Luka 21 - Sơ̆p Hlabơar Nơ̆r 'Bok Kei-Dei

¹ Yêsu hue lăng lu bơngai mơdrŏng pơyơ̆r tah jên lơ tơpă lăm kơthŭng tơ hnam akŭm 'Bok Kei-Dei tơm.

² Na Yêsu kư̆m 'bôh minh 'nu yă adro dơnuh tah lăp 'bar hlak jên ngang.

³ Na Yêsu khan kơ lu bơngai pơhrăm păng Sư ei thoi âu: “Inh khan kơ iĕm tơpă, yă adro dơnuh âu sư dang tah lơ hloh kơ đĭ-đăng lu bôl buăl nai,

⁴ kơlih kơ lu bôl nai pơyơ̆r tơmam rơkah sư đĕch; yă adro âu dơnuh tơpă, mă-lei sư pơyơ̆r đĭ hloi jên sa sư.”

Đei tơdrong gleh truh

⁵ Lu bơngai oei 'bơ̆t ei 'bôh hnam akŭm 'Bok Kei-Dei tơm pơm păng tơmo rŏ păng 'bôh tơmam đe pơyơ̆r kơ 'Bok Kei-Dei sơ̆ pơm tơmam pơrŏ tơ hnam akŭm Sư, lu sư pơma khan: “Ô rŏ dêh.”

⁶ Na Yêsu khan: “Iĕm 'bôh boih hnam akŭm tơm âu 'lơ̆ng rŏ mă-lei ning-mônh hnam âu gô pơchah reng 'beng ưh pă đei tơmo ayơ tơklep băl dơ̆ng. Đe gô teh pơchah đĭ.”

⁷ Lu sư jet Yêsu: “Ơ 'Bok Thây, apinh Ih roi kơ nhôn layơ đe wă pơrăm hnam akŭm 'Bok Kei-Dei tơm păng wă kơ nhôn băt tơdra thoi yơ tơdrong noh gô truh.”

⁸ Na Yêsu khan: “Iĕm athei kơchăng kơdih hli kơ đe wă pơhlŭ pơlung iĕm kiơ̆ sư. Ning-mônh gô đei lơ bơngai truh, na lu sư anăn măt Inh khan sư kơdih 'Bok Krist păng khan wă jê̆ truh năr tôch boih. 'Noh iĕm 'nĕ kiơ̆ kơ lu sư hŏ.

⁹ Mă iĕm kơtơ̆ng đe tơblah mă tih, mă iĕ, iĕm 'nĕ kơ hli hŏ. Tơdrong noh ưh kơ jor ôh, gô đei 'mơ̆i, mă-lei năr tôch ưh tam mă truh ôh kơplah noh.”

¹⁰ Yêsu oei bơtho khan: “Kơplah ei kơnh dêh âu gô iung blah dêh to, dêh to iung blah dêh nai.

¹¹ Gô đei teh adrŏ kơtang păng đei tơdrong pơngot rơwĕt păng lôch hơbuh lơ tơring âu tơring to. Iĕm gô 'bôh tơdrong hlĭch hlăch krưp tơpă tơ kơpal plĕnh.

¹² “Hơdrol kơ iĕm wă 'bôh dôm tơdrong noh ning-mônh na đe gô rôp iĕm păng pơm kơnê̆ kơ iĕm. Đe gô jao iĕm ăn kơ đe kră sek tơlang tơ lăm hnam akŭm đe Juđê, na tah iĕm lăm hnam phak. Đe kư̆m gô anhăk iĕm dơ̆ng 'bơ̆t anăp lu 'bok tih hăm lu 'bok pơtao yua kơ iĕm lui kơ Inh.

¹³ Đe rôp iĕm ră, mă-lei iĕm kư̆m gơh ră roi kơ sư tơdrong 'nao 'lơ̆ng kơplah iĕm dơ̆ng 'bơ̆t anăp lu sư.

¹⁴ Iĕm 'nĕ kơ mah tơchĕng hơdrol kơ tơdrong iĕm wă pơma dŏng akâu iĕm kơdih 'bơ̆t anăp lu sư,

¹⁵ yua kơ Inh gô ăn kơ iĕm 'bơ̆r đon hơgei, na lu bơngai ayăt 'noh gô thuơ kơ iĕm.

¹⁶ “Lu mĕ 'bă iĕm hăm 'nhŏng oh iĕm păng kơtum kơtŏng iĕm, bôl juăt iĕm, gô jao iĕm ăn kơ đe kră sek tơlang, na lu iĕm mơ'nah sư gô pơlôch.

¹⁷ Đĭ-đăng kơ bơngai gô areh arĕnh kơ iĕm yua kơ iĕm lui kơ Inh.

¹⁸ Mă-lei gah tơdrong arih ling-lang, iĕm ưh kơ hiong kiơ ôh, mă khan minh dăng sŏk kư̆m ưh kơ hiong mơ̆n.

¹⁹ Dah iĕm adrin tơpă lei iĕm huay kơ hiong tơdrong arih ling-lang ôh.”

Yêsu bơtho tơdrong đe wă blah Pơlei Jêrusalem

²⁰ Yêsu oei bơtho lu sư thoi âu: “Lăp iĕm 'bôh linh lơ tơpă oei tăp dăr kơ Pơlei Jêrusalem, lei iĕm băt kơ lu sư wă jê̆ mơ̆t blah lăm pơlei iĕm pơchah pơchek đĭ.

²¹ Kơplah noh lu bơngai mă oei tơ dêh Juđê athei jăk tơ kông, lu bơngai mă oei lăm Pơlei Jêrusalem âu athei kơdâu jăk đơ̆ng pơlei, lu bơngai mă oei tơ 'ngoaih Pơlei Jêrusalem 'nĕ pă mơ̆t tơ pơlei dơ̆ng.

²² Năr noh kơnh trŏ kơ năr 'Bok Kei-Dei wă phak lu bơngai Juđê thoi sơ̆p hla bơar 'Bok Kei-Dei khan mă đơ̆ng sơ̆, gô trŏ kơ năr noh tơpă.

²³ Kơplah ei kơnh, lu bơngai drŏ-kăn akâu kơhioh păng lu bơngai drŏ-kăn tơmŏm kon, lu sư pơmat-tat dêh. Gô đei tơdrong anat anot gleh tơpă yua kơ 'Bok Kei-Dei wă phak lu bơngai Juđê âu.

²⁴ Đe gô koh pơlôch lu sư păng đao. Đe gô rôp lu sư, anhăk lu sư jơ̆p kơ teh đak pơm bơnă đe. Lu bơngai dêh đe gô pơjuă pơđep Pơlei Jêrusalem truh tơ 'Bok Kei-Dei ăn kơ sư rơngei đơ̆ng lu bơngai dêh đe ning-mônh.

Kon Bơngai gô jur dơ̆ng.

²⁵ “Iĕm gô 'bôh tơdrong hlĭch hlăch tơ măt 'năr, tơ măt khei păng lu sơnglŏng mơ̆n. Tơ ala teh âu lu teh đak đei tơdrong gleh tơpă. Lu sư hli kơ jơwa đak dơsĭ poh-yă tih.

²⁶ 'Bok Kei-Dei gô gơgŭ sơnglŏng đơ̆ng plĕnh na kon bơngai chang gô kơ tơdrong anat anot wă truh tơ jơ̆p-jang kơ ala teh âu, na lu sư hli dang lĕ kơ wă lôch.

²⁷ Kơplah noh đe gô 'bôh Inh Kon Bơngai 'lơ̆ng rŏ mơsêh mơyang tih-tin jur hăm hơmơ̆l.

²⁸ Lăp iĕm pơtơm 'bôh dôm tơdrong noh hei na iĕm hiôk chơt, yua kơ 'Bok Kei-Dei wă dŏng pơklaih iĕm boih.”

Pơtih gia kơ 'long hơra

²⁹ Yêsu roi pơtih gia kơ lu sư thoi âu dơ̆ng: “Iĕm tơchĕng lăng kơ 'long hơra păng mă dôm lu 'long nai.

³⁰ Lăp iĕm 'bôh dơng sư hơđoh chăt hla, 'noh iĕm băt kơ wă jê̆ bơyan 'mi boih.

³¹ Na tơdrong Inh roi kơ iĕm noh hei kư̆m lei-lăi mơ̆n. Ning-mônh lăp iĕm 'bôh dôm tơdrong Inh roi kơ iĕm noh, iĕm băt kơ 'Bok Kei-Dei wă pôk Inh jur pơm Pơtao iĕm boih.

³² Inh khan kơ iĕm tơpă, jơhnơr noh gô 'bôh tơpă tôm tơdrong Inh roi kơ iĕm noh hei.

³³ Plĕnh teh gô hiong tôch đĭ, mă-lei dôm tơdrong Inh pơma ưh kơ đei layơ hiong tôch ôh, gô 'bôh tơpă.

Tơdrong Yêsu wă kơ bơ̆n kơchăng

^34-35 “Na kơplah iĕm oei arih dang ei, iĕm athei kơchăng kơdih 'nĕ kơ nŏng kơ et sik, hli kơ suai. Păng 'nĕ pă hăt kơ tơdrong ala teh, hli kơ năr noh truh kơplah iĕm ưh kơ kơchăng, tabơla haih pă tam thoi bơngai 'leh 'năk. Na tơdrong noh wă truh tơ jơ̆p-jang teh đak ning-mônh kư̆m thoi noh mơ̆n.

³⁶ Thoi noh na iĕm athei kơchăng păng krao khan ling-lang wă kơ iĕm kĕ ĕnh dôm tơdrong noh na dơ̆ng 'bơ̆t anăp Inh Kon Bơngai ning-mônh.”

³⁷ Rim năr lăm hơdôm năr noh Yêsu bơtho đe tơ hnam akŭm 'Bok Kei-Dei tơm đơ̆ng pơgê truh kơsơ̆. Tơ kơsơ̆ Sư brŏk 'bĭch tơ pơlei đe tơ kơpal kông Ôliwơ.

³⁸ Rim pơgê hrôih, đĭ-đăng kon pơlei pơla năm mơ̆ng tơdrong Sư bơtho tơ hnam akŭm 'Bok Kei-Dei tơm.