏk tơ kơpal plĕnh ti tuh ăn tơdrong pŭn hiôk kơ lu iĕm dĭng truh anih mong pă đei!

¹¹ Inh gô găn lu hơdrông kơnu wă kơ lu sư huay kăp kuer sa pơkao plei 'long đơ̆ng teh iĕm; păng lu tơm 'long hơmu lăm mir pơgar plei pơkao sư huay kơ hơlŭng adrol kơ bơyan sư, Kră Yang khan thoi noh.

¹² Jơ̆p kơ teh đak đe gô ư-ang kơ lu iĕm đei pŭn hiôk, yua kơ đơ̆ng iĕm na teh gô chơt hiôk.” Kră Yang Tih Hloh khan thoi noh.

¹³ Kră Yang khan: “Lu iĕm iŏk nơ̆r pơrŏ wă blah Inh.” Mă-lei lu iĕm khan: “Lu nhôn đei pơma kiơ khan wă blah Kră Yang?”

¹⁴ Lu iĕm đei khan: “Đe mă bơ̆jang kơ Kră Yang 'Bok Kei-Dei noh tơdrong ưh kơ đei; lu bơ̆n wei nơ̆r Sư bơtho pơkă, athei bơwei păng yak nơnăm lăm tơdrong ơh sơ'ngon 'bơ̆t anăp Kră Yang Tih Hloh, na lơi kiơ?

¹⁵ Âu lu bơ̆n jô̆ lu bơngai pơrŏ pơang đei pŭn hiôk, lu sư pơm tơdrong kơnê̆ tă kơ rai tŏk. Lu sư pơlong Kră Yang 'Bok Kei-Dei păng đei klaih hlôi boih!”

¹⁶ Dang ei lu bơngai hli yom kơ Kră Yang pơma tơduă lu sư thoi noh Kră Yang kơtơ̆ng păng mơ̆ng; păng sơ̆p hla bơar đei chih 'bơ̆t anăp Sư wă kơ tơ'blŏk ăn kơ lu bơngai mă hli yom kơ Kră Yang păng 'blŏk kơ anăn Sư.

¹⁷ Kră Yang Tih Hloh khan: “Lu bơngai noh lu sư jing gah Inh, jing tơmam 'măn kơ Inh yua lăm năr Inh wă pơm. Inh gô mơnat ăn kơ lu sư thoi 'bă mơnat ăn kơ kon tơdăm sư bơ̆jang kơ sư kơdih.

¹⁸ Dang ei lu iĕm gô wih brŏk păng Inh klah lu bơngai tơpăt hăm lu bơngai pơm yoch kơnê̆ pha; lu bơngai bơ̆jang kơ 'Bok Kei-Dei hăm lu bơngai ưh kơ bơ̆jang kơ Sư pha.”