Malachi 2 - Sơ̆p Hlabơar Nơ̆r 'Bok Kei-Dei

Tơdrong kơkuh kư̆ kă, chă akăn tơmoi, hrĕch achăng lu drŏ-kăn Juđa

¹ “Ơ lu 'bok soi, dang ei Inh tơtă ăn tơdrong âu kơ lu iĕm.

² Tơdah lu iĕm ưh kơ mơ̆ng, tơdah iĕm ưh kơ đei răk lăm jơhngơ̆m ư-ang kơ anăn Inh,” lei Kră Yang Tih Hloh khan: “Inh gô tơjur tơdrong hiap pơtê̆ tơ kơpal lu iĕm păng Inh gô hiap pơtê̆ lu tơdrong 'lơ̆ng rŏ lu iĕm; păng Inh gô hiap boih, yua kơ lu iĕm ưh kơ đei răk lăm jơhngơ̆m iĕm.

³ Tơpă, Inh gô chrih kơ adrĕch lu iĕm rei, kon sâu iĕm păng Inh gô săi 'mê̆ tơ muh măt lu iĕm, wă khan 'mê̆ đơ̆ng ĭch đơ̆ng sem dơrong lu iĕm pơyơ̆r; na Inh gô puh tơweh lu iĕm đơ̆ng anăp Inh.

⁴ Lu iĕm băt boih nơ̆r Inh âu khan kơ lu iĕm, wă kơ tơdrong pơgơ̆p Inh hăm Lêwi.” Kră Yang Tih Hloh khan thoi noh.

⁵ “Nơ̆r pơgơ̆p Inh hăm bơngai Lêwi oei ling-lang, tơdrong arih păng tơdrong rơnŭk rơnua mă Inh đei ăn boih kơ lu sư, wă kơ lu sư hli yom kơ Inh, thoi noh lu sư hli yom kơ Inh boih păng tơtơ̆ 'bơ̆t anăp anăn Inh.

⁶ Tơdrong khôi juăt tơdrong tơpăt oei boih tơ lăm 'bơ̆r lu sư bơtho, lăm hơkŭng lu sư ưh pă đei tơdrong kơnê̆ boih; lu sư yak hơdai hăm Inh lăm tơdrong hiôk-hian păng tơpăt, pơm ăn kơ lơ bơngai weh achăng đơ̆ng tơdrong kơnê̆.

⁷ Yua kơ hơkŭng 'bơ̆r 'bok soi athei wei tơdrong hlôh wao, lu đe chă tơdrong juăt đơ̆ng lăm 'bơ̆r lu sư, yua kơ lu sư jơ̆ bơngai đơ̆ng Kră Yang Tih Hloh.

⁸ Mă-lei, tơplơ̆ dơ̆ng, lu iĕm rok trong nai, pơm kơ lơ bơngai pơm glăi kơ khôi juăt păng lu iĕm pơm glăi boih kơ nơ̆r Inh pơgơ̆p hăm Lêwi.” Kră Yang Tih Hloh khan thoi noh.

⁹ “Yua kơ thoi noh na Inh kư̆m đei pơm ăn kơ lu iĕm rai iĕ jing pă rơ-a 'bơ̆t anăp đĭ kon pơlei pơla, yua kơ lu iĕm ưh kơ kiơ̆ trong Inh pơdah kơ đe khan lu iĕm oei lăm khôi juăt.”

¹⁰ Đĭ-đăng lu bơ̆n ưh kơ trŏ minh pôm 'bă hă? Hăm trŏ lăp minh Kră Yang 'Bok Kei-Dei đĕch mă pơjing lu bơ̆n? Thoi ei boih liơ mă bơ̆n pơm ưh kơ tơpăt chă hơlĕnh băl tơduă lu bơ̆n, pơm glăi kơ tơdrong pơgơ̆p 'bok yă bơ̆n?

¹¹ Lu bơngai Juđa oei sa ưh kơ tơpăt hơlĕnh pơdăr păng đei pơm minh tơdrong yoch kơnê̆ tih krưp tơpă lăm lu bơngai Isơrael păng lăm pơlei Jêrusalem; Juđa đei pơm boih tơdrong 'mê̆-'mach kơ tơdrong 'lơ̆ng rơgoh Kră Yang, yua kơ lu sư iŏk oei kơ drŏ-kăn yang tơmoi.

¹² Mă lu bơngai đei pơm tơdrong noh, mă lu bơngai oei hơđơ̆r, dah lu bơngai drơ̆ng nơ̆r, dah lu bơngai pơyơ̆r tơmam soi kơ Kră Yang Tih Hloh, Kră Yang gô chơ̆ng hŭt lê̆ lu sư đơ̆ng hnam Jakôp.

¹³ Lu iĕm kư̆m oei pơm tơdrong âu: Lu iĕm nhơ̆m hmoi, hơdrĭ hơdrôi, đak măt lĕch gom lê̆ gơ'bang soi Kră Yang, Sư ưh pă iŏk boih tơmam soi lu iĕm păng kư̆m ưh pă lăp đon iŏk tơmam pơyơ̆r đơ̆ng ti lu iĕm.

¹⁴ Lu iĕm đei khan: “Yua kơ kiơ?” Yua kơ Kră Yang băt kơ măr iĕm ih hăm akăn ih mă iŏk oei đơ̆ng 'lơ̆p sơ̆, bơngai mă oei hơdai ih păng jing akăn ih đei pơgơ̆p hăm ih boih. Mă-lei ih kư̆m oei sa hơbĕch pơdăr hăm sư 'mơ̆i.

¹⁵ Đơ̆ng noh, mă khan tơdrong arih Kră Yang 'Bok Kei-Dei đei lơ rơkah rơkai ră, mă-lei Sư pơjing ăn kơ ih lăp minh 'nu drŏ-kăn đĕch. Mă-lei yua kơ kiơ Sư pơjing ăn kơ ih lăp minh 'nu bơngai drŏ-kăn đĕch? Noh yua kơ wă chă adrĕch adrung 'lơ̆ng rơgoh, thoi noh lu iĕm athei mă kơchăng lăm jơhngơ̆m bơ̆n kơdih, 'nĕ kơ oei sa hơlĕnh pơdăr hăm akăn bơ̆n kơdih mă iŏk oei đơ̆ng 'lơ̆p.

¹⁶ Yua kơ Kră Yang 'Bok Kei-Dei Isơrael đei khan boih thoi âu: “Inh areh dêh kơ bơngai bu mă hrĕch achăng akăn păng bơngai bu mă gom lê̆ sư kơdih hăm tơdrong khĕnh hơwĕng thoi bơngai mă gom lê̆ akâu sư hăm hơbĕn ao sư.” Kră Yang Tih Hloh khan thoi noh: Thoi noh athei wei bĕ jơhngơ̆m lu iĕm kơdih, 'nĕ pă chă hơlĕnh pơdăr băl.

¹⁷ Lu iĕm đei pơm kơ Kră Yang blĕk dêh, đơ̆ng nơ̆r iĕm pơma; khan dơ̆ng thoi âu: “Tơ yơ lu nhôn đei pơm kơ Sư blĕk.” Noh 'bơ̆t iĕm khan: “Bơngai bu pơm tơdrong kơnê̆ noh Kră Yang lăp đon păng Sư kư̆m lăp đon kơ lu bơngai thoi noh;” mưh khan thoi ei lei, “lei tơ yơ khan Kră Yang 'Bok Kei-Dei sek tơpăt?”